Xana U Anakanyisisa Hi Ndlela Leyi Humelelaka Hi Matsalwa?
“Hi ku tolovela ka yena, Pawulo a nghena nhlengeletano na vona; kutani hi masiku manharhu ya Savata a hlamulana na vona hi ku landza Matsalwa.”—MINTIRHO 17:2.
1. Ha yini Bibele yi ri ya nkoka eka hina?
RITO ra Xikwembu i ra nkoka swonghasi! Ri hlamula swivutiso swa nkoka leswi ku nga hava xihlovo xin’wana lexi nga swi kotaka. Leswi Bibele yi swi nyikelaka a hi mianakanyo yin’wana ntsena ehenhleni ka vutomi; i ntiyiso. ERitweni rakwe, Yehova u hi byela leswi a swi lavaka eka hina, naswona swilaveko swa yena hinkwaswo i swinene eka hina.—Psalma 19:7-11; Esaya 48:17.
2. (a) Loko hi veka vumbhoni eka van’wana, hi nga nghenisa xihlovo xa mahungu ya hina eka vona hi ndlela yihi? (b) I swivutiso swihi hi khutaziwaka ku swi xiyisisa hi hexe?
2 Hikwalaho ka leswi Timbhoni ta Yehova ti khorwisekeke leswaku Bibele hakunene yi huma eka Xikwembu ni leswaku leswi yi swi khomeke swi na matimba yo kucetela vanhu leswinene, va twarisa leswi nga endzeni ka yona eka van’wana hi matimba. (Vaheveru 4:12) Loko va hlanganyela evutirhelini bya le rivaleni, va lava ku vanhu va twisisa leswaku rungula leri va ri twarisaka a ri sunguriwanga hi vona vini kambe ri huma eRitweni ra Xikwembu. Kutani va tirhisa Bibele hi ku kongoma, entiyisweni va yi hlayela van’wana loko swi koteka. Xana wena hi wexe u tirhisa Bibele hi ndlela leyi? Xana wena u nga hlamulana ni vanhu va timbilu letinene hi Matsalwa hi ndlela yo tano lerova va pfuniwa ku twisisa ni ku amukela leswi yi swi dyondzisaka?—2 Timotiya 2:15.
3, 4. (a) Nkoka wa ku vulavula hi Rito ra Xikwembu wu hlamuseriwe hi ndlela yihi esikwini ra Yeremiya? (b) Hi fanele ku kongomisa vanhu lava hi va dyondzisaka eka mani ni le ka yini xana?
3 Risima ra ku byela vanhu leswi Xikwembu xi swi vulaka ematshan’wini ya ku va nyika miehleketo ya munhu hi xiyexe yi hlamuseriwe enkarhini wa muprofeta Yeremiya. Nkarhi wolowo wa matimu a wu ri vuprofeta bya siku ra hina. Vunyingi bya vaprofeta eYerusalema enkarhini wolowo a va vula marito lawa a va ehleketa leswaku vanhu va lava ku ma twa, kambe a va nga twarisi rito ra Yehova hi ku tshembeka. Mayelana na vona, Yehova u te: “V̌a v̌ula leŝi v̌a ŝi v̌onaka timbilwini ta v̌ona—ŝi nga ri leŝi humaka enoṅwini wa Yehova.” Kutani a engetela hi matimba a ku: “La’nga ni rito ra mina a a v̌ulav̌ule rito ra mina ŝinene.”—Yeremia 23:16-28.
4 Yeremiya u ‘vulavule hi rito ra Yehova hi ku tshembeka.’ Na hina, hi fanele ku vona mfanelo yo namarhela Matsalwa swinene loko hi dyondzisa van’wana. A hi swi lavi leswaku vanhu va va vadyondzisiwa va hina. Hi lava leswaku va va vagandzeri va Yehova, va famba emintileni ya Yesu Kriste, ni ku tlangela nhlengeletano leyi Yehova a kongomisaka malandza yakwe ha yona namuntlha.—Ringanisa 1 Vakorinto 1:11-13; 3:5-7.
5. Yohane 7:16-18 yi nyikela vukongomisi eka (a) vakulu? (b) eka hina hinkwerhu loko hi ri karhi hi hlanganyela evutirhelini bya nsimu hi ndlela yihi?
