Ma Rhambiwa eNtsombanweni Wa Muganga Wa “Ku Xixima Xikwembu”!

INA, nkarhi wa mitsombano ya muganga ya Timbhoni ta Yehovha ya 1994 wu tshinele. Ku sukela hi June 1994 ku fikela hi January 1995, xiyimiso xa ntsombano wa masiku manharhu xi ta va xi twiwa eka madzana ya madoroba emisaveni hinkwayo—ku sungula eAmerika N’walungu, ku landzela eVuxeni ni le Vupela-dyambu bya Yuropa, Asia, ni le Amerika Xikarhi na Dzonga, Afrika, Australia ni le swihlaleni-ntsongo swa le lwandle.

Vona nhloko-mhaka leyi ntlhontlhaka mianakanyo swonghasi—“Ku Xixima Xikwembu”! Loku a hi ku chava ko rhurhumela ka munhu loyi vutomi bya yena byi nga ekhombyeni, kambe i ku xixima Xikwembu, xichavo lexi tisaka ku rhula ka mianakanyo ni ntsako. Xivuriso xa Bibele xi ri: “Hakelo ya ku tiṭongahata ni ya ku tšhav̌a Yehova, i rifuwo, ni ku kwetsima, ni v̌utomi.” (Swivuriso 22:4) Xana ku chava Xikwembu ku nga ri tisa njhani “rifuwo ni ku kwetsima, ni v̌utomi”? Sweswo swi ta va erivaleni loko xihloko xa ntsombano xi ri karhi xi ndlandlamuxiwa hi nkarhi wa masiku manharhu lama nga ta va matele hi tinkulumo, mimbulavurisano, minkombiso ni drama.

Muapostola Pawulo u tsale leswaku hi nga ‘tshiki ku hlengeletana ka hina ndhawu yin’we.’ (Vaheveru 10:25) Timbhoni ta Yehovha ti swi teka swi ri swa nkoka, ti hlangana kanharhu hi vhiki eka dyondzo ya vandlha ni vugandzeri. Hambi swi ri tano, ntsombano wa muganga wa lembe na lembe i wa nkoka swinene. Va wu langutela hi mahlo-ngati ni ku tama va vulavula ha wona tin’hweti endzhaku ka wona. Hi mbilu yo basa ha ku rhamba ku nga khathariseki vukhongeri bya wena, ku va la hlanganaka na vona eka ntsombano wa vona kutani u tsakela vuxaka bya Vukreste ni ku kuma swiletelo swa moya swa nkoka. Xirho xa vandlha ra kwalaho ra Timbhoni ta Yehovha xi ta swi tsakela ku ku byela laha ntsombano wa le kusuhi na wena wu nga ta khomeriwa kona ni masiku ya kona.