Yingisani Leswi Moya Wu Swi Byelaka Mabandlha

‘Loyi a nga ni tindleve, a a yingise leswi moya wu swi byelaka mabandlha.’—NHLAVUTELO 3:22.

Rungula leri nga eka matluka 10 ku ya eka 21 ri nyikeriwile eka Mintsombano ya Muganga ya Vululami bya Xikwembu ya Timbhoni ta Yehova hi 1988 tanihi tinkulumo to pfula ta nxaxamelo lowu nge ‘Nkarhi Lowu Vekiweke Wu Kusuhi.’

1. I marito wahi ya Nhlavutelo lama nga mahungu lamanene emalembeni lawa ya gome, naswona “vuprofeta” ni ‘nkarhi lowu vekiweke’ swi vula yini?

MALEMBE yo hlayanyana lama hundzeke, mutivi wa swa mahanyelo wa le United States u hlamusele leswaku vanhu va tiko rero a va ri na ntshunxeko lowukulu ngopfu kambe va nga ri na ntsako lowu ringaneke. U engeterile a ku vanhu, “va kuma leswaku ntsako wu va phonyokerile. Paradeyisi leyi va titshembiseke yona yi tikombe yi nga ri nchumu.” Hikwalaho ka leswi, marito ya muapostola Yohane eka Nhlavutelo 1:3 (BX) i mahungu lamanene, hikuva u hi byela ndlela leyi ha yona hi nga kumaka ntsako. Yohane u tsarile: “Ku katekile l’a hlayaka ni la’v̌a yingisaka timhaka ta v̌uprofeta lebyi, la’v̌a hlayisaka leŝi ṭariweke kona, hikuv̌a nkari wu kusuhi.” “V̌uprofeta” lebyi a kongomisaka eka byona hi lebyi rhekhodiweke ebukwini ya Nhlavutelo. Naswona ‘nkarhi lowu vekiweke’ i nkarhi lowu vuprofeta lebyi bya Nhlavutelo byi faneleke ku hetiseka ha wona. Marito ya Yohane ya ni nkoka lowukulu eka hina namuntlha.

2. Xana i yini leswi Yohane a faneleke a swi hlamarile loko lembe xidzana ro sungula ri ya eku heleni?

² Malembe lama tlulaka 60 a nga si tsala buku ya Nhlavutelo, Yohane a a ri kona hi Pentekosta loko bandlha ra Vukriste leri totiweke ri simekiwa. Manuku ke, hi 96 C.E., bandlha rero ri kurile ku suka eka swirho swa rona swo sungula swa 120 ku ya eka nhlengeletano leyikulu, ya matiko hinkwawo. Kambe ku ve na swiphiqo. Hi laha Yesu, Pawulo na Petro va tsundzuxeke ha kona, vugwinehi ni mintlawa a swi sungula ku humelela, naswona Yohane a nga ha va a hlamarile leswaku vumundzuku a byi khome yini.—Matewu 13:24-30, 36-43; Mintirho 20:29, 30; 2 Petro 2:1-3.

3. Swivono leswi Yohane a swi voneke ni ku swi rhekhoda eka Nhlavutelo swi tiyisa yini?

³ Manuku ke, anakanya ntsako wa yena, loko a amukele “nhlavutelo ya Yesu Kriste, leyi Xikwembu xi n’wi nyikeke yona, leswaku a ta komba malandza ya xona swilo leswi swi fanelaka ku humelela ku nga ri khale.” (Nhlavutelo 1:1) Enxaxamelweni wa swivono leswikulu, Yohane u swi vonile leswaku swikongomelo swa Yehova a swi ta hetiseka ni leswaku ku tiyiseka ka Vakriste lavo tshembeka a ku ta hakeriwa hi laha ku hlamarisaka. Nakambe u amukele marungula lama humaka eka Yesu ya mabandlha ya nkombo; lawa kahle-kahle a ya ri ndzayo yo hetelela ya Yesu leyi kongomeke leyi yaka eka Vakriste emahlweni ka ku ta ka Yena eku kwetsimeni ka Mfumo.

