Timfanelo Ta Vavabyi Ti Xiximiwa

‘Andzi nge swi koti ku endla vuhandzuri lebyi handle ka ngati. Loko u swi lava ku endliwa vuhandzuri, u ta amukela endlelo ra mina ro tshungula. Handle ka sweswo, u ta fanela ku lava dokodela un’wana.’

MARITO ya dokodela a ma ri tsekatsekisanga ripfumelo ra Cheng Sae Joo, un’wana wa Timbhoni ta Yehovha la tshamaka le Thailand. Leswi a kumiweke a ri ni meningioma loko a kamberiwile, ku nga tshumba ra le byongweni, Cheng a a lava vuhandzuri hakunene. Kambe a a tiyimiserile ku yingisa xileriso xa Bibele lexi nge: “Mi nga dyi ngati.”—Mintirho 15:28, 29.

Cheng u endzele swibedlhele swin’wana swimbirhi, a hi mhaka ya leswi a a lava ku tshunguleriwa etikweni ra rikwavo loko swi koteka. Khombo ra kona, madokodela ya kwalaho na wona ma arile ku endla vuhandzuri handle ka ngati. Eku heteleleni, Cheng u hlanganisiwe ni Neurological Institute of the Tokyo Women’s Medical College hi Ndzawulo ya Rungula ra Swibedlhele (HIS [Hospital Information Services]) le Thailand. Xibedlhele lexi xi tshungule vavabyi lava tlulaka 200 lava nga ni tshumba ra le byongweni hi ku tirhisa mukwana wa miseve ya gamma, ku nga wun’wana wa minhluvuko leyintshwa ya vutshunguri bya miseve.

Ku endliwe malunghiselelo ya leswaku Cheng a tshama ni Timbhoni ta le Japani leti tshamaka ekusuhi ni xibedlhele lexi. Ntlawa wa tona wu n’wi hlanganisile erivaleni ra swihaha-mpfuka, ku katsa ni Timbhoni ta Yehovha timbirhi leti vulavulaka Xithai ni vayimeri va HIS. Endzhaku ka loko a kamberiwile ku ringana vhiki, Cheng u amukeriwile exibedlhele lexi a endliweke vuhandzuri eka xona, hi mukwana wa miseve ya gamma. Ntirho wa kona wu hete kwalomu ka awara ntsena. Cheng u humile exibedlhele siku leri landzeleke, naswona endzhaku ka rona u khome ndlela a tlhelela eThailand.

Cheng u te: “A ndzi nga swi ehleketi leswaku mpfuno wonghasi wu nga kumeka hi ku tirhisa lunghiselelo leri. Ndzi tsakisiwe ngopfu hi rirhandzu leri kombisiweke swin’we ni ntirhisano exikarhi ka mintlawa yo tala leyi veke ni xandla.”

Mainichi Shimbun, phepha-hungu ra le Japani, loko ri vika hungu leri ri te: “Ku fikela sweswi, swivangelo swa vukhongeri swo ala mpompelo wa ngati swi vekiwe erivaleni. Hambiswiritano, mpompelo wa ngati wu ni vuyelo byo biha byo tanihi AIDS, khombo ro khomiwa hi vuvabyi bya switsongwatsongwana byo tanihi hepatitis C ni rinyenyo. Hikwalaho ka xivangelo lexi, ku ni vavabyi lava nga yi laviki mimpompelo ya ngati ku nga khathariseki leswaku vukhongeri bya vona hi byihi.”

Phepha-hungu ri ye emahlweni ri ku: “Vavabyi vo tala lava aleke mpompelo wa ngati va sindzisiwe ku cinca swibedlhele va ya eka swin’wana, kambe ku ni xilaveko xa leswaku vumbiwa bya swa vutshunguri byi cinca, byi xixima mfanelo ya muvabyi. Mbulavurisano wa ntwanano (ku nga leswaku muvabyi a nyikiwa hlamuselo leyi heleleke ya leswi katsekaka kutani a byi amukela vutshunguri byebyo) wa laveka, naswona timhaka ta mpompelo wa ngati na tona ti fanele ti hlamauseriwa. Swifanele swi xiyiwa leswaku leyi, a hi mhaka leyi katsaka vukhongeri byo karhi ntsena.”

Ku fana na Cheng Sae Joo, vo tala lava lavaka ku tshunguriwa handle ka ngati va boheka ku rhurhela eka swibedlhele swin’wana. Hambiswiritano, va ma tlangela matshalatshala ya madokodela lama tiyimiseleke ku xixima timfanelo ta vona tanihi vavabyi.

Ndzhawulo ya Rungula ra Swibedlhele yi simekiwe hi Timbhoni ta Yehovha emarhavini ya Sosayiti ya Watch Tower leswaku yi kuma ntirhisano wa madokodela lama xiximaka tidyondzo ta vona. Emisaveni hinkwayo, HIS yi aka vuxaka bya ntirhisano ni swibedlhele, madokodela, vatirhi va ta rihanyo, maqweta ni vaavanyisi.