Ku Avanyisa Ka Makumu
“LOKO u fa, moya-xiviri wa wena wu ta xanisiwa wu ri woxe; koloko ku ta va ku ri tihele eka wona: kambe hi siku ra ku avanyisa miri wa wena wu ta hlangana ni moya-xiviri wa wena, kutani u ta tokota tihele timbirhi, moya-xiviri wa wena wu dzuka manthonsi ya ngati, naswona miri wa wena wu tala hi mahlomulo.”
LESWI hi leswi muchumayeri C. H. Spurgeon wa lembe xidzana ra vu-19 a ri hlamuserisaka xiswona vonelo ra vafundhisi hi siku ra ku avanyisa ni minxaniso ya lava rhukaniweke. Mutivi wa vuxongi wa Muntariyana Michelangelo a a ri ni ntshembo lowo chavisa lowu fanaka, hi laha swi voniwaka exifanisweni xa yena lexi nge: “Ku Avanyisa Ka Makumu,” (xiphemu xa leswi kombisiweke nakambe laha henhla) ekhumbini ra kereke ya Sistine le Rhoma. The New Encyclopædia Britannica yi ri hi xifaniso lexi: “Kriste eku Avanyiseni i xikwembu lexi hokolokaka ematshan’wini ya muponisi wa Vakriste, u khomeke swinene hi ku rhuketela rixaka ra vanhu ku tlula ku amukela lava katekeke etilweni.”
Dyondzo Ya Vujagana
Eka malembe xidzana lama hundzeke, siku ra ku avanyisa ni ndzilo wa tihele a a ku ri tinhloko-mhaka leti rhandziwaka etidyondzweni. Loko va ri eswitshan’weni swa vona, vachumayeri vo tanihi C. H. Spurgeon va hokolokile hi tinhlamuselo ta swifaniso swa minxaniso leyi chavisaka leyi yimeleke vadyohi. Namuntlha, ku chumayela ko tano a ka ha twiwi ngopfu. Kambe ndzilo wa tihele ni ku avanyisa ko hetelela ka ha ri tidyondzo ta ximfumo etikerekeni to tala.
Vukhongeri byo tala bya Vujagana ngopfu-ngopfu byi pfumelelana swinene ni dyondzo ya Rhoma Khatoliki ya leswaku ku avanyisa ka Xikwembu ku ta hi swiphemu swimbirhi. Xo sungula, ku na ku “avanyisa loku hlawulekeke.” Loko munhu a fa, moya-xiviri wa yena lowu ku vuriwaka leswaku a wu fi, wu avanyisiwa hi xihatla kutani wu hundziseriwa eka vutomi lebyi nga heriki ku nga ha va etiheleni kumbe etilweni.a Kutani ku landzela ku avanyisa ka makumu, kumbe loku tolovelekeke, enkarhini wa makumu loko mimiri ya vafi yi pfuxiwa kutani yi hlanganisiwa ni mimoya-xiviri ya yona leyi nga fiki.
Hi siku leri ra ku avanyisa, le tilweni mimoya-xiviri yi tshama kona kutani yi hlanganisiwa ni mimiri leyi nga endliwa leyi nga ha boriki. Lava xanisekaka etiheleni va tshama kwalaho na vona, naswona mimoya-xiviri ya vona na yona yi hlanganisiwa ni mimiri ya vona leyi pfuxiweke, leyi nga ha boriki. Hi ku ya hi van’wana, leswi swi vangela ku xaniseka ka vona ku va lokukulu swinene. Lava va ha hanyaka tanihi vanhu a va fi. Va avanyisiwa va ri karhi va hanya ni ku famba-famba, “miri ni moya-xiviri” hi ndlela yo fanekisela swi kongoma etilweni kumbe etiheleni.
Ku tiyiselela minxaniso leyi nga vulekiki endzilweni wa tihele ku endle nhloko-mhaka hinkwayo ya ku avanyisa ka makumu emavokweni ya Yesu Kriste yi va nchumu lowu chavisaka ku anakanya ha wona. Hikwalaho ka leswi, xana u nga hlamarisiwa ku tiva leswaku, entiyisweni, ku avanyisa ka Xikwembu hakanyingi ku tisa ntsako ni leswaku Siku ra ku Avanyisa ri ta va rin’wana ra minkarhi yo tsakisa swinene ematin’wini hinkwawo ya munhu? Xana leswi swi nga endlekisa ku yini?
[Nhlamuselo ya le hansi]
a Makhatoliki ya Rhoma nakambe ya pfumela leswaku ku na kun’wana ka vunharhu: nxupulo wa nkarhinyana epagatori emahlweni ka ku nghena ra makumu etilweni.
[Laha Xifaniso Xi Humaka Kona eka tluka 3]
Random/Sipa Icono