5 Yesu hi byakwe u te: “Dyondzo leyi ndzi yi dyondzisaka a hi ya mina, kambe i ya loyi a ndzi rhumeke. Loko munhu a navela ku endla ku rhandza ka Xikwembu, u ta tiva loko dyondzo leyi yi huma eka Xikwembu, kumbe loko ndzi tivulavulela swa mina ntsena? Loyi a vulavulaka hi ku tisungulela, u tilavela ku dzunisiwa.” (Yohane 7:16-18) Hambi a ri N’wana wa Xikwembu la hetisekeke a a khathalela ku papalata ku vulavula leswi nga swa yena n’wini. Na hina hi fanele ku va tano swinene! Hikwalaho ke, swi fanela swonghasi, leswi vakulu va faneleke ku ‘va vanhu lava namarhelaka rito leri tshembekeke’ eka vutshila bya vona bya ku dyondzisa! (Tito 1:9) Nakambe, swi fanela swonghasi, leswi ndzayo leyi nga eka 2 Timotiya 4:2 yi nge: “Twarisa rito”! Wolowo i mpimanyeto lowu hi wu namarhelaka endzeni ka bandlha ni loko hi hlanganyela evutirhelini bya nsimu ehandle.
6. Ku engetela eku hlayeni ka hina ka tindzimana ta Bibele, hakanyingi ku laveka yini? Kombisa.
6 Kambe leswi a swi vuli swona leswaku hi fanele ku hlaya tindzimana eBibeleni ntsena kutani hi nga ha vuli nchumu. Loko vanhu va ta kuma nkoka lowu teleke wa tindzimana, i swa risima eka vona ku twisisa ku tirha ka tona. Leswi a swi ri ntiyiso hi mutsheniwa wa Muetiyopiya loyi ku vulavuriwaka hi yena eka Mintirho 8:26-38. Wanuna loyi a a hlaya vuprofeta bya Esaya, kambe
a a nga swi twisisi leswi a byi vula swona. Kambe, loko swivutiso swa yena swi hlamuriwile, loko a kume ntikelo wa leswi a a swi hlaya ni loko a twisisile hi laha swi n’wi khumbaka ha kona hi yexe, u hundzuke Mukriste. Hi fanele ku nyikela mpfuno lowu fanaka eka valavi va ntiyiso namuntlha naswona minkarhi hinkwayo hi fanele ku khathalela ku tamela rito ra ntiyiso hi mfanelo.
Ndlela Leyi Yesu A Tirhiseke Matsalwa Ha Yona
7. I xikombiso xa mani lexi nga hi pfunaka ku antswisa vuswikoti bya hina byo anakanyisisa hi Matsalwa hi ndlela yo hlawuleka?
7 Yesu Kriste u veke xikombiso lexinene eku tirhiseni ka Matsalwa hi ndlela leyi humelelaka. (Matewu 7:28, 29; Yohane 7:45, 46) Ku kambisisa mukhuva wa yena wo dyondzisa swi nga hi pfuna ku antswisa vuswikoti bya hina byo anakanyisisa hi Matsalwa. Xiya swikombiso leswi landzelaka:
8. (a) I xivutiso xihi lexi “mudyondzisiwa un’wana wa Nawu” a xi vutiseke Yesu? (b) Yesu u xi hlamule hi ndlela yihi xivutiso xolexo, naswona ha yini?
8 Eka Luka ndzima 10, tindzimana 25-28, hi hlaya hi ta “mudyondzisiwa un’wana wa Nawu” loyi a laveke ku ringa Yesu hi ku n’wi vutisa a ku: “Mudyondzisi, ndzi ta endla yini ku kuma vutomi lebyi nga heriki?” A wu ta va u hlamurise ku yini? Yesu u endle yini? Ingi a nyike nhlamulo leyi kongomeke hi ku olova, kambe u xiye leswaku wanuna loyi ana se a a ri ni langutelo leri twisisekaka emhakeni leyi. Kutani Yesu u n’wi vutisile hi laha a a ta hlamula xivutiso lexi ha kona, a ku: “Ku tsariwile yini enawini? U hlaya yini kona?” Wanuna a hlamula a ku: “Rhandza Hosi, Xikwembu xa wena, hi mbilu ya wena hinkwayo, ni moya wa wena hinkwawo, ni matimba ya wena hinkwawo, ni ku anakanya ka wena hinkwako’; naswona: ‘Rhandza munhu-kuloni kukota loko u tirhandza.’” Yesu u hlamula a ku: “U hlamule swinene,” kutani endzhaku, loko a tirhisa xiyenge xa Levitika 18:5, u te: ‘Endlani leswi kutani mi ta kuma vutomi.’ Hi nkarhi wun’wana Yesu hi yexe u tshahe milawu liya mimbirhi eku hlamuleni ka xivutiso. (Marka 12:28-31) Kambe sweswi wanuna loyi a a vulavula na yena a a tiva nawu wa Muxe naswona handle ko tilumaluma a a lava ku vona loko Yesu a pfumelelana ni leswi a swi dyondzeke eka wona. Yesu u n’wi tshike a va ni ku aneriseka ka ku nyikela nhlamulo hi yexe.
