Xana Swi Fanerile Leswaku U Khongela Yesu?

VANHU van’wana va swi vona swi fanerile ku khongela Yesu. Le Jarimani vo tala va dyondzisiwile va ha ri vana leswaku va nga si dya swakudya va fanele ku khondla mavoko ya vona ivi va nkhensa Yesu Kreste.

Hi ku ya hi Bibele, hakunene Yesu u ni xiyimo lexi tlakukeke swinene etilweni. Hambi swi ri tano, xana leswi swi vula leswaku hi fanele ku khongela yena? U nga ha va u ri exikarhi ka lava hikwalaho ka ku rhandza Yesu, va kongomisaka swikhongelo swa vona eka yena, kambe xana Yesu u ehleketa yini hi swikhongelo swo tano?

Xo sungula, hikwalaho ka yini swivutiso leswi swi tlakusiwa? Hikuva Bibele yi ri Yehovha Xikwembu hi yena “l’a yingisaka mikhongelo.” Kutani, a swi hlamarisi nikatsongo leswi malandza ya Xikwembu eminkarhini ya khale, tanihi Vaisrayele, va khongeleke ntsena, eka Yehovha Xikwembu xa Matimba Hinkwawo.—Pisalema 5:1, 2; 65:2.

Xana swilo swi cincile loko Yesu, N’wana wa Xikwembu, a te laha misaveni ku ta ntshunxa vanhu eka xidyoho ni rifu? Doo, swikhongelo a swa ha ya emahlweni swi kongomisiwa eka Yehovha. Loko Yesu a ha ri laha misaveni u khongele hi ku phindha-phindha eka Tata wa yena wa le tilweni, naswona u dyondzise van’wana ku endla hi ndlela leyi fanaka. Ehleketa ntsena hi xikhongelo xa xikombiso, minkarhi yin’wana xi vuriwa Xikhongelo xa Hosi kumbe xa Tata wa Hina, lexi ku nga xona xikhongelo lexi tivekaka ngopfu emisaveni. Yesu a nga hi dyondzisanga ku n’wi khongela; u hi nyike xikombiso lexi: “Tata wa hina la nge matilweni, vito ra wena a ri hlawuleke.”—Matewu 6:6, 9; 26:39, 42.

Sweswi a hi languteni mhaka leyi hi vukheta hi ku kambisisa leswaku xikhongelo kahle-kahle i yini.

Xana Xikhongelo I Yini?

Xikhongelo xin’wana ni xin’wana i ndlela ya vugandzeri. The World Book Encyclopedia yi tiyisa mhaka leyi hi ku vula yi ku: “Xikhongelo i ndlela ya vugandzeri laha munhu a kombisaka ku tinyiketela, ku nkhensa, ku tisola kumbe ku kombela eka Xikwembu.”

Eka xiendlakalo xin’wana Yesu u te: “Ku tsariwile va te: ‘U ta nkhinsamela Hosi, Xikwembu xa wena, u gandzela xona ntsena.’” Yesu u khomelele eka xisekelo xo sungula xa ntiyiso wa leswaku vugandzeri—kun’we ni xikhongelo—swi fanele ku kongomisiwa eka Tata wa yena, Yehovha Xikwembu.—Luka 4:8; 6:12.

Ku Xixima Yesu eSwikhongelweni Swa Hina

Yesu u file tanihi gandzelo ra nkutsulo eka vanhu, Xikwembu xi n’wi pfuxile, naswona u nyikiwe xiyimo lexi tlakukeke. Tanihi laha u nga anakanyaka ha kona, hinkwaswo leswi swi tise ku cinca mayelana ni swikhongelo leswi amukeriwaka. Hi ndlela yihi?

Muapostola Pawulo u hlamusela nsusumeto lowukulu lowu xiyimo xa Yesu xi wu tisaka eka xikhongelo hi ndlela leyi landzelaka: “Hikokwalaho Xikwembu xi n’wi tlakusile swinene, kutani xi n’wi nyikile vito leri nge henhla ka mavito man’wana hinkwawo, leswaku, evitweni ra Yesu, matsolo hinkwawo ma nkhinsama ematilweni, ni la misaveni, ni le hansi ka misava, ni tindzimi hinkwato ti vula leswaku Yesu Kreste i Hosi, eku dzuniseni ka Xikwembu Tatana.”—Vafilipiya 2:9-11.

