Xiviko Xa Vahuweleri Va Mfumo

Ku Tiva Xikwembu Xa Rirhandzu

LOKO a ri ni malembe ya 16, Antônio wa le Brazil, a a pfilunganyekile hi swa vutomi. Ku titwa a ri xikamba ku n’wi endle leswaku a tirhisa swidzidzirisi hi ndlela yo biha ni ku nwa ngopfu. A tshamela ku anakanya hi ku tisunga. Enkarhini lowu u tsundzuke leswi mana wakwe a n’wi byeleke swona a ku: “Xikwembu i rirhandzu.” (1 Yohane 4:8) Kambe, xana Xikwembu lexi xa rirhandzu a a xi ri kwihi?

Leswaku a tshika ku tirhisa swidzidzirisi hi ndlela yo biha ni ku nwa ngopfu, Antônio u lave mpfuno eka mufundhisi wa ndhawu yoleyo. Hambileswi Antônio a a hiseka ngopfu eKerekeni ya Khatoliki, swivutiso leswi a ri na swona a swa ha lo vuya. Hi xikombiso, marito ya Yesu lama nge, “Mi ta tiva ntiyiso, kutani ntiyiso wu ta mi ntshunxa” a a nga ma twisisi. (Yohane 8:32) A ku ri ntshunxeko wa njhani lowu Yesu a a wu tshembisa? Kereke a yi n’wi nyikanga tinhlamulo leti enerisaka ta swivutiso swa yena. Antônio u hetelele a nga ha wu vekanga kondzo, a tlhelela eka mikhuva ya yena leya khale. Entiyisweni, ku godzomberiwa ka yena ku nyanyile.

Hi nkarhi lowu, nghamu ya Antônio, Maria, yi sungule ku dyondza Bibele ni Timbhoni ta Yehovha. Hambileswi a a nga ali leswaku nghamu yakwe yi dyondza, Antônio a bakanyela Timbhoni etlhelo, a vula leswaku “i vukhongeri bya le Amerika lebyi seketelaka swilaveko swa mfumo wa le Amerika.”

Handle ko hetiwa mongo, Maria u siye tikopi ta timagazini ta Xihondzo xo Rindza ni Xalamuka! eswivandleni swo hambana-hambana endlwini, leti a ti ri ni swihloko leswi a ehleketa leswaku Antônio swi nga ha n’wi koka rinoko. Tanihi leswi Antônio a a rhandza ku hlaya, minkarhi yin’wana a kambanyana timagazini leti loko nghamu yakwe yi nga ri kona. Hi mpfhuka a va kona emisaveni, a a ku ri ro sungula a kuma tinhlamulo ta swivutiso leswi a ri na swona swa Bibele. U te: “Ndzi tlhele ndzi vona rirhandzu ni musa lowu nghamu ni Timbhoni a a va ndzi kombisa wona.”

Exikarhi ka lembe ra 1992, Antônio na yena u lave ku dyondza Bibele ni Timbhoni ta Yehovha. Hambiswiritano, u ye mahlweni ni ku tirhisa swidzidzirisi hi ndlela yo biha ni ku kukutlela byalwa. Siku rin’wana nivusiku, yena ni munghana wakwe a va tlhelela ekaya va huma eswidakanini, hiloko maphorisa ma va yimisa. Loko maphorisa ma kume khokheyini leyi a yi ri na Antônio, ma sungule ku n’wi himetela. Phorisa rin’wana ri n’wi susumetele eridakeni kutani ri n’wi kombetela emombyeni hi xibamu. Phorisa lerin’wana ri huwelele ri ku, “N’wi hetise xikan’we!”

Loko Antônio a ha ri eridakeni, u anakanye hi vutomi bya yena. Swilo leswinene ntsena leswi a ha swi tsundzuka, a ku ri ndyangu wa yena na Yehovha. U khongele xikhongelo xo koma, a kombela mpfuno wa Yehovha. Maphorisa ma n’wi tshike a famba hi xivangelo lexi nga tivekiki. U ye ekaya a tiyisekile leswaku Yehovha u n’wi sirhelerile.

Antônio u sungule ku dyondza Bibele hi ku hiseka lokukulu. Hakatsongo-tsongo, u sungule ku cinca vutomi byakwe leswaku a tsakisa Yehovha. (Vaefesa 4:22-24) Hi ku hlakulela ku tikhoma, u sungule ku lwisana ni swidzidzirisi. Hambiswiritano, a a ha fanele a kuma mpfuno wa vutshunguri. Loko a ri etliliniki ya vutshunguri ku ringana tin’hweti timbirhi, u kote ku hlaya tibuku to hambana-hambana ta Bibele, ku katsa ni buku leyi nge Vutivi Lebyi Yisaka eVuton’wini Lebyi Nga Heriki. Kutani Antônio u bule ni swigulana-kulobye hi leswi a swi dyondzeke eka tibuku leti.

Endzhaku ka ku suka etliliniki, Antônio u ye emahlweni a dyondza Bibele ni Timbhoni. Namuntlha, Antônio, Maria, vana va vona va vanhwanyana vambirhi ni mana wa Antônio, va tirhela Yehovha swin’we va ri ndyangu lowu tsakeke ni lowu nga ni vun’we. Antônio u ri: “Sweswi ndzi yi twisisa kahle nhlamuselo ya marito lama nge ‘Xikwembu i rirhandzu.’”

[Xifaniso lexi nga eka tluka 8]

Ku chumayela eRio de Janeiro