Ku Khuvuriwa “eVitweni Ra”

NKAMBISISO wa magidi-gidi ya matsalwa ya khale ya tiko, ya maphepha ya papyrus, lama kumiweke esaveni ra le Egipta eku sunguleni ka lembe xidzana leri hakanyingi wu ma hlamusela kahle Matsalwa ya Vukreste ya Xigriki. Njhani? Hi ku xiya ndlela leyi marito man’wana ma tirhisiweke ha yona, hi leteriwa leswaku hi twisisa hi laha ku kongomeke marito lama fanaka eka mavekelo ya wona ya Matsalwa.

Xikombiso xin’wana hi loko Yesu a ku “hi vito ra” loko a lerisa vadyondzisiwa va yena a nga si ya etilweni: “Hikokwalaho, yanani eka vamatiko hinkwavo, mi va endla vadyondzisiwa va mina, mi va khuvula hi vito ra Tatana, ni ra N’wana, ni ra Moya lowo Kwetsima.” Yesu a a vula yini?—Matewu 28:19.

Vadyondzi va kume leswaku ematsalweni ya tiko, xiga lexi nge “hi vito ra” kumbe “evitweni ra” (Kingdom Interlinear), xa tirhisiwa loko ku vuriwa ku hakela “xikweleti xa un’wana ni un’wana.” Profesa wa ntivo-vukwembu Dr. G. Adolf Deissmann u pfumele leswaku hikwalaho ka vumbhoni bya ku kambisisiwa ka matsalwa ya papyrus, “mhaka leyi seketelaka . . . tinhlamuselo ta ku khuvula evitweni ra Hosi, kumbe ku pfumela evitweni ra N’wana wa Xikwembu, hi leswaku nkhuvulo kumbe ripfumelo ri kombisa ku va wa Xikwembu kumbe N’wana wa Xikwembu.”—Xi-italiki i xa Deissmann.

Lexi tsakisaka, xiga lexi fanaka xi tirhisiwe hi Vayuda va le nkarhini wa Yesu, hi laha swi hlamuseriwaka ha kona eka Theological Dictionary of the New Testament: “Ku yimbisiwa ka vaproselita ku endliwa . . . ‘hi vito ra muproselita,’ leswaku a ta amukeriwa eka Vuyuda. Ku yimbisiwa loku ku endliwa . . . ‘hi vito ra ntwanano,’ leswaku a amukeriwa entwananweni.” Hikwalaho ka sweswo vuxaka bya sungula naswona loyi a nga riki Muyuda u va muproselita ehansi ka vulawuri bya ntwanano.

Kutani eka Vakreste, ku khuvuriwa loku taka endzhaku ko tinyiketa ku sungula vuxaka bya le kusuhi na Yehovha Xikwembu, ni N’wana wa yena Yesu Kreste, ni moya lowo kwetsima. La hundzukeke u xixima vulawuri bya vona endleleni ya yena leyintshwa ya vutomi. Xiya ndlela leyi leswi swi nga tano ha yona eka leswinharhu leswi swi boxiweke.

Hi ku xixima vulawuri bya Xikwembu, hi tshinela ekusuhi na xona hi va ni vunghana na xona. (Vaheveru 12:9; Yakobo 4:7, 8) Hi va vanhu va Xikwembu tanihi malandza ya xona, lama xaviweke hi ntsengo wa gandzelo ra nkutsulo ra Yesu Kreste. (1 Vakorinto 3:23; 6:20) Muapostola Pawulo u byele Vakreste va lembe xidzana ro sungula leswaku i va Yesu Kreste, ku nga ri munhu un’wana loyi a nga vaka a va yisele ntiyiso. (1 Vakorinto 1:12, 13; 7:23; ringanisa Matewu 16:24.) Ku khuvuriwa hi vito ra N’wana swi vula ku xiya mhaka leyi, ku amukela Yesu tanihi “ndlela, ni ntiyiso, ni vutomi.”—Yohane 14:6.

Moya lowo kwetsima na wona i wa nkoka eka vuxaka bya hina lebyinene na Yehovha na Yesu Kreste. Ku khuvuriwa hi vito ra moya lowo kwetsima swi komba leswaku hi xiya leswi moya wu swi endlaka loko Xikwembu xi tirhisana na hina. Hi lava ku landzela vuleteri bya wona, hi nga honisi kumbe ku endla leswi hambaneke na wona, ku wu sivela leswaku wu nga tirhi eka hina. (Vaefesa 4:30; 1 Vatesalonika 5:19) Ku nga vonaki ka moya a ku nonon’hwisi nchumu malunghana ni matirhiselo kumbe nhlamuselo ya wona, hi laha mavekelo lama nge “hi vito ra ntwanano” ma twisisiweke hi ku olova ha kona eka Vuyuda.

Hikokwalaho, hi nkarhi wo tinyiketa ni nkhuvulo hi fanele hi anakanyisisa leswi lavekaka eka vuxaka bya hina lebyintshwa hi xikhongelo. Swi lava hi titsongahatela ku endla ku rhandza ka Xikwembu, loku kombisiweke eka xikombiso ni le lunghiselelweni ra nkutsulo wa Yesu Kreste, loku faneleke ku endliwa hi ku pfuniwa hi moya lowo kwetsima tanihi leswi wu kongomisaka malandza hinkwawo ya Xikwembu hi rirhandzu ni vun’we emisaveni hinkwayo.