‘Ku Phasa Vanhu’ eArctic
Ximumu xin’wana ni xin’wana vo tala va Timbhoni ta Yehova va chumayela eka “masimu lama nga aviwangiki”—va xaxameta tindhawu leti nga hava mabandlha lama simekiweke. Vo tala va vona i vanhu lava tirhaka ni swichudeni leswi hetaka nkarhi wa swona wo wisa swi endla tano. Van’wana i maphayona ya nkarhi hinkwawo lava humakanyana evutirhelini bya vona. Va tokota ntsako wo tisa mahungu lamanene eka vanhu lava nga etlhelweni ni ku tisiwa kusuhi ni ndyangu wa vona ni vamakwavo va moya. Leyi i mhaka ya pfhumba ro tano en’walungu swinene.
HI KU nonoka muchini wo phasa lowu va nge i Skagstein wa rhetemuka ehlalukweni. A ku ri madyambu yo sungula ya ximumu. Rimoyana lerinene ra le vuxeni ri hungela lwandle ivi ri tisa ku ntshunxeka loku phyuphyisaka eka mafurha ya tinhlampfi. Loko hi yimile ehlalukweni, hi yimise mavoko hi ku salani eka Båtsfjord, muti lowukulu wo phasa tinhlampfi eVuxeni bya Finnmark, le Norway.
Exikepeni a ku ri ni vatirhi va nhungu. Øivind na Åshild a va te eBåtsfjord malembe ya 11 eku sunguleni leswaku va ta pfuneta hi ntirho wo chumayela eka nsimu leyi yi nga aviwangiki. Sweswi, loko va ri karhi va rhurhela eka lwandle rin’wana, bandlha ra vahuweleri va Mfumo lava nga vaka 40 a va tsakile laha. Vatirhi lavan’wana a va vumbiwa hi Jarle, muphasi wa tinhlampfi (muphasi wa tinhlampfi la nga ni vutshila ni phayona ra “nguva”), vamakwerhu vambirhi va xisati va maphayona, mutirhisi wa muchini wo cela, mutirhi un’we wa vumaki ni matsalani wa hofisi la humaka eKaya ra Bethele ya le Norway. I yini lexi hlanganiseke ntlawa lowu kun’we? Naswona i pfhumba ra muxaka muni leri a va ri teka?
Ku Famba Xihlala Hi Xihlala
Eka nkarhi lowu Jarle a a nga lavi nhlampfi yo olova. Kungu ra kona a ku ri leswaku hi ya eka xihlala xin’wana ni xin’wana ni tiko rihi na rihi hi xikepe xa Skagstein ku sukela eBåtsfjord en’walungu swinene ku ya eBrønnøysund etikweni ra Nordland. A hi ta hlanganisa kwalomu ka ku tlula hafu ya ribuwa ra lwandle ra Norway. Hi yini? Ina, to tala ta tindhawu leti ti nga fikeleriwa ntsena hi xikepe xa munhu hi xiyexe, naswona i kan’we ntsena eka malembe man’wana ni man’wana yo hlayanyana laha Timbhoni ta Yehova ti taka etindhawini leti ni rungula ra Mfumo. Hi kunguhate ku ya ‘phasa vanhu’ ematikweni lawa.—Matewu 4:18, 19.
Xikepe xi suke eBåtsfjorden ivi xi ya evupela-dyambu hi ribuwa ra lwandle vusiku hinkwabyo. A ku ri siku ro sungula ra July. Dyambu ra le xikarhi ka vusiku, leri fihliweke hi nkumba lowunene wa mapapa, ri tlhave ri ri ni ku vonakala ko basanyana, ko olova. Magidi ya tinyenyana ta le lwandle a ya vonaka etimbuweni ta lwandle. Ku khunguluka ni ku pupuma ka lwandle leri pfulekeke a ku ri lokunene, hi ku ya hi muphasi wa tinhlampfi. Kambe eka van’wana va hina lava nga tiviki nchumu hi lwandle, a swi tikanyana.
Mixo lowu landzelaka hi fambile hi le tlhelo ka hlaluko eHonningsvåg. Laha hi kona laha ku ‘phasa ka hina tinhlampfi’—ntirho wo chumayela—a ku fanele ku sunguriwa kona. Vanhu va le n’walungu wa Norway va ni ndhuma ya ku va ni malwandla. Loko hi nyikele mhaka yo koma ya ntirho wa hina, hi ntolovelo hi nyikiwe xo tshama emahlweni ka khixi ivi hi nyikiwa kofi. Kona a hi boheka ku nyika mhaka leyi teleke ya leswaku a hi ri vamani, laha a hi huma kona, ntirho wa hina, vito ni mpimo wa xikepe xa hina, loko ana se hi phase tinhlampfi ku fikela kwalaho, ni pfhumba ra hina leri saleke. Hi le ndzhaku ka sweswo ntsena laha a hi ta kota ku nghena eyinhleni ya xiviri ya riendzo—mahungu lamanene ya Mfumo wa Xikwembu.
