Xana U Ponisiwile?

JOHNNY a a ri ni malembe ya khume hi vukhale loko wanuna un’wana a n’wi khameta erivaleni ra nkombiso kutani a n’wi vutisa a ku: “Mufana, xana wa n’wi amukela Yesu Kreste tanihi Hosi ni Muponisi wa wena?” Xivutiso xexo a xi n’wi hlamarisa Johnny, tanihi leswi a ku ri khale a pfumela eka Yesu. Kutani u hlamurile, “Kavula ndza n’wi amukela.” Wanuna loyi u huwelerile leswaku hinkwavo va n’wi twa a ku: “Dzunisani Hosi! Moya-xiviri wun’wana wu ponisiwile ha Kreste!”

Xana ku ponisiwa swi olova hi ndlela yoleyo? Xana Johnny a a “ponisiwile” loko a ha ku heta ku vula marito wolawo, ku nga khathariseki leswi a a ta swi endla evuton’wini bya yena hinkwabyo? Vanhu vo tala lavo lulama va nga hlamula va ku ina. Xiphephana xin’wana xa vukhongeri xi hlamusela leswaku u fanele u tsala siku leri u “ponisiweke” ha rona leswaku u ta ka u nga ri rivali.

Mufundhisi un’wana u vule leswaku “nkarhi lowu u amukelaka Kreste ha wona . . . u lunghiseleriwa vumundzuku bya wena hi ku helela.” U ri Bibele yi vula leswaku ku ponisiwa swi titshege hi nchumu wun’we ntsena, “xiendlo xin’we xo kombisa ripfumelo kan’we ntsena, hayi ku hambeta u kombisa ripfumelo.” Mutsari un’wana wa swa vukhongeri u tsarile: “Lawa i makumu ya ntirho. Ana se swi hetisekile hi wena . . . ‘Nyimpi [ya wena] yi herile.’ ‘Swidyoho [swa wena] swi suriwile.’” Kambe hambi ku ri vanhu lava nga ni ripfumelo leri tiyeke ra leswaku sweswo i ntiyiso va nga ha vona xihoxo emhakeni leyi. I ntiyiso leswaku vanhu vo tala lava byeriweke leswaku va “ponisiwile” a va hanyi hi ndlela leyi Bibele yi vulaka leswaku va fanele va hanya ha yona. Hi ntolovelo va byeriwa leswaku kumbexana a va n’wi “amukelanga” hi ntiyiso Kreste.

Hikwalaho, swi vula yini ku “amukela” Yesu hi ntiyiso ke? Xana i xiendlo xin’we xo kombisa ripfumelo kan’we ntsena, kumbe i ndlela leyi hambetaka ya vutomi? Xana ripfumelo ra hina ri fanele ri tiyile lero ri kota ku hi susumetela ku endla nchumu wo karhi? Xana hi nga vuyeriwa hakunene hi gandzelo ra Yesu handle ko byarha vutihlamuleri byo va valandzeri vakwe?

Vanhu vo tala va lava ku kuma mikateko ku nga ri ku byarha vutihlamuleri byo va valandzeri ni ku yingisa Yesu. Kahle-kahle, rito leri nge ku “yingisa” a va ri twisisi swinene. Kambe Yesu u te: “U ndzi landza.” (Luka 18:18-23) Nakambe Bibele yi ri: “Lava nga yingisiki Evhangeli ya Hosi ya hina Yesu . . . va ta avanyisiwa hi ku yisiwa eku onhakeni loku nga heriki.”—2 Vatesalonika 1:8, 9; Matewu 10:38; 16:24.

Bibele yi vulavula hi swilo swo tala leswi pfuxaka swivutiso swa nkoka malunghana ni leswi dyondzisiweke hi ta ku ponisiwa. Loko u lava ku tiyiseka hi leswi Bibele entiyisweni yi swi vulaka emhakeni leyi, u ta kuma matluka lama landzelaka ma tsakisa hakunene. Pfula Bibele ya wena, u hlaya matsalwa lama kombisiweke leswaku u vona leswi Yesu ni vaapostola vakwe va dyondziseke ha swona emhakeni leyi ya nkoka.