9. (a) Yesu u endle yini leswaku a pfuna wanuna loyi ku twisisa rin’wana ra matsalwa lama a ma tshaheke? (b) Ha yini ndlela yoleyo a yi humelela xana?
9 Hambi swi ri tano, wanuna loyi a a hupha nhlamuselo leyi heleleke ya matsalwa lama a ma tshaheke. Xisweswo, “hi ku lava ku tiendla la lulameke, a ku eka Yesu: “Munhu-kulorhi i mani xana?” Loko a n’wi hlamula, Yesu a nga tshahanga matsalwa man’wana. A nga nyikanga yona nhlamuselo leyi wanuna loyi a a ta yi teka yi ri leyi amukelekaka. Ematshan’wini ya sweswo, u tirhise xikombiso—lexinene lexi hakunene xi faneleke swilaveko swa wanuna loyi, xikombiso lexi a xi ta n’wi pfuna ku anakanyisisa hi nhlamuselo ya tsalwa. Yesu u vulavule hi muakelani wa Musamariya loyi a pfuneke mufambi loyi a a kanganyisiwile ni ku biwa, kasi muprista ni Mulevhi a va swi endlanga. Lexi a xi ri xikombiso lexi endleke xiga lexi nge “muakelani” lexi nga ni nhlamuselo leyi wanuna loyi a a nga si tshama a yi xiyisisa, naswona xi endle tano hi ndlela leyi endleriweke ku fikelela mbilu. Kutani ke, loko Yesu a dlayelela, u vutise xivutiso leswaku a tiyiseka loko wanuna a twisisa mhaka, kutani u n’wi khutaze ku tirhisa leswi va burisaneke ha swona evuton’wini bya yena n’wini.—Luka 10:29-37.
10. (a) Hi nga dyondza yini eka xikombiso xa ku dyondzisa ka Yesu? (b) Hi nga ti tirhisa njhani tin’wana ta tinhla teto loko hi tirhisa Mhaka ya hina ya sweswi-nyana yo Vulavurisana evutirhelini bya nsimu?
10 Hi nga dyondza yini eka xikombiso xolexo xa ku dyondzisa? Xana u swi xiyile leswi landzelaka? (1) Yesu u kongomise mianakanyo eMatsalweni leswaku a hlamula xivutiso xo sungula xa wanuna loyi. (2) Wanuna loyi u rhambiwile hi Yesu leswaku a tiphofula, naswona ku bumabumeriwa loku kufumelaka u ku nyikeriwa loko nhlamuselo ya vutlhari yi endliwile. (3) Yesu u endle leswaku ku tiyisekiwa leswaku ku yelana exikarhi ka xivutiso ni matsalwa ka tsundzukiwa, tanihi loko swi kombisiwile eka ndzimana ya 28. (4) Xikombiso lexi fikelelaka mbilu xi tirhisiwile ku tiyisekisa leswaku wanuna loyi a nga yi huphanga nhlamuselo ya xiviri ya nhlamulo. Ku landza ntila wolowo swi nga hi pfuna ku anakanyisisa hi ndlela leyi humelelaka ni van’wana hi Matsalwa.
“Mudyondzisi, U Vulavula Swinene”
11. (a) Loko Vasaduki va vutise Yesu xivutiso ehenhleni ka vukati mayelana ni ku pfuxiwa ka vafi, a yi ri yihi nhlamulo leyi kongomeke leyi a yi nyikeke? (b) Ha yini a nga yimanga hi leswi?
11 Eka Luka ndzima 20, tindzimana 27-40, ku tsariwe xikombiso xin’wana lexinene xa ndlela leyi humelelaka yo tirhisa Rito ra Xikwembu. Van’wana va Vasaduki va tshinelele Yesu va ri ni xivutiso. Va andlalele Yesu xiyimo lexi a va ehleketa leswaku xi komba vuphukuphuku bya ku pfumela leswaku vafi va ta hanya nakambe. Va vulavule hi wansati loyi a a ri ni vanuna va nkombo, hi ku landzelelana. Va vutisile va ku: “Hi siku ra ku pfuka eku feni, xana u ta va nsati wa mani eka vona?” Nhlamulo leyi Yesu a va nyikeke yona swi le rivaleni leswaku a yi nga ri yona leyi a va yi rindzerile. Entiyisweni a va nga si tshama va xiyisisa ntikelo wa leswaku lava pfuxiweke a va nga ta teka, kambe emhakeni leyi, a va ta fana ni tintsumi. Kambe swo tala a swi laveka ku endla leswaku yi va leyi khorwisaka.