Ku Amukela Lokunene eArctic Yo Titimela
Xana rungula leri a ri ta tsakisa eka vanhu lava va le xihlaleni lexi nga eka 480 wa tikhilomitara en’walungu wa Xirhendzevutana xa Arctic? I yini lexi a va xi khathalela hakunene? I nchumu lowu vanhu kwihi na kwihi va karhatekaka ha wona: vuhomboloki bya ntirhisano, ku pfumaleka ka mintirho, mali, ndyangu ni swiphiqo swa munhu hi xiyexe. Nakambe a va karhateka swinene ehenhleni ka xiyimo lexi tsemaka nhlana xa misava—vuxaka bya n’walungu na dzonga ni mpfilumpfilu wa vuxa ni wa vupela-dyambu.
A swi olova eka hina ku komba ntlhantlho wa Bibele—Mfumo wa Xikwembu. Naswona a swi vuyerisa swonghasi ku vona ku sola ni ku kanakana swi nyamalala ivi swi siviwa hi ntsako ni ntshembo! Vanhu vo tala etindhawini leti ta le kule va khongelele Mfumo ku sukela evuhlangini, kambe a va nga si tshama va twisisa nhlamuselo ya xikhongelo xo tano hakunene. (Matewu 6:9-13) Hi siye tibuku ta Bibele ni vo tala va le xihlaleni ivi hi lunghiselela ku tsalelana na vona leswaku hi hlayisa ku tsakela ka vona.
Hambi leswi a ku ri nkarhi wa ximumu, mahiselo a ya ri kwalomu ka 2° sentigiredi eRolvsøy, naswona moya lowukulu a wu hunga. Hi ku rhurhumela na hi ku tifunengeta swinene hi baji rakwe, un’wana wa vamakwerhu u tshinelele wanuna loyi a a yime eribuweni ra lwandle.
“Xana u twa xirhami?” ku vutisa wanuna wa kona.
“Eh . . . ” makwerhu u kanakanile.
“Nghena ivi u kuma nchumu wo hisa leswaku u dya ni ku nwa!”
Endzeni ka yindlu, makwerhu u nghenisiwe ekhixini, laha wansati wa nuna loyi a a ri bizi kona.
“Xana u na yona kofi yo nyika munhu loyi?” ku vutisa nuna wa kona.
Kofi yo hisa yi endliwile kun’we ni swilayi swa xinkwa leswikulu, jamu leyi endliweke ekaya ya cloudberry na nhlampfi. Endzhaku ka bulo ro tsakisa, makwerhu u siye tibuku tin’wana ta Bibele ivi a ya eka riendzo leri landzelaka, a kufumerile ni ku khutazeka. Yoleyo a yi ri mintokoto yo veka vumbhoni eka vanhu lava nga ni xinghana ni malwandla etindhawini leti ta le kule, etlhelweni.
Ntokoto Lowu Fuwisaka
Loko Skagstein yi ri karhi yi pfula ndlela ya yona emagandlatini eka xihlala xin’wana ni xin’wana, vatirhi va hlanganisiwe kun’we hi tindlela to tala ku tlula yin’we. Vanhu va nhungu lava hanyaka kun’we masiku ni mavhiki eka xikepe xa 12 wa tikhilomitara va sungula ku tiva vutshila lebyikulu bya van’wana. Hi dyondze ku hanyisana kun’we ni ku khathalelana. Swihinga leswikulu swi lulamisiwile, naswona vumunhu bya hina bya Vukriste byi hlantswiwile. (Vakolosa 3:9, 10) Kutani ntokoto wu tikombe wu ri lowu vuyerisaka swinene.
Hi kanele ndzimana ya siku na siku ya Bibele kun’we, ivi hi vulavula hi mintokoto ya siku. A hi pfuxeta leswi vuriweke ni ku endliwa ni leswi a swi fanele swi vuriwile ni ku endliwa. Leswi swi hi phyuphyisile leswaku hi endla matshalatshala lamakulu yo humelela eku vulavuleni ni vanhu. Vantshwa ni lava va ha ku tsakelaka va amukele xitsundzuxo lexinene ni xikhutazo xo anamisa vutirheli bya vona.
“A ndzi ri karhi ndzi anakanya hi vutirheli bya nkarhi hinkwawo ku sukela loko ndzi khuvuriwile,” ku vule Bjørn wa malembe ya 27 hi vukhale. “Enkarhini wa pfhumba rerhu, ku navela ni xivindzi xo ‘ringa Yehova’ swi kurile eka mina hakantsongo-ntsongo. Ndzi tokote ntshembo lowukulu lowu hi nga vaka na wona eka Yehova. Pfhumba ri endle leswaku swi olova eka mina ku nghenela ntirho wa vuphayona.”—Malakia 3:10.