Mabandlha Ya Nkombo

4. (a) Hi byihi vutihlamuleri bya mabandlha ya Vukriste lama tshembekaka? (b) Yi vula yini mhaka ya leswaku vakulu lava totiweke va voniwa va ri evokweni ra xinene ra Kriste tanihi tinyeleti ta nkombo?

⁴ Mabandlha lawa ya nkombo ya Vakriste lava totiweke a ma yimeriwe tanihi switlhoma-rivoni swa nkombo, naswona vakulu lava totiweke lava nga exikarhi ka wona a va yimeriwe tanihi tinyeleti ta nkombo evokweni ra xinene ra Kriste. (Nhlavutelo 1:12, 16) Hi xifaniso lexi xo twisiseka, Yohane u vone leswaku mabandlha ya Vukriste lama tshembekaka ma fanele ma va vatameri va ku vonakala, tanihi switlhoma-rivoni leswi lumekiweke emisaveni leyi nga ni munyama. (Matewu 5:14-16) Ku khoma ka Yesu vakulu evokweni ra yena ra xinene a swi komba leswaku u rhangela vakulu, wa va kongomisa ni ku va fuma.

5. Esikwini ra Yohane marungula lama yaka eka mabandlha ya nkombo xana a ma kongomisiwe eka vamani?

⁵ Yesu u byela Yohane a ku: ‘Tsala leswi u swi vonaka, kutani u rhumela buku ya kona emabandlheni lawa ya nkombo: Bandlha ra le Efesa, ni ra le Smirna, ni ra le Pergamo, ni ra le Tiyatira, ni ra le Sarda, ni ra le Filadelfiya, ni ra le Lawodikiya.’ (Nhlavutelo 1:11) Mabandlha lawa a ma ri kona hakunene esikwini ra Yohane, naswona hi nga tiyiseka leswaku loko Yohane a hete ku tsala Nhlavutelo, bandlha rin’wana ni rin’wana ri kume kopi. Kambe xiya leswi Dictionary of the Bible ya Hastings yi swi vulaka ehenhleni ka Nhlavutelo loko yi ku: “A ku na buku yin’wana eka T[estamente] L[eyintshwa] leyi seketeriweke kahle eka lembe xidz[ana] ra vu-2.” Leswi swi vula leswaku buku ya Nhlavutelo yi tiviwile ni ku hlayiwa ku nga ri hi Vakriste ntsena eka mabandlha ya nkombo kambe na hi van’wana vo tala lava laveke ku hlaya marito ya vuprofeta. Hakunene, ndzayo ya Yesu a yi ri ya Vakriste hinkwavo lava totiweke.

6, 7. (a) Marito ya Nhlavutelo ma tirhe ngopfu-ngopfu rini, naswona hi swi tiva njhani leswi? (b) Xana i vamani lava yimeriwaka hi tinyeleti ta nkombo ni mabandlha ya nkombo namuntlha?

⁶ Kambe marungula lawa ma yaka eka mabandlha ya nkombo ya tirha hi laha ku anameke. Eka Nhlavutelo 1:10, Yohane u ri: “Hi siku ra Hosi, Moya wu ndzi nghenile.” Ndzimana leyi i xilotlelo xa nkoka xo lotlulula ku twisisa ka Nhlavutelo. Yi komba leswaku yi tirha ngopfu-ngopfu eka “siku ra Hosi,” leri sunguleke loko Yesu a ve Hosi hi 1914. Ku twisisa loku ku tiyisiwa hi marungula ya Yesu lama yaka eka mabandlha ya nkombo. Eka wona hi kuma swiga swo tanihi marito lama yaka ePergamo lama nge: “Ndzi ta hatla ndzi ku tela.” (Nhlavutelo 2:16; 3:3, 11) Endzhaku ka 96 C.E., Yesu a nga ‘tangi’ hi ndlela yihi na yihi leyi xiyekaka ku kondza loko a vekiwe exiluvelweni tanihi Hosi hi 1914. (Mintirho 1:9-11) Manuku ke, eku hetisekeni ka Malakia 3:1, hi 1918 u ‘tile’ nakambe, loko a ta etempeleni ya Yehova ku ta avanyisa yindlu ya Xikwembu ku sungula. (1 Petro 4:17) U ta tlhela a ‘ta,’ ku nga ri khale, loko a “rihisela eka lava nga tiviki Xikwembu, ni ka lava nga yingisiki Evangeli ya Hosi ya hina Yesu.”—2 Vatesalonika 1:7, 8; Matewu 24:42-44.

