‘Hambetani Mi Ololoxeka’

“XANA wa tiyiseka leswaku hi ta humelela?” Mukhandziyi u yise xivutiso xa yena eka mufambisi wo sungula wa xikepe. Loko xikepe lexintsongo xi phewa ni ku lawuriwa hi magandlati ya Kapa lama dumeke ya Atlantic Dzonga, eka yena swi tikombe onge a ku ta va singita leswaku va fikelela eka thonsi lerintsongo emepeni leri a ku ri laha a va ya kona.

Kutani mufambisi wo sungula u n’wi rhambele endhawini ya mulanguteri ivi a n’wi hlamusela hi mintirho ya michini yo tluta ha yona—swikomba-matlhelo, xikomba-swilo, swikombiso swa swiamukeri swa satellite, naswona hambi ku ri xipima-mpfhuka lexi tolovelekeke. Hambi leswi tinhlamuselo ta vuthekiniki a a nga ti twisisi kahle, u swi kotile ku twisisa nawu wa xisekelo wo tluta: ndzulamiso wa ndlela. Hi ku pfuniwa hi xitlutisi xa yena, mulawuri a a ta hlangavetana ni minsusumeto ya minkhuluko ya lwandle ni moya hi ku endla ku ololoxa nkarhi na nkarhi. Handle ka ku ololoxa ko tano, a va ta hambana ni laha a va ya kona hi tikhilomitara to tala swinene.

Vakriste va fana ni swikepe elwandle ra vumunhu. Pakani ya hina i ku ‘kumiwa hi Yehova eku heteleleni hi nga ri na xivati ni xisandzu, naswona hi ri ni ku rhula.’ (2 Petro 3:14) Kambe ku fana ni xikepe, ku ni minsusumeto—ya le ndzeni ni le handle—leyi lavaka ku hi humesa endleleni. Kutani ke, ma fanela swonghasi marito ya muapostola Pawulo lama yaka eka Vakorinto: ‘Leswi hi swi kombelaka, hileswaku mi ololoxeka. Hambetani mi ololoxeka.’—2 Vakorinto 13:9, 11.

Leswi Ku Ololoxa Ku Swi Katsaka

Rito ra Xigriki leri laha ri hundzuluxeriweke ri ku “ku ololoxa” ri vula ku tisa nchumu “eka xiyimo lexinene.” (Vona nhlamuselo ya le hansi ya Reference Bible.) Eka matsalwa man’wana ya Bibele, ri tirhisiwa ku hlamusela ku tlherisela nchumu eka xiyimo lexinene. Hi xikombiso, eka Matewu 4:21, rito leri fanaka ri tirhisiwa ku hlamusela ku “lunghisa” tinkoka. (Kingdom Interlinear) Kutani ke, swi vula yini leswaku Vakriste va ololoxeka?

Xiya Vakriste va le Korinto lava Pawulo a a tsalela vona. Eka papila leri hundzeke leri yaka eka vona, Pawulo u boxe swiyimo swo hlaya leswi nga riki swinene leswi a swi ri kona ebandlheni: mimpambukwa, ku tiyiseleriwa ka vunghwavava, swikombelo swa milawu exikarhi ka vamakwerhu, ku nga xiximi Xilalelo xa Hosi, naswona hambi ku ri minhlangano ya mpfilumpfilu. (1 Vakorinto 1:10-13; 5:1; 6:1; 11:20, 21; 14:26-33) Xisweswo Vakorinto a va fanele ku ‘lunghisa’ xiyimo kwalaho, ku nga ku xi ‘twananisa’ ni misinya ya milawu ya Xikwembu.

Papila ra vumbirhi ra Pawulo leri yaka eka vona ri komba leswaku va swi endlile. (2 Vakorinto 7:11) Hambi swi ri tano, Pawulo a a swi tiva leswaku mintshikilelo ya misava, ya Sathana ni ya mimboyamelo ya vona ya nyama a yi ta hambeta yi va humesa endleleni nkarhi na nkarhi. Hikwalaho, u va tsundzuxe hi laha ku faneleke leswaku va ‘hambeta va ololoxeka.’

Xilaveko Xo Ololoxeka Namuntlha

Timbhoni ta Yehova namuntlha hi ku fanana ti fanele ku hambeta ti ololoxeka. Sathana Diyavulosi u ‘lwa’ na hina, a tirha hi ku hiseka leswaku a herisa vutshembeki bya hina. (Nhlavutelo 12:17; Vaefesa 6:12) Nakambe hi rhendzeriwe hi mafambiselo ya swilo ya misava hinkwayo lama tirhaka “ehansi ka ndhuna leyi fumaka mimoya.” Vatirhi-kulorhi ni vadyondzi-kulorhi exikolweni va nga va vanhu lava ‘hanyaka hi ku pfumelelana ni ku navela ka nyama ya vona, va endla swilo leswi rhandziwaka hi nyama.’ (Vaefesa 2:2, 3) Nakambe hi na nyimpi ya nkarhi na nkarhi ni mimboyamelo ya vudyoho leyi kumiweke hi ndzhaka. (Varhoma 7:18-25) Handle ka ku ololoxa ka nkarhi na nkarhi, hi nga humesiwa endleleni hi ku olova.

