Xiviko Xa Vahuweleri Va Mfumo

Hanyelo Leri Sasekisaka Vutirheli Bya Hina Bya Vukriste

MUAPOSTOLA Petro u tsundzuxa Vakriste a ku: “Hanyani hi mukhuva lowo saseka exikarhi ka vamatiko.” (1 Petro 2:12) Muapostola Pawulo u komba leswaku hi mahanyelo ya hina lamanene, hi “komba ku saseka ka leswi dyondzisiwaka hi tlhelo ra Xikwembu Muponisi wa hina.” (Tito 2:10) Timbhoni ta Yehova emisaveni hinkwayo ti tiviwa hi mahanyelo lamanene. Xiya swikombiso swi nga ri swingani.

Ku Tsakisiwa Ka Mudyondzisi Hi Mahanyelo Lamanene

◻ Hofisi ya rhavi ya Watch Tower Society eCosta Rica yi vika leswaku nhlayo leyikulu ya vantshwa va tiko rero va veka xikombiso lexinene. Makwerhu un’wana wa xinuna u hlamusela leswi swi n’wi kokeleke entiyisweni. Wa hlamusela: “Xilo lexi ndzi kokeke ngopfu a ku ri mahanyelo lamanene ya vantshwa ni vanhu lavakulu, kambe ngopfu-ngopfu vantshwa. Loko ndzi tirha tanihi mudyondzisi, ndzi ve na nkarhi wo xiya Timbhoni exikolweni xa mina. Naswona tanihi leswi a ndzi tshama emutini wa Timbhoni ta Yehova, ndzi xiye mahanyelo ya vana va kwalaho.

“A ndzi nga ta swi ba hi makatla ku xiya ku hambana exikarhi ka swichudeni leswi a a swi ri Timbhoni ni swichudeni swin’wana exikolweni xa mina. Minkarhi hinkwayo Timbhoni a a ti fika hi nkarhi naswona a ti hanya hi ndlela leyinene, ti nga hembi, naswona nkarhi na nkarhi tiendla swiavelo swa tona. Nakambe ndzi xiye leswaku ta tshembeka loko ti tsala xikambelo, hambi loko swichudeni swin’wana minkarhi hinkwayo swi kanganyisa. Ku tlula kwalaho, va rhulile naswona a a va ndzi xixima tanihi mudyondzisi wa vona. Hi ku nyanyuriwa hi vantshwa va Timbhoni, exikolweni ni le kaya leri a ndzi tshama eka rona, ndzi sungule ku xiyisisa vukhongeri lebyi kutani eku heteleleni ndzi amukela ntiyiso.”

Vuyelo Lebyinene Bya Mahanyelo Ya Vakriste eNtsombanweni

◻ Un’wana wa Timbhoni ta Yehova ebandlheni ra le vuxeni bya El Salvador u navele ku avelana mahungu lamanene ya Mfumo ni vamakwavo va yena vambirhi. Un’wana u yingisile kutani a sungula ku dyondza Bibele ni Timbhoni ta Yehova. Makwavo loyi un’wana a a nghena kereke ya Evangelical leyi vuriwaka Prince of Peace, naswona u byele makwavo wa yena a ku: “U nga vulavuli na mina; u tirhela swilaveko swa Diyavulosi.”

Loko nkarhi wa ntsombano wa muganga wu fika, loyi a a dyondza u rhambe makwavo wa yena ku ya na yena entsombanweni. Makwavo wa yena u te: “Swi lulamile, ndzi ta famba na wena; ndzo yela ntsena ku ya vona laha ndzi nga khomaka Timbhoni kona.” Vamakwavo lava vambirhi va ve kona entsombanweni swin’we. Nhlayo leyikulu ya lava veke kona ni nhleleko lowu a wu ri kona entsombanweni swi nyanyule Muevangeli, loyi a vuleke leswaku a nga si tshama a vona swilo swo tano. Loko a fika ekaya, u byele makwavo wa yena a ku: “Ndzi nyike voko.” Makwerhu loyi un’wana wa vutisa: “Swi vula yini sweswo?” Yena u hlamule a ku: “Wena wo ndzi nyika voko ntsena.” Va qhavulana, kutani makwavo loyi a nghenaka kereke ya Evangelical u te: “Ku sukela sweswi ndzi ta dyondza na Timbhoni ta Yehova. Hakunene, a ndzi nga swi tivi leswi ndzi swi kayelaka.” Sweswi na yena i muhuweleri la chivirikaka wa mahungu lamanene ya Mfumo wa Xikwembu.