Buku Leyintshwa Ya Vutirheli Bya Nsimu

EKA madzana ya Mintsombano ya Muganga ya “Vahlayisi va Vutshembeki” hi 1985-1986, ku humesiwile buku leyintshwa ya Vutirheli bya nsimu hi tindzimi to tala. I ya ku pfuna vanhu ku kuma tinhlamulo leti anerisaka leti Bibele yi hlamulaka swivutiso swa vona ha tona. Leyi i buku ya matluka ya 448 ya xihloko lexi nge Reasoning From the Scriptures. Xana hi tihi tin’wana ta timhaka ta yona ke?

◻ “Manghenelo yo Tirhisiwa eVutirhelini bya Nsimu.” Lawa ma hlengeletiwe ma huma eka valanguteri va swifundza ni va miganga, maphayona ni vakulu lava nga ni ntokoto wa malembe yo tala ni lava kumaka vuyelo lebyinene eVutirhelini bya vona.

◻ “Leswi U Nga Va Hlamurisaka Swona Lava Tsemaka Bulo Hi Ku Kongoma.” “A ndzi swi tsakeli,” “Ndzi na kereke ya mina,” “Ndzi khomekile,” ni van’wana vo tala ku vulavuriwa hi vona laha. Loko minkaneto leyi yi ku sivela ku nyikela vumbhoni ensin’wini ya ka n’wina, laha u ta kuma tindlela letinene leti pfunaka to tshinelela vanhu. Xiyenge lexi xi tlhela xi va na vuxokoxoko ehenhlenl ka tindlela to vulavula ni Mabudha, Mahindu, Vayuda ni Mamuslimi.

◻ Ku ni swihloko leswikulu leswi hundzaka 70. Ku katsiwe “Ku xixa nyimba,” “Swidzidzirisi,” “Rimbewu,” “Vungoma,” ni “Tiholideyi,” “Ku Ngheniwa hi Moya,” “Ku Tswariwa Nakambe,” “Vunharhu-Un’we” ni swin’wana swo tala. Ehansi ka swona ku ni swiringanyeto swa muxaka lowu hakanyingi sweswi wu vutisiwaka, hi va-1980. Hi xikombiso: “Hi nga tiyiseka njhani leswaku Bibele a yi cinciwanga?” Xana un’wana ni un’wana u hlawuleriwe ‘nkarhi wo fa’? “Hikwalaho ka yini Xikwembu xi pfumelela maxangu?” Nakambe ku na swiringanyeto swa ndlela yo anakanyisisa na munhu loyi a nge: “Vanhu hi vona va tsaleke Bibele,” “Ndzi ni ndlela ya mina yo twisisa Xikwembu,” “Ndzi hanya Vutomi lebyinene. Ndzi va khoma kahle Vaakelani va mina. Hi byona vukhongeri lebyi byi ndzi ringaneke,” ni makume-kume man’wana. Leswi swi hlengeletiwe swi huma hi le matikweni ya 18. Ku tirhisa buku leyi swi nga ku pfuna leswaku u vuyeriwa hi ntokoto lowu van’wana va wu kumeke hi nkarhi wa malembe ya makumekume eku anakanyisiseni hi Matsalwa.

◻ Buku leyi a yi lunghiseriwangi ku pfuna munhu ku “hlula eku phikizaneni” na vanhu lava nga xiximiki ntiyiso. Kambe ke, yi nyikela vuxokoxoko bya nkoka lebyi endleriweke ku tirhiseriwa eku anakanyisiseni ni vanhu lava nga ta ku pfumelela ku endla tano. Van’wana va vona va nga ha ku vutisa swivutiso leswi hakunene va lavaka tinhlamulo leti anerisaka. Van’wana, loko mi karhi mi vulavurisana, va nga ha boxa leswi va swi pfumelaka, nakona va nga ha endla sweswo hi ku tiyiseka. Kumbexana i vanhu lavanene lava tsakelaka ku yingisela mianakanyo yin’wana. Loko swi ri tano, buku leyi yi nga pfuna ngopfu eku avelaneni na vona erungula lerinene ra ntiyiso wa Bibele. U nga kanakani ku va komba leswi yi swi khomeke ni ku yi hlaya na vona.

◻ Ku pfumelelana ni xikombiso lexi vekiweke hi muapostola Pawulo loko a chumayela eGreece, ku endliwe ku tirhisiwa lokunene ka ku tshaha ka matimu ya vanhu, ti-encyclopedia, tibuku ta vukhongeri, tidikixinari ta ririmi ra Bibele, ni swin’wana. Xin’wana ni xin’wana xi vekiwe emavokweni ya wena.

◻ Xikombiso xa matluka ya nkombo xa timhaka ni matsalwa xi katsiwile leswaku xi ku pfuna ku kuma tinhlamulo hi ku anghwetla.

◻ Rhwala buku leyi ya nkoka nkarhi na nkarhi evutirhelini bya nsimu. Yi nyiki swichudeni swa Bibele leswi kombisaka ku navela ko vulavurisana ni van’wana hi leswi swi nga swi dyondza. Yi nga ka yi nga nyikiwi vanhu ntsena. Kambe loko un’wana a kombela ku va na yona, u nga kanakani ku n’wi kumela yona.