Ntokoto wa muapostola Petro wu kombisa leswi kahle. Endzhaku ko kombisa kahle Yesu tanihi “Mesiya, N’wana wa Xikwembu lexi hanyaka,” Petro u bumabumeriwe hi marito lawa: “U katekile Simoni n’wana Yona, hikuva a hi munhu wa misava la nga ku pfuletela sweswo, kambe i Tata wa mina wa le tilweni.” (Matewu 16:16, 17) Entiyisweni, ku ehleketa ka Petro a ku ri endleleni. Hambi swi ri tano, enkarhini lowu hlanganisiweke hi tindzimana ta tsevu leti landzelaka, a a fanele a tshinyiwa hi matimba hi Yesu! Loko a twile leswaku Kriste a a ta “twisiwa ku vaviseka lokukulu . . . a dlawa,” Petro u khutaze Yesu: “[Titsetseleli], we Hosi! Swilo leswi, swi nga ka swi nga ku humeleri.” Yesu u hlamule hi xihatla a ku: “Suka ka mina Sathana! U xikhunguvanyiso eka mina, hikuva a wu ehleketi swa Xikwembu, u ehleketa swa vanhu ntsena.”—Matewu 16:21-23.

Petro a a ehleketa hi mavonelo ya swa nyama. Miehleketo ya yena ni langutelo swi lave ku ololoxiwa. Xana leswi fanaka a hi ntiyiso eka hina hinkwerhu nkarhi na nkarhi? Xana a hi voyamelanga eku voneni swilo hi langutelo ra hina vini ematshan’wini ya langutelo ra Xikwembu? Kutani ke, hi minkarhi hinkwayo hi fanele ku ololoxiwa. Ku fana ni xikepe elwandle, ku ololoxa ko tano minkarhi yin’wana ku nga va kuntsongo, ku nga ri ka nkoka. Kambe ku nga vula ku hambana exikarhi ka ku fika laha hi yaka kona ni ku tokota ku tshoveka ka xikepe ka moya. Hakunene, ku ololoxa kuntsongo sweswi ku nga sivela ku endla ku ololoxa lokukulu—kumbexana loku vavaka—endzhaku.

Mimpimanyeto Ya Xikwembu

Loko switlutisi swa xikepe swi nga lunghisiwanga kahle, mindzulamiso leyi faneleke ya ndlela a yi nge endliwi. Hi ku fanana, loko hi ta hlayisa vutomi bya hina endleleni, hi fanele ku kuma vukongomisi lebyi pakanisaka bya Rito ra Xikwembu, Bibele. “Matsalwa lawa hinkwawo ma huhutiwile hi Xikwembu, ma pfuna ku dyondzisa, ni ku laya, ni ku ololoxa.” (2 Timotiya 3:16) Rito rero leri huhuteriweke ri andlala mimpimanyeto ya Xikwembu ya mahanyelo ni ku ehleketa. Ku ri hlaya nkarhi na nkarhi i swa nkoka eku landzeleni ka “tindlel[a] le’to lulama.”—Psalma 23:3.

Nkongomiso wun’wana wu huma eka ntlawa wa “nandza la tshembekaka, wo tlhariha,” wa Vakriste lava totiweke. Lava va pfuniwe hi moya wa Yehova leswaku va twisisa ku rhandza ka yena hi laha ku humelelaka. (Matewu 24:45-47; Swivuriso 4:18) Xisweswo, loko nkongomiso wu ta wu huma eka nhlengeletano ya Yehova, hi vutlhari hi nga tinyiketa eka wona, hi swi tiva kahle leswaku Yehova u ta hi fambisa hi ndlela leyi nga ta hi pfuna hi laha ku nga heriki.—Esaya 48:17.

Hambi swi ri tano, hi minkarhi yin’wana hi lava mpfuno wa munhu hi xiyexe leswaku hi tshama hi ri endleleni. Pawulo u khutazile eka Vagalatiya 6:1: “Vamakwerhu, naloko un’wana a kumiwa a ri karhi a endla xihoxo, n’wina lava mi nga va Moya, n’wi vuyiseni hi moya wa musa.” Vakulu ni malandza ya vutirheli va le xikarhi ka lava va nga ni timfanelo to tano ta swa moya. Hakanyingi va ta hi kombisa hi ku kongoma ndhawu yo karhi leyi hi faneleke ku ololoxa eka yona.