⁷ Hi ri ni leswi emianakanyweni, ha swi twisisa leswaku mabandlha ya nkombo ma fanekisela mabandlha hinkwawo ya Vakriste lava totiweke endzhaku ka 1914, naswona tinyeleti ta nkombo ti yimela vakulu hinkwavo lava totiweke eka mabandlha wolawo. Ku tlula kwalaho, vakulu lava va nga va “tinyimpfu tin’wana” hi xiengetelo, na vona va le vokweni ra xinene ro lawula ra Yesu. (Yohane 10:16) Kutani ndzayo leyi yaka eka mabandlha ya nkombo namunthla yi tirha swinene eka mabandlha hinkwawo ya vanhu va Xikwembu emisaveni hinkwayo, ku katsa ni lama vumbiweke hi Vakriste lava nga ni ntshembo wa laha misaveni.

8. I xiyimo xihi lexi Yesu a xi kumeke loko a tile ku ta kambela lava tivulaka Vakriste hi 1918?

⁸ Loko Yesu a tile a ta kambela lava tivulaka Vakriste hi 1918, u kume Vakriste lava totiweke emisaveni va ri karhi va ringeta hi matimba ku hlayisa marito ya vuprofeta. Ku sukela hi va-1870 a va ri karhi va tsundzuxa vanhu hi nkoka wa lembe ra 1914. Va xaniseke ngopfu emavokweni ya Vujagana hi nkarhi wa nyimpi yo sungula ya misava, naswona hi 1918 ntirho wa vona wu tikombe wu yimile loko vayimeri lava rhangelaka va Sosayiti ya Watch Tower va khotsiwile hi ku hehliwa ka vunwa. Kambe mintokoto ya vona ya nkarhi wolowo yi yelana ni vuprofeta lebyi nga eka Nhlavutelo hi ndlela leyi hlamarisaka. Naswona ku tiyimisela ka vona ko hlayisa marito ya Yesu lama yaka emabandlheni ya nkombo ku va hlawule va ri lava nga hava ku kanakana tanihi Vakriste va ri voxe lava byarheke ku vonakala emisaveni leyi funengetiweke hi munyama. Namuntlha, masalela lawa ya endla ntlawa wa Yohane lowu hanyelaka ku vona ni ku hlanganyela eku hetisekeni ka swiphemu swo tala swa Nhlavutelo.

Ndzayo Ni Ku Bumabumela

9, 10. Xana i ku hetiseka ka marito wahi ya Yesu loku tiseke ntsako lowukulu eka Vakriste va manguva lawa? Hlamusela.

⁹ Eka Nhlavutelo 3:8, eka bandlha ra le Filadelfiya Yesu u te: “Ndzi tiva mintirho ya wena. Vona, ndzi vekile emahlweni ka wena nyangwa leyi pfulekeke, leyi ku nga riki na un’we loyi a kotaka ku yi pfala. Ndza swi tiva leswaku matimba ya wena i matsanana, kambe rito ra mina u ri hlayisile, ni vito ra mina a wu ri landzulanga.” Entiyisweni, Vakriste va le Filadelfiya a va gingiriteka, naswona sweswi nyangwa wa nkarhi a wu va pfulekela.

