Xiviko Xa Vahuweleri Va Mfumo

Chile Ri Tsakela Ku Voningeriwa Loku Andzaka

KU FANA ni ku vonakala loku vangamaka ka dyambu loku voningaka ehenhla ka tintshava ta Andes hi vurhonga, ku vonakala ka ntiyiso wa Bibele ku te ro sungula eChile hi 1930. Elembeni rero, un’wana wa malandza lama tinyiketeke ya Yehova u tile a huma eArgentina ni mahungu lamanene. Namuntlha, ku vonakala ka Rito ra Xikwembu ku voningile naswona ku fike eka swiyenge swa le kule swa tiko.

Hambi leswi hofisi yo sungula ya rhavi eChile yi akiweke hi 1945, muako lowuntshwa, lowukulu wa rhavi wu akiwile hi 1970, loko nhlayo ya vahuweleri va Mfumo yi fike eka 7 000. Eka malembe ya khume lama tlhandlamaka, ku voningeriwa loku andzaka loku humaka eRitweni ra Xikwembu ku khumbe timbilu to tala leti swi amukelaka. Eku sunguleni ka va-1980 ku akiwa kun’wana ka hofisi ya rhavi a ku laveka hi xihatla. Xisweswo, hi September 1982 xiphemunyana xa tiko xa 7 wa tihekitara ehandle ka Santiago xi xaviwile. Naswona endzhaku ka ntirho wo tala wo sungula, ku cela-cela ku sungurile hi June 1984.

A swi khutaza ku vona ndlela leyi vamakwerhu va le Chile, lavantshwa ni lavakulu, va seketeleke muako hi minyikelo ya vona yo hanana. Magidi ya van’wana va nyikele nkarhi wa vona na titalenta. Van’wana lava nga ni vuleteri bya vutshila va pfunetile hi vunjhiniyara. Van’wana a va tirha eku vatleni, ku welidera, ku endla makhetheni ni ku khavisa, kumbe va nyikela ntirho lowu xiyekaka wa rirhandzu hi ku hlakula nhova, va susumeta tigirivani ni ku cela makhele. Hakunene, ku vonakala loku yaka emahlweni ka Rito ra Xikwembu ku khumbe timbilu ta vanhu va xona ivi ku va susumetela ku tinyikela hi ku tirhandzela.—Psalma 110:3.

Vun’we ni ku tirhandzela a swi hundzanga swi nga voniwi hi va le handle. Vavanuna vo tala lava xavisaka hambi swi ri swichudeni swa yunivhesiti ni tiprofesa va tile endhawini ya muako leswaku va ta vona ni ku dyondza. Muaki un’wana u lave ni ku hirha ntlawa hinkwawo wa khonkhriti leswaku va ya pfuna eka vhengele leri a a ri aka. Wanuna la xavisaka u hlamusele ndlela leyi ntlawa wa vatirhi wu hambaneke ha yona—ku hava tinhlamba, ku hava ku tirha hi ku nonoka. Loko a byeriwe leswaku hinkwavo a va ri Timbhoni ta Yehova naswona a va ri kwalaho tanihi vapfuneti, u te: “Munhu a nge swi voni leswi eka ndhawu yihi na yihi yin’wana. Vanhu ndzin’wina mi va misava yin’wana.”

Eku heteleleni, hi August 1986 ntlawa wa rhavi wa le Chile wu rhurhele eka muako lowuntshwa ePuente Alto. Naswona hi October 25, loko va ri na A. D. Schroeder wa Huvo leyi Fumaka ya Timbhoni ta Yehova, ntshungu lowu chivirikaka wa 933 wu kombise ku seketela ka wona ka mbilu hinkwayo eku nyikeleni ka miako leyintshwa entirhweni wa Yehova. Siku leri tlhandlamaka, xiendlakalo lexi hlawulekeke xi ve kona exitediyamu xa le kusuhi, naswona 18 012 va engetele ku sí ka vona eka xiboho lexi.

Xana ku aka loku hakunene ka laveka? Timhaka a ti tihlamulele. Loko ndhawu yi xaviwile hi 1982, a ku ri ni vahuweleri va Mfumo va 17 500 eChile. Sweswi ku na lava tlulaka 29 000! Naswona ku na tidyondzo ta le makaya ta Bibele ta kwalomu ka 40 000 leti fambisiwaka, ku hava makumu eka xivono lexi. Kutani ku vonakala ka Rito ra Xikwembu a ku voninge swinene hi ku vangama ensin’wini leyi yi vupfeke eswintshabyanini swa Andes, leswaku ku dzunisiwa Yehova ni ku katekisiwa ka vanhu vakwe.—Daniel 12:3.