12. (a) I ku anakanyisisa kwihi loku Yesu a ku tirhiseke ku seketela ku tshemba ku pfuka ka vafi? (b) Hikwalaho ka yini ngopfu-ngopfu a yi fanela Vasaduki?
12 Yesu u swi xiyile leswaku xiphiqo xa xiviri xa Vasaduki a ku ri leswaku a va nga ku tshembi ku pfuka ka vafi. Kutani u kongomise mianakanyo yo hlawuleka eka sweswo. Nhlamuselo yakwe a yi tekiwe eka matsalwa ya Muxe, eka Eksoda 3:6, lawa Vasaduki va vuleke leswaku va ma pfumela. U anakanyisisile a ku: “Loko ku ri ku pfuka ka vafi, Muxe na yena u tiyisile mhaka loko a ri kusuhi ni xihlahla, kutani a vula leswaku Hosi i Xikwembu xa Abrahama ni Xikwembu xa Isaka, ni Xikwembu xa Yakobo.’” Kambe xana Vasaduki va swi kotile ku vona ku pfuka ka vafi eka marito wolawo? A va swi kotanga ku fikela loko Yesu a engetela a ku: “Hikwalaho a hi Xikwembu xa lava feke, kambe i xa lava hanyaka.” A swi twisiseka: Swilo leswi nga hava vutomi kun’we ni vanhu swi nga va ni Muvumbi, kambe i vanhu lava hanyaka ntsena lava nga vaka ni Xikwembu. Lexi xi nga xikongomelo xa ku tinyiketela ni vugandzeri bya vona. Loko Abrahama, Isaka na Yakobo a va tiferile ni ku lahliwa, va nga ri na malangutelo ya vutomi, Yehova ingi a te eka Muxe, ‘A ndzi ri Xikwembu xa vona.’ Kambe leswi a hi swona leswi a swi vuleke. Endzhaku ka ku twa hi laha Yesu a anakanyisiseke ha kona hi MatsaIwa eka mhaka leyi, xana ku na ku vilela ko karhi leswi vatsari van’wana va hlamuleke va ku: “Mudyondzisi, u vulavule swinene”?
13. I switsundzuxo swihi leswi nyikiweke laha leswi nga hi pfunaka ku antswisa vuswikoti byo anakanyisisa hi Matsalwa? Hlamusela leswaku ha yini u vona xin’wana ni xin’wana xi ri xa nkoka.
13 U nga kuma kumbe ku antswisa vuswikoti byo tano byo anakanyisisa hi Matsalwa ku ya emahlweni hi ndlela yihi? Swilo swo hlayanyana i swa nkoka: (1) U fanele u va ni vutivi lebyinene bya Matsalwa. Dyondzo ya munhu hi xiyexe ya nkarhi na nkarhi ni ku va kona eminhlanganweni i timhaka ta nkoka eku kumeni ka vutivi byebyo. (2) U fanele ku va ni nkarhi wo ehleketisisa, u valanga mintiyiso emiehleketweni hi matlhelo yo hambana-hambana ni ku aka ku tlangela ka wena eka yona. (3) Loko u dyondza, u nga lavi tinhlamuselo ta Matsalwa ntsena kambe ni swivangelo swa Matsalwa swa tinhlamuselo toleto. Tsala leswi etlhelo ka tindzimana leti u lavaka ku vulavula ha tona. (4) Xiya hi laha u nga hlamuselaka Matsalwa ha kona eka tinxaka to hambana-hambana ta vanhu. (5) Anakanyisisa hi laha u nga ha kombisaka tinhla tin’wana ha kona. Swilo leswi hinkwaswo i swa nkoka eku hlakuleleni ka vuswikoti byo anakanyisisa hi Matsalwa.
Ku Anakanyisisa Loku Fanelaka Vayingiseri
14. I timhaka tihi leti xiyekaka ta ndlela ya ku dyondzisa ka Pawulo leti tisiwaka emianakanyweni ya hina eka Mintirho 17:2, 3?