¹⁰ Ntiyiso wa manguva lawa wa rungula leri wu tsakisa vanhu va Xikwembu swinene. Endzhaku ka mintokoto ya vona yo nonon’hwa hi 1918, va kondleteriwile emoyeni, naswona hi 1919 Yesu u va pfulele nyangwa wa nkarhi. Va nghene hi nyangwa wolowo loko va amukele xileriso xo chumayela mahungu lamanene ya Mfumo ematikweni hinkwawo. Leswi moya wa Yehova a wu ri ehenhla ka vona, a ku nga ri na nchumu lexi a xi ta sivela ntirho lowu, naswona Vakriste lava vo tshembeka va ve ni lunghelo lerikulu ro hetisisa mhaka ya nkoka ya xikombiso xa ku va kona ka Yesu. (Matewu 24:3, 14) Hikwalaho ka ntirho wa vona wo chumayela lowu tshembekeke, masalela ya lava 144 000 ya vitaniwile kutani ya totiwa, naswona “ntshungu lowukulu” wu hlengeletiwile hi tinhlayo letikulu. (Nhlavutelo 7:1-3, 9) Mayana ntsako wonghasi lowu leswi swi wu tiseke eka vanhu va Xikwembu!

11. Mintlawa yi ringete ku thyakisa nhlengeletano ya Yehova esikwini ra Yohane hi ndlela yihi, naswona yi endle tano esikwini ra hina hi ndlela yihi?

¹¹ Xana xi kona lexi nga va tekelaka ntsako lowu? Ina. Hi xikombiso, vakulu va le Pergamo, ku nga khathariseki rhekhodo leyinene ya ku tiyisela, a va swi kotanga ku susa dyondzo ya ntlawa wa Vanikolayiti ebandlheni ra vona. (Nhlavutelo 2:15) Mintlawa a yi tinyika matimba. Hi ku fanana, emasikwini lawa ya makumu hinkwawo, vanhu van’wana va gwinehile naswona va ringete ku thyakisa nhlengeletano ya Yehova. Vakulu hinkwavo va va siverile, kambe, lexi twisaka ku vava, vanhu van’wana va hambukisiwile. Hi nga tshuki hi pfumelela vagwinehi va hi tekela ntsako wa hina!

12. (a) Nkucetelo wa Balama ni wa Yezabele i yini? (b) Xana Sathana u ringetile ku nghenisa nkucetelo wa Balama kumbe wa Yezabele ebandlheni ra Vukriste eminkarhini ya manguva lawa ke?

¹² Yesu u tsundzuxe nakambe bandlha ra le Pergamo ku lwisana ni “lava khomelelaka edyondzweni ya Balama.” (Nhlavutelo 2:14) Xana dyondzo leyi a ku ri yini? Un’wana ePergamo a a thyakisa Vakriste kwalaho hi ndlela leyi fanaka ni leyi Balama a thyakiseke Vaisrayele ha yona emananga: hi ku va khutaza ku “dya swakudya leswi phahleriweke swikwembu swa hava, ni ku endla vuoswi.” (Tinhlayo 25:1-5; 31:8) Yesu u tsundzuxe bandlha ra le Tiyatira ku lwisana na “Yezabele.” Wansati loyi na yena a a dyondzisa Vakriste “ku endla vuoswi ni ku dya swakudya leswi phahleriweke swikwembu swa hava.” (Nhlavutelo 2:20) Xana Sathana u ringetile ku nghenisa nkucetelo wa Balama kumbe wa Yezabele ebandlheni ra Vukriste namuntlha? Kunene u ringetile, lerova kwalomu ka 40 000 hi lembe va tsemiwa, vo tala hikwalaho ka vunghwavava. Oho khombo leronghasi! Vavanuna lava fanaka na Balama ni vavasati lava fanaka na Yezabele va xandzukele vakulu naswona va ringete ku thyakisa bandlha. Onge hi nga alela minkucetelo yo tano leyi thyakeke hi matimba ya hina hinkwawo!—1 Vakorinto 6:18; 1 Yohane 5:21.

13. (a) Hlamusela ku nyenyetseka ka Yesu ehenhleni ka ku kufumela. (b) Ha yini Valawodikiya a va kufumela, naswona hi nga ku papalata njhani ku tsana loku namuntlha?

