Xiviko Xa Vahuweleri Va Mfumo
Ku Tiyisela Swi Tisa Mikateko Ya Xikwembu eMalawi
YOSEFA a a ri nandza wo tshembeka wa Yehovha. (Vaheveru 11:22) Naswona a ri wanuna la tiyiselaka hi ndlela leyi hlamarisaka. Hambileswi a xengiweke hi vamakwavo, a xaviseriwa evuhlongeni kambirhi, naswona endzhakunyana a hoxiwa ekhotsweni hikwalaho ka swihehlo swa mavunwa, Yosefa a nga helanga matimba. Ematshan’weni ya sweswo, u tiyisele malembe ya nhlomulo hi ku lehisa mbilu, a yimele mikateko ya Yehovha hi ku titsongahata.—Genesa 37:23-28, 36; 39:11-20.
Hi ku fanana namuntlha, Timbhoni ta Yehovha le Malawi ti yimele mikateko ya Xikwembu hi ku lehisa mbilu. Ku ringana malembe ya 26, Timbhoni leti leti nga Vakreste ti tiyisele ku yirisiwa hi hulumendhe, ku kanetiwa lokukulu ni tihanyi tin’wana to tala. Kambe ku tiyisela ka tona ku ti vuyerisile!
Loko ku xanisiwa ku sungurile le Malawi eku heleni ka 1967, a ku ri ni vahuweleri va Mfumo va kwalomu ka 18 000. Wa nga anakanya ntsako lowu Timbhoni ti veke na wona loko ti twa leswaku lembe ra ntirho ra 1997 ri sungule hi nhlohlorhi leyintshwa ya vahuweleri va 38 393—va andze ku tlula kambirhi loko va ringanisiwa ni le ku sunguleni ka ku yirisiwa! Ku tlula kwalaho, lava veke kona eka Mintsombano ya Muganga ya 13 ya “Varhumiwa Va Ku Rhula Ka Xikwembu” leyi khomeriweke eMalawi va tlule 117 000. Entiyisweni, Yehovha u katekise ripfumelo ni ku tiyisela ka vona.
Xikombiso xa mikateko leyi i ntokoto wa mufana wa malembe ya 14 hi vukhale la vuriwaka Machaka. Loko Machaka a pfumerile ku dyondza Bibele ni Timbhoni ta Yehovha, vatswari va yena va hlundzuke ngopfu. Va te: “Loko u lava ku va Mbhoni, u fanele u suka laha kaya.” Hambiswiritano, nxungeto lowu a wu n’wi hetanga matimba leswaku a nga ha yi emahlweni ni dyondzo ya yena. Hikwalaho ka sweswo, vatswari va Machaka va teke swiambalo swa yena hinkwaswo. Vamakwavo va moya va n’wi xavele swin’wana. Loko vatswari va Machaka va twe sweswo, va n’wi byele leswaku: “Loko swi ri leswaku Timbhoni ti ta ku wundla, u fanele u famba u ya tshama na tona.” Endzhaku ko kambisisa mhaka leyi hi vukheta, Machaka u sukile ekaya, ivi ndyangu wun’wana wa Timbhoni wa le vandlheni ra kwalaho wu n’wi teka wu tshama na yena.
Vatswari va Machaka a va nyangatseke ngopfu lerova va ehleketa ku suka endhawini yoleyo leswaku va nga ha hlangani ni Timbhoni. Kavula, leswi swi karhate Machaka, kambe u kume nchavelelo loko vamakwerhu va bule na yena hi Pisalema 27:10, leyi nge: “Hambi loko tatana na manana v̌a nga nḍi ṭhika, Yehova o ta nḍi rola.”
Hi ku famba ka nkarhi, vatswari va Machaka va sungule ku vohla, ivi a ehleketa ku tlhelela ekaya. Handle ko kanakana ku tiyimisela ka n’wana wa vona ku tirhela Yehovha ku fikelele timbilu ta vona hikuva na vona va lave dyondzo ya Bibele ni Timbhoni ta Yehovha! Va tlhele va va kona eNtsombanweni wa Muganga wa “Varhumiwa Va Ku Rhula Ka Xikwembu” hi masiku manharhu, laha endzhaku ka swona va susumeteleke ku vula leswaku: “Entiyisweni, leyi i nhlengeletano ya Xikwembu.”
Ina, nkaneto wu nga ha tika, kambe varhumiwa lava tshembekaka va Xikwembu a va tshiki. Va ya emahlweni hi xivindzi, va ri karhi va swi tiva leswaku “nhlomulo wu tswala ku tiyisela; ku tiyisela kona ku tswala xiyimo xa ku amukeriwa.” (Varhoma 5:3, 4) Timbhoni ta Yehovha eMalawi hilaha ku faneleke ti nga swi tiyisa leswaku ku tiyisela swi tisa mikateko ya Xikwembu.