Xiviko Xa Vahuweleri Va Mfumo

Vutomi Lebyi Tsakisaka Bya Ndyangu Byi Kokela Vanhu Eka Xikwembu

YEHOVHA u katekise Yosefa hi ku n’wi nyika vutlhari lebyikulu ni ku twisisa. (Mintirho 7:10) Hikwalaho ka sweswo, vutlhari bya Yosefa byi ve “[byinene] ematihlweni ya Faro ni malandza ya yena hinkwawo.”—Genesa 41:37.

Hilaha ku fanaka, ni namuntlha Yehovha u nyika vanhu va yena vutlhari ni ku twisisa hi ku tirhisa dyondzo ya Bibele. (2 Timotiya 3:16, 17) Vutlhari lebyi ni ku twisisa swi humesa mihandzu leyinene loko ndzayo leyi sekeriweke eBibeleni yi tirhisiwa. Hakanyingi mahanyelo ya vona lamanene ‘ma vonake ma ri manene eka lava va va vonaka,’ hilaha mintokoto leyi landzelaka ya le Zimbabwe yi kombisaka hakona.

• Wansati un’wana a ri ni vaakelani lava a va ri Timbhoni ta Yehovha. Hambileswi a a nga ti rhandzi Timbhoni, a a xixima mahanyelo ya tona, ngopfu-ngopfu vutomi bya tona bya ndyangu. U xiye leswaku nuna ni nsati va ni vuxaka lebyinene ngopfu naswona vana va vona va va yingisa. Ngopfu-ngopfu u xiye leswaku nuna loyi u n’wi rhandza swinene nsati wa yena.

Ndhavuko lowu tolovelekeke eAfrika hi leswaku loko wanuna a rhandza nsati wa yena, swi vula leswaku wansati u n’wi “dyise nghomondhela.” Kutani wansati loyi u ye eka nsati la nga Mbhoni kutani a n’wi vutisa a ku: “Xana u nga ndzi nyika murhi lowu u wu dyiseke nuna wa wena leswaku nuna wa mina a ta ndzi rhandzisa leswi nuna wa wena a ku rhandzisaka xiswona?” Mbhoni yi n’wi hlamule yi ku: “Ina, ndzi ta ku tisela wona mundzuku nindzhenga.”

Siku leri landzelaka makwerhu wa xisati u endzele muakelani wa yena a khome “murhi” lowu. Xana a ku ri wa muxaka muni? A ku ri Bibele, ku katsa ni buku leyi nge Vutivi Lebyi Yisaka eVuton’wini Lebyi Nga Heriki. Endzhaku ko kambisisa rungula leri nga ebukwini leyi nge Vutivi ehansi ka xihloko lexi nge “Ku Aka Ndyangu Lowu Xiximaka Xikwembu” u byele wansati loyi a ku: “Leyi hi yona ‘nghomondhela’ leyi mina na nuna wa mina hi yi tirhisaka, hi yona yi endlaka leswaku hi rhandzana swinene.” Dyondzo ya Bibele yi sunguriwile naswona wansati loyi u endle nhluvuko hi ku hatlisa ku fikela laha a kombisaka ku tinyiketela ka yena eka Yehovha hi ku khuvuriwa.

• Maphayona mambirhi yo hlawuleka lama averiweke evandlheni leritsongo ekusuhi ni le ndzilakaneni wa le n’walungu-vuxa bya Zimbabwe na Mozambhiki a ma yanga evutirhelini bya yindlu ni yindlu ku ringana mavhiki mambirhi. Ha yini? Hikuva vanhu a va ta eka vona leswaku va ta yingisela leswi va swi vulaka. Phayona rin’wana ri rungula ndlela leyi leswi swi humeleleke ha yona: “A hi famba 15 wa tikhilomitara hi ya fambisa dyondzo ya le kaya ya Bibele vhiki na vhiki eka munhu la tsakelaka. A swi nga hi oloveli ku fika endhawini yoleyo. A hi fanele hi famba endzhopeni naswona a hi fanele hi tsemakanya milambu leyi baka magova hi mati, hi nghena hi fika hi le tinhan’wini. A hi pela nambu hi dzenengele swiambalo ni tintangu ta hina enhlokweni, kutani hi fika hi ambala hala gangeni ra nambu.

“Vaakelani va munhu la tsakelaka a va tsakisiwa hi ku hiseka ka hina. Un’wana wa lava xiyeke ku hiseka ka hina a ku ri murhangeri wa ntlawa wa vukhongeri bya kwalaho. U byele valandzeri va yena a ku: ‘Xana a mi swi lavi ku hiseka tanihi majaha lawa mambirhi lama nga Timbhoni ta Yehovha?’ Siku leri tlhandlamaka, vo tala va valandzeri va yena va te ekaya ra hina va lava ku tiva leswaku ha yini hi phikelela swinene. Ku engetela kwalaho, eka mavhiki mambirhi lama tlhandlameke, a hi ri ni vaendzi vo tala swinene lerova a hi nga ri na nkarhi wo tiswekela swakudya!”

Un’wana wa vanhu lava endzeleke muti wa maphayona emavhikini wolawo mambirhi a ku ri murhangeri wa vukhongeri. Anakanya ntsako lowu maphayona lawa ma veke na wona loko a amukela dyondzo ya le kaya ya Bibele!