Matshalatshala Lama Lavekaka

A hi minkarhi hinkwayo swi olovaka ku endla ku cinca loku faneleke evuton’wini bya hina. Nakambe xiya Petro. Tanihi leswi a tswariweke a ri Muyuda, Petro u kule a hlanganyela eka langutelo leri hangalakeke, leri hoxeke ra vanhu va tinxaka tin’wana. Hi laha a byeleke Korneliyo wa Matiko ha kona: “Ma swi tiva swinene leswaku swa yila eka Muyuda ku endzela munhu wa rixaka rin’wana kumbe ku tshama na yena.” Hambi swi ri tano, endzhaku ko swi xiya leswaku a ku ri ku rhandza ka Xikwembu leswaku a avelana ntiyiso wa Vukriste ni wanuna loyi ni ndyangu wa yena, Petro u hetelele hi ku: “Ndza twisisa swinene sweswi leswaku Xikwembu a xi yi hi nghohe; kambe, ematikweni hinkwawo, loyi a xi chavaka a vuya a endla leswi lulameke, xa n’wi tsakela.”—Mintirho 10:28, 34, 35.

Petro u ve ni ku cinca loku hlamarisaka eka ku ehleketa ni langutelo ra yena ehenhla ka tinxaka tin’wana! Kambe handle ko kanakana a ku ri na xilaveko xa leswaku a hambeta a ololoxiwa emhakeni leyi, hikuva malembenyana endzhaku, Petro u tinyikete eka ntshikilelo wa tintangha kutani a sungula ku sola vapfumeri Vamatiko. Muapostola Pawulo u boheke ku n’wi tshinya, a tirhisa marito ya matimba ku n’wi pfuna leswaku a ololoxa ku ehleketa ka yena hi laha ku engetelekeke!—Vagalatiya 2:11-14.

Hi ku fanana namuntlha, Mukriste a nga ha va a kule a lwisana ni xisekelo xa xihlawuhlawu. Endzhaku ka ku ta entiyisweni, hi mianakanyo a nga swi amukela leswaku Xikwembu a xi yi hi nghohe kambe a kala a ha namarhela eka mintlhaveko ya mboyamelo wa ku ya hi nghohe. Hambi loko a nga va ni rivengo eka lava va rixaka rin’wana, hi ku olova a nga vula leswaku va na timfanelo leti nga tsakisiki hikwalaho ka ndzhaka ya vona ya rixaka. A nga ringa ku tiyisela ka vona hi ku va vungunya kumbe hi marito ya rixaka leswi hakanyingi swi kokelaka nyingiso eka rixaka, kumbe ku hambana ka rixaka. A nga tlhela a ala xitsundzuxo xa moya xa Mukriste-kulobye, loyi hikwalaho ko pfumala nkateko hi tlhelo ra dyondzo kumbe xikhundla, a tsandzekaka ku tiphofula hi ndlela yo karhi. Handle ko kanakana, swi ta lava matshalatshala ya xiviri leswaku munhu wo tano a ololoxa ku ehleketa ka yena ku twanana ni ka Yehova!a

Kambe hambi loko mphikamakaneta yi ri rivengo ra rixaka, ku rhandza swilo leswi vonakaka, ku katseka eka vunghana exikolweni ni le ntirhweni, kumbe xilaveko xo va kona emihlanganweni ya Vukriste, hi fanele ku amukela nkongomiso lowu nyikeriwaka hi Rito ra Xikwembu ni nhlengeletano ya xona. A hi fanelanga ku vona onge ndzayo leyi nga ni nkoka ya Matsalwa a yi tirhi eka hina kutani hi yi honisa. Tsundzuka leswaku Vaisrayele lava nga tshembekangiki va te: “Ndlela ya Yehova a yi lulamanga.” Xana a hi hina lava faneleke ku ololokela eka tindlela ta Yehova?—Ezekiel 18:25.

Ha tsaka leswi Yehova a yi khathalelaka swinene ndlela leyi hi fambaka emahlweni ka yena ha yona, a nyikela ndzulamiso wa nkarhi na nkarhi eka vanhu va yena. Swi hi laha Esaya a profeteke ha kona a ku: “Kutani tindlev̌e ta wena ti ta twa rito e nḍaku ka wena, ri ku: Ndlela hi leyi, fambani ha yona, mi nga yi hi ra šinene, kumbe hi ra šimaṭi!” Eka tlhelo ra hina, onge hi nga amukela nkongomiso wo tano wa rirhandzu lowu humaka eka Yehova kutani hi va ni “ku yingisela.” (Esaya 30:21; Yakobo 3:17) Ina, a hi hambeteni hi ololoxiwa leswaku ndlela ya hina yi ta hi yisa eka pakani ya vutomi lebyi nga heriki hi musa wa Xikwembu!

[Nhlamuselo ya le hansi]