Vavasati eNtirhweni—Miringo Ni Mintlhontlho

“VAVASATI va nghenele vuthu ra ntirho wa ximfumo hi tinhlayo letikulu enkarhini wa malembe ya makume manharhu lama hundzeke.” Ku vika nkambisiso wa nhlengeletano ya Worldwatch Institute. “Eka matiko lama fumeke ni lama nga evuswetini,” xiviko xi ya emahlweni, “ku durha ka swilo swi hlohlotela vavasati leswaku va tirhela ku holeriwa.” Kumbe hi laha wansati un’wana wa le Nigeria a swi vekaka ha kona: “Ntshikilelo wa ikhonomi wu tano lerova ndzi fanele ku huma ndzi ya entirhweni.”

Ku fana ni ‘wansati lonene’ wa minkarhi ya Bibele, vavasati vo tala va tsaka ku endla munyikelo lowu lavekaka wa ikhonomi eka ku tshamiseka ka mindyangu ya vona. (Swivuriso 31:10, 16, 24) Naswona van’wana va vona ku kuma ntirho swi ri leswi tlhontlhaka ni leswi anerisaka. Kambe hambi leswi ntirho wo tihanyisa wu nga ha vaka ni mimpfuno ya wona, nakambe wu nga va ni swihinga swa wona.

Hi xikombiso, wansati un’wana la nga mulanguteri wa xitolo u ri: “Ndzi rhandza ntirho wa mina. Ndhuna ya mina i yinene, hofisi ya mina yi xongile. Kambe ndza wu venga loko ntirho wolowo wu teka nkarhi wa mina wo tala ku tlula lowu ndzi nga wu nyikaka wona, hikuva endzhaku ka wona ndzi na ntirho wun’wana lowu ndzi yimeleke ekaya—tanihi wansati ni manana.” Kambe, vavasati vo tala va hlayisa ntirho, kaya ni ndyangu hi laha ku humelelaka, naswona hikwalaho ka sweswo va fanele ku bumabumeriwa swinene.a

Hambi swi ri tano, mintirho yo tihanyisa, na yona yi veka vavasati eka swiphiqo swo tala leswi nga swa nkoka entirhweni. Eka vo tala, ntlhontlho wa kona i ku hlayisa langutelo leri ringaniselaka loko va sindzisiwa ku tirha eka xivandla lexi nga ni mphikizano lowukulu kumbe lexi teleke hi ku tilawula. Ku navela ku humelela, ku va emahlweni, ku susumetele vavasati van’wana leswaku va endla mintirho ya vona mhaka leyikulu ya vutomi bya vona.

Minkarhi yin’wana ndhawu ya ntirho nakambe i xihlovo xa mintshikilelo ya mahanyelo. Ku va la twaka ku tirhisiwa ka bulo leri thyakeke i xivilelo xin’wana lexi tolovelekeke xa vavasati lava tirhaka. Leswi nyanyaka nakambe, van’wana va tikuma va ri lava hlaseriwaka hi ku onhaka ka rimbewu loku nga riki na xivangelo. “Loko ndzi sungula ku tirha,” ku tsundzuka wansati un’wana wa Mukriste, “a ku ri mina nhwanyana ntsena entirhweni. Vavanuna a va ndzi hlamula hi ndlela leyi kucetelaka rimbewu, naswona a swi nonon’hwa hakunene eka mina.”

Swiphiqo swo tano i mhaka ya xiviri leyi vavasati lava va faneleke ku langutana na yona siku na siku, ngopfu-ngopfu lava va navelaka ku hlayisa mimpimanyeto ya Vukriste. Hi laha ku tsakisaka, ku na xihlovo xa mpfuno wa xiviri eka vona.

[Nhlamuselo ya le hansi]