Swivutiso Swa Vahlayi
Xana swa fanela ku khongela eka Xikwembu handle ko vula leswaku “hi vito ra Yesu”?
Bibele yi komba leswaku Vakreste lava lavaka ku khongela eka Yehovha va fanele va tirhisa vito ra Yesu. Yesu u byele vadyondzisiwa va yena a ku: “A nga kona loyi a taka eka Tatana handle ko ta ha mina.” U engeterile a ku: “Xin’wana ni xin’wana lexi mi xi kombelaka hi vito ra mina, ndzi ta xi endla, leswaku Tatana a vangamisiwa mayelana ni N’wana. Loko mi kombela xin’wana ni xin’wana hi vito ra mina, ndzi ta xi endla.”—Yohane 14:6, 13, 14.
Cyclopedia of Biblical, Theological, and Ecclesiastical Literature, loko yi kombetela eka xikhundla xo hlawuleka xa Yesu yi ri: “Xikhongelo xi kongomisiwa eka Xikwembu ntsena, ha Yesu Kreste ku nga Muhlanganisi. Hikwalaho, swikhongelo hinkwaswo leswi kongomisiwaka eka vakwetsimi kumbe tintsumi a swo va swa hava ntsena kambe i xisandzu. Hambiswiritano, ku gandzela xivumbiwa xo karhi, ku nga khathariseki leswaku xi tlakuke ku fikela kwihi, i ku gandzela swifaniso swa hava, naswona nawu wo kwetsima wa Xikwembu wa swi yirisa swinene.”
Ku vuriwa yini loko un’wana endzhaku ka loko a humeleriwe hi swilo swo tsakisa a ku: “Ndza nkhensa Yehovha” kambe a nga vuli leswaku “hi vito ra Yesu”? Xana leswi swi nga va swi hoxile? Doo! A hi nge Mukreste u weriwa hi khombo hi xitshuketa kutani a huwelela a ku: “Yehovha ndzi pfune!” Xikwembu a xi nge tshiki ku pfuna nandza wa xona hikwalaho ka leswi a nga vulangiki leswaku “hi vito ra Yesu.”
Hambiswiritano, swi fanele swi xiyiwa leswaku ku huwelela hambi ku ri eka Xikwembu, a swi vuli leswaku u le ku khongeleni. Hi xikombiso, endzhaku ka loko a avanyise hi Yehovha hikwalaho ko dlaya makwavo Avele, Kayini u te: “Ku xupuriwa ka mina hikwalaho ka xihoxo i kukulu leswaku ndzi nga ku rhwala. Waswivo, namuntlha wa ndzi hlongola kunene ehenhla ka vuandlalo bya misava, naswona xikandza xa wena a ndzi nge he xi voni; ndzi ta va mutsendzeleki ni mubaleki emisaveni, kunene mani na mani la nga ta ndzi kuma u ta ndzi dlaya.” (Genesa 4:13, 14) Hambileswi, Kayini a kongomiseke marito yakwe eka Yehovha, kahle-kahle a a vilerisiwa hi vuyelo byo vava bya xidyoho.
Bibele ya hi byela: “Xikwembu xi kaneta lava titlakusaka, kambe xi nyika lava titsongahataka musa lowu nga faneriwiki.” Ku vulavula hi ku ntshunxeka ngopfu ni La nge Henhla-henhla onge hiloko a ri munhu loyi a fanaka na hina hakunene swi nga kombisa ku nga titsongahati. (Yakobo 4:6; Pisalema 47:2; Nhlavutelo 14:7) Nakambe hi ta va hi delela loko hi swi tiva leswi Rito ra Xikwembu ri swi vulaka malunghana ni xikhundla xa Yesu kambe hi xinyata hi khongela handle ko vula hi ku hi vito ra Yesu Kreste.—Luka 1:32, 33.
Leswi a swi vuli swona leswaku Yehovha u langutele leswaku hi khongela hi ndlela yo karhi. Lexi nga xa nkoka ngopfu i xiyimo xa mbilu ya munhu. (1 Samuwele 16:7) Hi lembe-xidzana ro sungula C.E., ndhuna ya vuthu ya le Rhoma leyi vuriwaka Korneliyo yi “endle swikombelo eka Xikwembu nkarhi na nkarhi.” Korneliyo, loyi a nga wa Matiko loyi a nga yimbanga, a a nga tinyiketelanga eka Yehovha. Hambileswi swi nga ha endlekaka swikhongelo swa yena a nga swi hundzisanga hi vito ra Yesu, swi “tlhandlukile swi va xitsundzuxo emahlweni ka Xikwembu.” Hikwalaho ka yini? Hikuva “mukambisisi wa timbilu,” u swi vonile leswaku Korneliyo a a ri “wanuna la tinyiketeleke, la chavaka Xikwembu.” (Mintirho 10:2, 4; Swivuriso 17:3) Loko a kume vutivi bya “Yesu loyi a a huma eNazareta,” Korneliyo u amukele moya lowo kwetsima kutani a va mudyondzisiwa la khuvuriweke wa Yesu.—Mintirho 10:30-48.
Xo hetelela, a hi vanhu lava faneleke va endla xiboho xa leswaku hi swihi swikhongelo leswi Xikwembu xi swi yingisaka. Loko Mukreste o tshuka a khongela eka Xikwembu kutani a rivala xiga lexi nge “hi vito ra Yesu,” a nga fanelanga a titwa a ri na nandzu. Yehovha u ku xiya kahle ku nga hetiseki ka hina naswona u lava ku hi pfuna. (Pisalema 103:12-14) Hi nga tiyiseka leswaku loko hi va ni ripfumelo eka “N’wana wa Xikwembu . . . ku nga khathariseki leswaku i yini lexi hi xi kombelaka hi ku ya hi ku rhandza ka xona, xa hi twa.” (1 Yohane 5:13, 14) Hambiswiritano, i swinene leswaku Vakreste va ntiyiso lava khongelaka exikarhi ka vanhu, va tsundzuka leswaku Yesu i wa nkoka exikongomelweni xa Yehovha hilaha swi andlariweke hakona eMatsalweni. Naswona hi ku titsongahata va tikarhatela ku fundzha Yesu hi ku kongomisa swikhongelo swa vona eka Xikwembu hi vito ra yena.