Ha Yini U Fanele U Hlakulela Vunene?

WANUNA un’wana wa Mujapani la vitaniwaka Kunihito wa ha ku rhurhela eUnited States.a Endzhaku ka mavhiki ma nga ri mangani a fike kwalaho, u langutane ni xiyimo lexi a xi lave ku n’wi onhela ntirho wa yena. Kunihito wa rungula: “Loko ndhuna ya mina yi ndzi vutise leswaku ndzi nga swi kota ku endla ntirho wo karhi, ndzi titwe ndzi ri ni xivindzi xo pfumela. Kambe, leswi ndzi kurisiweke ndzi tiva leswaku ku titsongahata i mfanelo leyinene, ndzi te: ‘A ndzi tiyiseki loko ndzi ta swi kota, kambe ndzi ta ringeta hi matimba.’ Eka ndhuna ya mina ya Muamerika, sweswo a swi twala onge ndzi munhu la nga wu tiviki hi ku helela ntirho wa mina naswona a ndzi titshembi. Loko ndzi xiye sweswo ndzi swi lemukile leswaku ndzi fanele ndzi antswisa langutelo ra mina.”

Maria, la tshamaka eDorobeni ra New York, a ri xichudeni lexi tlhariheke, lexi a xi tsakela ku pfuna swichudeni-kulobye nkarhi hinkwawo. Juan a a ri xichudeni-kulobye lexi nkarhi na nkarhi a xi pfuniwa hi Maria. Kambe hi tlhelo a a n’wi rhandza, kutani u ringete ku n’wi tsakisa. Hambileswi a a rhandza ku tshama a tengile emahanyelweni, Maria u yengiwe hi rirhandzu ra Juan, hiloko va wela evuoswini.

Namuntlha swa tika ku kombisa vunene emisaveni leyi nga ni mindhavuko yo hambana-hambana ni ku hohloka ka mahanyelo. Kutani ha yini u fanele u hlakulela vunene? Hikuva mahanyelo lamanene ma tsakisa Xikwembu, naswona vo tala va hina ha swi rhandza ku tsakeriwa hi xona hakunene.

Rito ra Xikwembu, ku nga Bibele, ri khutaza vahlayi va rona ku hlakulela vunene. Hi xikombiso, muapostola Pawulo wa tsala: “Hinkwaswo leswi nga kona swa vunene ni hinkwaswo leswi nga kona leswi dzunekaka, hambetani mi xiya swilo leswi.” (Vafilipiya 4:8) Naswona muapostola Petro u hi khutaza ku ‘endla matshalatshala yo engetela vunene eripfumelweni ra hina.’ (2 Petro 1:5) Kambe vunene i yini? Xana byi nga dyondzisiwa etlilasini? Xana hi nga byi hlakulela njhani?

[Nhlamuselo ya le hansi]