Nkambisiso Wa Mahungu

Ku Pfumelela Xidyoho A Swi Lulamanga

Eka papila ra sweswinyana leri yaka eka varhangeri va Kereke, mutsari wa tinyuziphepha ta vukhongeri Michael J. McManus u vule leswaku tikereke ti seketele ku avana ka ndyangu wa Amerika. Ku vika The Fresno Bee, nyuziphepha ya le California. McManus u xiye leswaku a ku ri ni ku dlaya vukati ka 1,2 wa timiliyoni ni ku tswariwa loku nga riki nawini ka 750 000 le United States hi 1985 ni leswaku mimpatswa ya 2,2 wa timiliyoni leyi nga tekanangiki a yi hanya kun’we.

McManus u kombise leswaku, ematshan’wini yo namarhela mimpimanyeto ya Bibele swinene ehenhleni ka mahanyelo, leswi khutazaka ku tshembeka evukatini. Kereke yi teke ntirho lowu nga nyawuriki etimhakeni to tano hi matshalatshala yo seketela ku hlanganyela. Hi xikombiso, u tshahe xiboho xa sweswinyana “xa leswaku Kereke ya Episcopal yi tshika ku kaneta ka yona mimpatswa leyi hanyaka kun’we handle ko tekana.”

Malangutelo yo tano ya manguva lawa ehenhleni ka rimbewu ni vukati ya lwisana swinene ni Bibele. Pawulo muapostola wa Mukriste u te: “Ku tekana a ku ve loku xiximiwaka hi vanhu hinkwavo, vukati byi nga onhiwi hi ku kanganyisana.” (Vaheveru 13:4) Loko Vafarisi va hlasele Yesu emhakeni yo dlaya vukati, u vule leswaku “wanuna u ta sukela tata wa yena ni mana wa yena, a namarhela nsati wa yena, kutani lavambirhi va ta va nyama yin’we ntsena.” U tlhandlekerile a ku: “Un’wana ni un’wana la tshikaka nsati wa yena, loko ku nga ri hi mhaka ya vunghwavava, kutani a teka un’wana, wa oswa.”—Matewu 19:4, 5, 9.

Loko a hlamula kungu ra ku tinyiketela ka kereke eka timhaka to tano ta mahanyelo, McManus u te: “Kereke ya Episcopal yi fike eka yinhla leyi yi vulaka leswaku ku tenga ka yona loku tlakukeke i ku pfumelela. Ku hava laha Yesu a nge hi pfumelela xidyoho. U sole xidyoho.” Swichudeni leswi tivaka Bibele kahle swa pfumela.

Vumbhoni Lebyi Nga Landzulekiki

“Endzhaku ka malembe ya langutelo leri nga tiyisekiki ro tinyungubyisa, tintlhari ti sungula ku nyika Xikwembu nkambisiso wa vumbirhi ti nga swi lavi,” ku xiya mutsari wa tinyuziphepha Pete McMartin wa The Vancouver Sun, nyuziphepha ya Columbia ya Manghezi, Canada. Hambi leswi vukhongeri ni sayense a swi lwisana hi malembe xidzana, “sweswo kahle-kahle a swa ha ri ntiyiso,” ku vula Wasley Krogdahl, khale ka profesa wa Yunivhesiti ya Kentucky wa ntivo-tinyeleti ni fisika (Physics). Wa tlhandlekela: “Ntivo-misava wu swi veke erivaleni leswaku misava yi na masungulo, naswona sweswo swi vula muvumbi.”—The State Journal-Register, Springfield, Illinois.

Tintlhari tin’wana ti tlhela ti ehleketa hi masungulo ya misava. Xivangelo hi xihi? “Misava yi twisiseka swinene ku tlula leswi yi swi endleke 50 wa malembe lama hundzeke,” ku hlamusela Krogdahl mutivi wa tinyeleti. Eka malembe ya 25 yo hetelela, ku kula ka xitirho lexi nga ni matimba swinene ku vange ku tshuburiwa ka tinyeleti, tinyeleti leti vumbiweke hi nyutliya ni leti rhendzelekaka. Krogdahl u boxa leswaku loko vutivi bya misava byi ri karhi byi andza, swi tano na hi vumbhoni bya leswaku Xikwembu xi kona. U ri, vumbhoni byo tano, “entiyisweni byi hlanhla swisekelo swa lava va nge ku hava Xikwembu.”

Kambe, leswi swi tekeleke mianakanyo ya tintlhari malembe ku swi amukela endzhaku ka ndzavisiso ni dyondzo leyi hlakataka, swichudeni swa Bibele a swi swi tiva hi malembe xidzana. “Hikuva mpfhuka misava yi tumbuluka, leswi nga vonakiki swa [Muvumbi], ma nga matimba ya xona lama nga heriki ni vukwembu bya xona, swa vonaka swinene loko ku anakanyiwa mintirho ya xona.” (Varhoma 1:20) Swi vekiwe hi ku olova, vumbhoni lebyi nga landzulekiki a byi ri kona minkarhi hinkwayo.

[Xifaniso lexi nga eka tluka 24]

Orion Nebula

[Xihlovo Xa Kona]

Xifaniso xa U.S. Naval Observatory