Nakambe pfhumba ri hi pfune ku vona swinene xihatla xa minkarhi. Vo tala va vanhu lava hi va endzeleke a va fa hakantsongo-ntsongo. Swakudya swa tinhlampfi a swi hela. Tihofisi ta poso ni switolo a swi pfariwa. Vanhu a va vilela loko va vona vantshwa va ya emahlweni va lava mintirho eka madoroba ni miti ya le kule, va siya makaya lamanene lamantshwa ni mahanyelo ya xintu. Emisaveni hinkwayo, timiliyoni ti hava makaya naswona ta sika. Laha u kuma makaya ya ri hava vanhu ni swakudya swo tala leswi humaka elwandle. Kambe, a hi vangani lava va swi lavaka. Hinkwaswo leswi i vumbhoni lebyinene bya ku tsekatseka ka misava.
Ku Ya Emahlweni Ni Riendzo
Pfhumba ri ye emahlweni etlhelo ra n’walungu wa Sørøya ku ya eKvænangen. Eka kun’wana laha ku yimiweke kona, hi boheke ku ya eribuweni ra lwandle hi xikepe lexi kokiwaka. Kambe etindhawini tin’wana, Skagstein a xi swi kota ku tluta xi ya etlhelo ka hlaluko. Vo tala va vanhu va kwalaho va hi rhendzerile va lava ku vona leswaku vanhu lava va nga tivekiki a va ri vamani hikuva hakunene a hi nga vonaki hi fana ni vaphasi va tinhlampfi eka vona. Loko va swi tivile leswaku a hi ri Timbhoni ta Yehova leti taka ni mahungu lamanene lama humaka eBibeleni, mabulo lama hanyaka hi ntolovelo ya landzerile.
Endzhaku ko hlanganisa ndhawu leyi, hi kongome eTromsø, laha van’wana va hina a va ta va kona eNtsombanweni wa Muganga wa “Ku Rhula Ka Xikwembu.” Xiyenge lexi xa riendzo a wu ri ntokoto lowu xiyekaka hakunene. A ku ri vusiku, kambe dyambu ra xikarhi ka vusiku ri tlhavile hi ku vangama ehenhla ka ritlangi. Exineneni, swihlala ni swihlalanyana leswi nga ni xinyami swi yime hi xivumbeko lexikulu. Eximatsini, tintshava leti funengetiweke hi gamboko ti vangamisiwe hi ku vonakala ka dyambu. Maxele a ya ri kahle, naswona lwandle ri avanyisiwe hi magandlati lamantsongo ntsena. Hinkwaswo a swi rhurile ni ku hola, handle ka mpfumawulo wa njhini ni wa vuyimbeleri lebyi nyanyulakanyana lebyi humaka eka xiya-nimoya xa hina. Mayana matshamelo lama tsakisaka swonghasi!
Endzhaku ka ntsombano eTromsø, a ku ri ni ku hundzukanyana eka vatirhi. Manuku pfhumba ri ye emahlweni, emakun’wini ya Senja ni ku hundza hi le ka ntlawa wa swihlala swa Vesterålen ku ya eBodø ivi endzhaku ku yiwa eBrønnøysund, ku nga xikongomelo xa hina xo hetelela. Etindhawini to tala endleleni, to fana na Rødøy, hi hlangane ni vanhu lava a va nga si tshama va vulavula ni Timbhoni ta Yehova. Ku hele malembe ku sukela loko maendzo yo chumayela ma endliwile, naswona sweswi rixaka lerintshwa a ri kurile.
Pfhumba Leri Nga Rivalekiki
Hi nkarhi lowu hi fikeke eBrønnøysund, a ku ri eku heleni ka August. Loko hi ri karhi hi languta endzhaku eka mavhiki lama hi ma heteke hi rhendzeleka hi Skagstein, hi vona leswaku hakunene a ri ri pfhumba leri nga rivalekiki. Eka pfhumba leri hi hete ntsengo wa maawara ya 880 hi chumayela mahungu lamanene naswona hi fambise tibuku ta 126 na timagazini ta 1 026, hi tlhela hi kuma swikhokhelo swa 12 swa Xihondzo xo Rindza na Awake! Mbewu yo tala ya Mfumo a yi byariwile etindhawini leti ti nga akiwangiki ngopfu.
“A wu ri nkarhi lowunene ngopfu wo wisa lowu a ndzi nga si tshama ndzi va na wona!” ku vule un’wana wa vahuweleri lavantshwa loyi a a ri eka pfhumba ra kona. Hinkwerhu ka hina lava hi veke ni lunghelo ro hlanganyela eka pfhumba leri hi pfumerile swinene. Hi vone leswaku a wu nga ri nkarhi lowunene wo wisa ntsena kambe a wu ri lowu pfunaka swinene emoyeni ni wa swilo leswi vuyerisaka leswi a hi nga si tshama hi swi endla.
[Mimepe leyi nga eka tluka 25]
(Leswaku u vona rungula leri hleriweke hi ku helela, vona nkandziyiso wa kona)
SWEDEN
FINLAND
U.S.S.R.
Brønnøysund
Rødøy
Bodø
NORWAY
Senja
Tromsø
Kvænangen
Sørøya
Rolvsøy
Honningsvåg
Båtsfjord