¹³ Eka Nhlavutelo 3:15, 16, ebandlheni ra le Lawudikiya Yesu u te: “Ndzi tiva mintirho ya wena, ni leswaku a wu titimeli, a wu hisi. Mawaku loko onge wa titimela, kumbe wa hisa! Kambe leswi u kufumelaka, u nga hisiki, u nga titimeliki, ndzi ta ku kampfula enon’wini wa mina.” Vona nhlamuselo leyi twalaka swonghasi ya ku nyenyetseka loku Yesu a ku twaka ehenhleni ka ku kufumela! U ya emahlweni a ku: “Hikuva u ri: ‘Ndzi mufuwi, ndzi humelerile, a ndzi pfumari nchumu.’” Ina, rifuwo a ri hambukise Vakriste eLawodikiya. A va tianerisile naswona va nga lavi ku twa nchumu. Kambe Yesu u te eka vona: “A wu tivi leswaku u mutsandzeki, u le khombyeni, u xisiwana, u file mahlo, a wu ambalanga nchumu.” (Nhlavutelo 3:17) Xana ha swi lava ku va ‘vatsandzeki, hi va ekhombyeni, hi va swisiwana, hi fa mahlo, hi va lava nga ambalangiki nchumu’ emahlweni ka Yesu? Kavula a hi swi lavi! Kutani a hi lwisaneni hi matimba ni ku va lava fuweke kumbe lava kufumelaka.—1 Timotiya 6:9-12.

Tiyiselani Ku Fika eMakumu

14. (a) I ku nonon’hwa kwihi loku bandlha ra le Smirna a ri kongomane na kona? (b) I ku fana kwihi ka manguva lawa loku nga kona eka mintokoto ya le Smirna?

¹⁴ Bandlha leri a ri nga kufumeli a ku ri leriya ra le Smirna. Eka Vakriste lava, Yesu u te: “Ndzi tiva maxangu ya wena ni vusiwana bya wena (kambe u mufuwi!), ndzi tiva ni ku sandziwa ka wena hi lava va tivulaka Vayuda, kasi a hi vona, kambe i va Sinagoga ya Sathana. U nga chavi leswi nga kusuhi ni ku ku twisa ku vava. Vona, Diyavulosi u lava ku hoxa van’wana va n’wina ekhotsweni, leswaku mi ta ringetiwa, kutani mi ta heta khume ra masiku ma ha xaniseka.” (Nhlavutelo 2:8-10) Leswi swi yelana swonghasi ni ntokoto wa Vakriste namuntlha! Vakriste va manguva lawa, lava totiweke ni lava va tinyimpfu tin’wana, na vona va tiyisele nkaneto wa matimba wo huma eka “Sinagoga ya Sathana,” Vujagana. Ku sukela eka nyimpi yo sungula ya misava ku fikela sweswi, magidi ya vavanuna, vavasati ni vana va biwile, va khotsiwile, va xanisiwile, va pfinyiwile kumbe ku dlayiwa hikwalaho ka ku ala ku landzula vutshembeki bya vona.

15, 16. (a) Vakriste lava totiweke va nga tsaka hi ndlela yihi ku nga khathariseki ku karhatiwa hi nxaniso? (b) Xana i tihakelo tihi to hlawuleka leti yimeleke tinyimpfu tin’wana leti ti pfunaka leswaku na tona ti tsaka?

¹⁵ Xana mintokoto yo tano yi tisa ntsako? Hayi eka yona hi yoxe. Kambe ku fana ni vaapostola, Vakriste lava tiyiselaka miringo va tokota ntsako lowukulu wa le ndzeni hikuva “va kumiwile va ri lava fanelaka ku soriwa hikwalaho ka vito ra Yesu.” (Mintirho 5:41) Kutani va tshama va tsakile ku nga khathariseki yini na yini lexi valala va vona va xi endlaka eka vona hikuva va swi tiva leswaku nkarhi lowu vekiweke wa leswaku vutshembeki bya vona byi hakeriwa wu kusuhi, naswona hakelo ya kona entiyisweni i yikulu. Eka Vakriste va le Smirna Yesu u te: “U va la tshembekaka ku fikela eku feni, kutani mina ndzi ta ku nyika harhi ya vutomi.” (Nhlavutelo 2:10) Naswona eka lava nga eSarda u te: “Loyi a hlulaka, u ta ambexiwa hi mukhuva wolowo, tinguvu leto basa. A ndzi nga suli vito ra yena ebukwini ya vutomi.”—Nhlavutelo 3:5.