14 Muapostola Pawulo, na yena, a a ri mudyondzisi lonene, loyi hi nga dyondzaka eka yena. Hi nkarhi wun’wana n’anga Luka u fambe na yena, kutani nhlamuselo yakwe ya ntirho wa Pawulo yi xiyeka khwatsi. Wa vika: “Va . . . fika eTesalonika, laha a ku ri ni sinagoga ra Vayuda. Hi ku tolovela ka yena, Pawulo a nghena nhlengeletano na vona; kutani hi masiku manharhu ya Savata a hlamulana na vona hi ku landza Matsalwa, a ri karhi a ma hlamusela, ni ku ringanisa ha wona leswaku Mesiya a a fanele ku twisiwa ku vaviseka, ni ku pfuka eku feni; kutani a ku: “Yesu loyi ndzi mi tivisaka yena, hi yena Mesiya.” “A ku ri wihi mbuyelo wa kona? Yehova u katekisile matshalatshala ya Pawulo. “Van’wana exikarhi ka vona va pfumela . . . kutani va ri nhlayo leyikulu ya Vagriki leyi chavaka Xikwembu, ni lavo tala exikarhi ka vavasati lavo chaviseka.” Ndlela ya ku dyondzisa leyi tirhisiweke hi Pawulo yi xiyeka swinene ngopfu: U endle leswi tlulaka ku hlaya Matsalwa; u anakanyisise ha wona, kutani a twananisa ku anakanyisisa ka yena ni vayingiseri va yena. A nga va byelanga mahungu lamanene ntsena, kambe u ma hlamuserile ni ku nyika vumbhoni lebyi humaka eRitweni leri huhuteriweke ra Xikwembu. (Mintirho 17:1-4) Xiya swikombiso swimbirhi swa ndlela ya Pawulo ya ku dyondzisa:
15. (a) Loko a vulavula ni vayingiseri va Vayuda eAntiyoka wa Pisidiya, Pawulu u ringete ku kuma masungulo lama tolovekeke na vona hi ndlela yihi? (b) Hikwalaho ka yini u vona leswaku i swa nkoka ku kuma masungulo lama tolovelekeke eku vekeni ka hina ka vumbhoni?
15 Eka Mintirho 13:16-41 ku nyikiwe nkulumo leyi Pawulo a yi nyikeleke vayingiseri va Vayuda eAntiyoka wa Pisidiya. Xo sungula u tikarhatele ku tlhoma masungulo lama tolovelekeke ni vayingiseri vakwe. (Vona tindzimana 16, 17.) Hikwalaho ka yini a endle tano? Hikuva a swi ta va pfuna ku rhandza ku anakanyisisa hi mhaka ya leswi a a ta swi nyikela. A nga titivisanga tanihi xirho xa bandlha ra Vukriste lexi nga ni rungula ra vona hi ta Yesu Kriste. A a vulavula eka Vayuda, kutani u tirhise miehleketo ya vona. U swi vonile leswaku vayingiseri vakwe a va endliwe hi vanhu lava a va chava Xikwembu, naswona u kombe leswaku yena, tanihi vo tala va vona, a ri Muheveru hi ku velekiwa. Nakambe u pfuxetile swiyenge swa nkoka swa matimu ya Israyele. Kambe u hlayise masungulo lama tolovelekeke na vona loko a vulavula hi Yesu Kriste hi ndlela yihi?