¹⁶ I ntiyiso, switshembiso leswi swi tirha hi ku kongoma eka Vakriste lava totiweke, swi va tsundzuxa hi hakelo ya vutomi lebyi nga hava ku fa bya le tilweni lebyi va yimeleke. Kambe lava va nga va tinyimpfu tin’wana na vona va tiyisiwa hi marito lawa. Yehova u na hakelo leyi lunghiseleriweke vona, ntsendze loko va chivirika ni ku tiyisela. Va na ku langutela loku vangamaka ka ku dya ndzhaka ya vutomi lebyi nga heriki emisaveni ya paradeyisi ehansi ka Mfumo lowu nga emavokweni ya Kriste. Kwalaho va ta kuma Paradeyisi leyi vanhu va misava va nga ta tsandzeka ku yi kuma.

17. Yesu u hetelele rungula rin’wana ni rin’wana hi marito wahi, naswona marito ya yena ma vula yini eka hina namuntlha?

¹⁷ Yesu u hetelele rin’wana ni rin’wana ra marungula lawa yaka emabandlheni hi marito lama nge: “Loyi a nga ni tindleve, a a yingise leswi moya wu swi byelaka [mabandlha].” (Nhlavutelo 3:22) Ina, hi fanele ku twa ni ku hlayisa marito ya Murisi Lonkulu. Hi fanele ku fularhela swa thyaka ni vugwinehi, naswona hi fanele ku hlayisa ku chivirika ka hina. Ku kuma ka hina hakelo swi tiseketele hi kona. Naswona loko hi xiya rungula leri hambetaka eka Nhlavutelo, hi tiyimisela swinene ku endla tano ntsena.

Swilemo Swa Buku

18. (a) Yesu u kuma yini ehubyeni ya le tilweni? (b) Ku khandziya ka vagadi vanharhu va tihanci ta Nhlavutelo ndzima 6 ku vula yini eka vanhu lava hanyaka namuntlha?

¹⁸ Eka tindzima 4 na 5, hi xikombiso, Yohane u vone xivono xo hlamarisa xa huvo ya Yehova ya le tilweni. Yesu Kriste, Xinyimpfana xa Xikwembu, u le hubyeni ya kona, naswona u amukela buku leyi nga ni swilemo swa nkombo. Eka ndzima 6, Yesu u pfula tsevu eka swilemo swa nkombo, hi ku landzelelana. Loko ku pfuriwa xo sungula, ku voniwa mugadi wa hanci yo basa. U nyikiwa harhi naswona a khandziya ‘a ri karhi a hlula ni ku hetisisa ku hlula ka yena.’ (Nhlavutelo 6:2) Loyi i Yesu, Hosi leyi ya ha ku nyikiwaka harhi ya vuhosi. Loko a sungule ku khandziya ka yena loku hlulaka, ka vuhosi hi 1914, siku ra Hosi ri sungurile. Loko ku pfuriwa swilemo swinharhu leswi landzelaka, ku humelela tihanci tin’wana tinharhu ni vakhandziyi va tona. Leswi i swikombiso leswi chavisaka, leswi yimelaka tinyimpi ta vanhu, ndlala ni rifu ra ntungu ni swivangelo swin’wana. Swi tiyisa vuprofeta lebyikulu bya Yesu bya leswaku ku va kona ka yena ka le tilweni evuhosini ku ta funghiwa emisaveni hi tinyimpi letikulu, tindlala, mintungu, ku tsekatseka ka misava ni timhangu tin’wana. (Matewu 24:3, 7, 8; Luka 21:10, 11) Entiyisweni, Vakriste va fanele ku hlayisa marito ya Yesu lama yaka eka mabandlha ya nkombo loko va ta tiyisela enkarhini lowu.

19. (a) Hi nkarhi wa ku va kona ka Kriste, i hakelo yihi leyi nyikiwaka Vakriste vo tshembeka lava totiweke lava ana se va feke? (b) I swiendlakalo swihi leswi tsemaka nhlana leswi faniseriwaka hi ku pfuriwa ka xilemo xa vutsevu, leswi yisaka eka xivutiso xihi?

¹⁹ Eku pfuriweni ka xilemo xa vuntlhanu, ku paluxiwa xiendlakalo exivandleni xa moya lexi nga vonakiki. Vakriste lava totiweke lava feleke ripfumelo ra vona un’wana ni un’wana u nyikiwa nguvu leyo basa. Entiyisweni, leswi ku va kona ka Kriste sweswi ku nga ntiyiso, ku pfuka ka le tilweni ku sungurile. (1 Vatesalonika 4:14-17; Nhlavutelo 3:5) Manuku xilemo xa vutsevu xi pfuriwile, naswona “misava,” mafambiselo ya swilo ya misava ya Sathana, yi dzinginisiwa hi ku tsekatseka lokukulu ka misava. (2 Vakorinto 4:4) “Matilo” ya ku fuma ka vanhu lava nga ehansi ka vulawuri bya Sathana ma songiwa tanihi buku ya khale, leyi faneleke ku cukumetiwa. Vanhu lava nga ni nchavo, lava xandzukeke va huwelela hi gome eka maribye va ku: “Hi weleni henhla, mi hi funengeta leswaku loyi a tshameke exiluvelweni a ta kala a nga hi voni, ni vukarhi bya Xinyimpfana byi ta kala byi nga hi fikeli. Hikuva siku lerikulu ra vukarhi bya vona ri fikile, kutani i mani loyi a nga ri tiyelaka xana?”—Nhlavutelo 6:13, 14, 16, 17.

20. I mani loyi a nga yimaka hi nkarhi wa siku lerikulu ra vukari bya Yehova ni bya Xinyimpfana?

²⁰ Naswona i mani loyi a nga ri tiyelaka? Kunene, Yesu ana se u xi hlamurile xivutiso xexo. Lava va ‘yingisaka leswi moya wu swi byelaka mabandlha’ va ta yima esikwini rero lerikulu ra vukari. Naswona ku tiyisa leswi, Yohane u ya emahlweni a vona ku lemiwa ka vo hetelela va lava 144 000 ni ku hlengeletiwa ka ntshungu lowukulu lowu humaka ematikweni hinkwawo leswaku wu pona “nhlomulo lowukulu.” (Nhlavutelo 7:1-3, 14) Kambe sweswi i nkarhi wa ku pfuriwa ka xilemo xa vunkombo xa buku ni swivono swin’wana leswikulu leswi faneleke ku kombiwa Yohane naswona, hi ku tirhisa yena, swi kombiwa hina namuntlha. Xihloko lexi landzelaka xi hlamusela swin’wana swa leswi.

Wa Tsundzuka Xana?

◻ Hi byihi vuxaka exikarhi ka Yesu ni vakulu va bandlha?

◻ I swiphiqo swihi leswi kongomaneke ni vakulu va le Pergamo ni le Tiyatira, naswona swiphiqo leswi fanaka swi ma khumbe njhani mabandlha namuntlha?

◻ I xihoxo xihi lexikulu lexi bandlha ra le Lawodikiya ri xi endleke, naswona hi nga papalata njhani ku endla xihoxo lexi fanaka namuntlha?

◻ Vakriste a va fanele ku tiyisela njhani eka lembe xidzana leri ra vu-20, naswona hi swihi switshembiso swa Yesu leswi va pfuneke ku endla tano?

◻ Hi nga ri papalata njhani gome ni tingana leswi nga ta tokotiwa hi matiko eArmagedoni?

[Swifaniso leswi nga eka tluka 13]

Van’wana va Vakriste vo tshembeka lava xanisekeke etikampeni ta Nazi

[Xihlovo Xa Kona]

DÖW, Vienna, Austria