16. Pawulo u hlayise masungulo lama tolovelekeke loko a vulavule na vona ha Yesu hi ndlela yihi?
16 Pawulo u tivise Yesu tanihi ntukulu wa Davhida ni loyi a hlamuseriweke hi Yohane Mukhuvuri, loyi vanhu hi xitalo va n’wi xiyeke a ri muprofeta wa Xikwembu. (Mintirho 13:22-25; Luka 20:4-6) Kambe Pawulo a a swi tiva leswaku vayingiseri vakwe a va swi xiya leswaku Yesu a a soriwile hi vafumi eYerusalema, kutani muapostola Pawulo hi byakwe u pfuxe mhaka leyi ivi a hlamusela leswaku hambi ku ri ku soriwa ni ku dlayiwa ka Yesu a ku ri ku hetiseka ka vuprofeta. (Mintirho 13:27-29) U kombe leswaku enkarhini wolowo Xikwembu hi xoxe xi teke goza ehenhleni ka Yesu hi ku n’wi pfuxa eku feni ni leswaku a ku ri na timbhoni leti swi voneke hi mahlo exikarhi ka Vayuda ta mhaka ya leswaku Yesu a a pfuxiwile. (Mintirho 13:30, 31) Pawulo a a swi tiva leswaku leswi a swi ta va mhaka leyi nonohaka eka vo tala ku yi pfumela, kutani u hlamuserile leswaku leswi a a vulavula ha swona a ku ri “mahungu lamanene ya xitshembiso lexi vatata wa hina va tshembisiweke xona.” U kombe leswaku leswi a swi ri tano, a sungula hi ku tshaha eka Psalma 2:7, endzhaku eka Esaya 55:3, kutani eku heteleleni eka Psalma 16:10. U anakanyisise hi to hetelela ta tindzimana toleto, a komba leswaku a ti nga ta va ti hetisekile eka Davhida hikuva u ku ‘vonile ku bola.’ Kutani a ti fanela ku tirha eka un’wana loyi “a nga vonangiki ku bola” hikwalaho ka ku pfuxiwa eku feni hi Xikwembu. (Mintirho 13:32-37) Loko a andlale yinhla yoleyo, Pawulo u nyikele makumu lama nga ni matimba. U swi tivile leswaku a swi ri swa nkoka eka vanhu ku teka ni leswi a va swi twa hi matimba. Vo tala va swi amukele kahle.—Mintirho 13:38-43.
17. (a) Hikwalaho ka yini ku andlala ka Pawulo ka ntiyiso eAthena ku hambanile? (b) Hi nga dyondza yini eka leswi a swi endleke eka xiendlakalo xexo?
17 Loko a vulavula ni vayingiseri lava nga riki Vayuda, Pawulo u tirhise misinya leyi fanaka yo dyondzisa. Hikwalaho ke, eAriyopago le Athena, eGreece, u twananise nkulumo ya yena ni swiyimo ni ku ehleketa ka Vaathena. Loko a ringeta ku veka masungulo lama tolovelekeke ni vayingiseri volavo, u va bumabumerile hikwalaho ka leswi a va ri vanhu lava tinyiketeleke vukhongeri. U vulavule hi altari emutini, leyi tsariweke ku “Eka Xikwembu Lexi Nga Tivekiki.” Xikwembu lexi, ku vula Pawulo, hi xona lexi a a xi twarisa. (Mintirho 17:22, 23) Loko a endle tano, u tirhise swiyenge swa Matsalwa lama huhuteriweke ivi a ya emahlweni a anakanyisisa ha wona hi xisekelo xa leswi. Kutani, hi ku va ni vutivi byin’wana bya tibuku ta Xigriki, Pawulo nakambe u tshahe swiphato swa vona, hayi hi matimba yakwe, kambe ku komba leswaku timhaka tin’wana leti a a vulavula ha tona a ti amukeleka ni le ka tibuku ta vona. Hikwalaho, van’wana va ve vapfumeri.—Mintirho 17:24-31, 34.
18. I yini xi nga hi pfunaka ku kuma mimbuyelo leyinene eka matshalatshala ya hina yo anakanyisisa ni van’wana hi Matsalwa?
18 Mahungu lamanene lama Pawulo a ma chumayeleke eAthena a ma fana ni mahungu lama a ma nyikeleke eAntiyoka. Ku hambana ka muxaka wa ku ma nyikela a ku ri hi mhaka ya leswi a tiveke leswi a swi laveka leswaku a anakanyisisa ni vanhu. U va khathalele swinene ngopfu lerova a endla matshalatshala lama engetelekeke lama lavekaka leswaku va kota ku endla tano. Kutani matshalatshala yo tano ya tise mimbuyelo leyinene. Onge na hina, hi nga endla matshalatshala lama lavekaka ni ku lava leswaku Xikwembu xi katekisa matshalatshala ya hina yo anakanyisisa ni van’wana hi Matsalwa, leswaku hi ta avelana mahungu lamanene ni vanhu va tinxaka hinkwato.—1 Vakorinto 9:19-23.
Hl DYONDZA YINI?
◻ Hikwalaho ka yini swi ri swa nkoka ku tirhisa Bibele evutirhelini bya hina hi ku kongoma?
◻ Eka Luka 10:25-37, i milawu yihi leyinene yo dyondzisa leyi kombisiweke?
◻ I swiendlo swihi leswi nga antswisaka vuswikoti bya hina byo anakanyisisa hi Matsalwa?
◻ I ku fikela kwihi laha masungulo ya vanhu ya nga kucetelaka ndlela leyi hi ringetaka ku anakanyisisa na vona hi yona?