Xana marito lama nge “evitweni ra Yesu, matsolo hinkwawo ma nkhinsama” ma vula leswaku hi fanele ku khongela yena? Nikatsongo. Xivulwa xa Xigriki lexi katsekaka laha “xi kombisa vito leri hinkwavo lava nkhinsamaka va hlanganaka ha rona, leri hinkwavo (πᾶν γόνυ) va gandzelaka ha rona hi vun’we. Vito leri Yesu a ri kumeke ri susumetela hinkwavo ku hlangana evugandzerini.” (A Grammar of the Idiom of the New Testament, hi G. B. Winer) Hakunene, leswaku xikhongelo xi amukeriwa, xi fanele xi nyikeriwa “evitweni ra Yesu,” kambe hambi swi ri tano, xi fanele xi kongomisiwa eka Yehovha Xikwembu ni ku yisa xidzuniso eka yena. Hikwalaho ka xivangelo lexi, Pawulo u ri: “Etimhakeni hinkwato, khongelani, mi tivisa Xikwembu leswi mi swi pfumalaka, mi kombela mi ri karhi mi nkhensa.” (Xiitaliki i xerhu.)—Vafilipiya 4:6.

Tanihi leswi ndlela yi yisaka emakun’wini ya riendzo, xisweswo Yesu i “ndlela” leyi yisaka eka Xikwembu xa Matimba Hinkwawo. Yesu u dyondzise vaapostola a ku: “Hi mina ndlela, ni ntiyiso, ni vutomi; a ku na munhu loyi a taka eka Tatana, loko ku nga ri ha mina.” (Yohane 14:6) Hikwalaho, hi fanele ku kongomisa swikhongelo swa hina eka Xikwembu ha Yesu hayi eka Yesu hi xiviri.a

‘Kambe,’ van’wana va nga ha vutisa, ‘xana Bibele a yi hlamuseli leswaku vadyondzisiwa vambirhi Stefano na muapostola Yohane va vulavule na Yesu a ri etilweni?’ Wolowo i ntiyiso. Hambi swi ri tano, timhaka leti, a ti nga katsi swikhongelo, tanihi leswi Stefano na Yohane un’wana ni un’wana a voneke Yesu exivonweni naswona a vulavuleke na yena hi ku kongoma. (Mintirho 7:56, 59; Nhlavutelo 1:17-19; 22:20) Tsundzuka leswaku ku vulavula ni Xikwembu ntsena hi swoxe a swi vuli xikhongelo. Adamu na Evha va vulavule ni Xikwembu, va kombela ku rivaleriwa xidyoho xa vona lexikulu, loko xi va avanyisa endzhaku ka ku dyoha ka vona aEdeni. Ku vulavula ka vona na yena hi ndlela yoleyo a ku nga ri xikhongelo. (Genesa 3:8-19) Hikwalaho swi ta va swi hoxile ku teka mhaka ya ku vulavula ka Stefano kumbe ka Yohane na Yesu tanihi vumbhoni bya leswaku kahle-kahle hi fanele ku n’wi khongela.

Xana ‘Ku Vitana Eka’ Vito Ra Yesu Swi Endliwa Njhani?

Xana wa ha kanakana, u swi vona swi fanerile ku khongela Yesu? Wansati un’wana u tsalele rhavi ra Sosayiti ya Watch Tower: “Khombo ra kona, a ndzi si tiyiseka leswaku Vakreste vo sungula a va nga n’wi khongeli Yesu.” Emianakanyweni ya yena a a ri ni marito ya Pawulo lama nga eka 1 Vakorinto 1:2 (NW), laha a boxeke leswaku “lava etindhawini hinkwato va vitanaka vito ra Hosi ya hina, Yesu Kreste.” Hambi swi ri tano, hi fanele ku xiya leswaku hi ririmi ro sungula, rito ‘ku vitana eka’ ri nga vula swin’wana handle ka ku khongela.

Vito ra Kreste ri ‘vitaniwa’ njhani etindhawini hinkwato? Ndlela yin’wana hi leswaku valandzeri va Yesu va le Nazareta va n’wi amukele erivaleni tanihi Mesiya ni “Muponisi wa misava,” va endla masingita layo tala hi vito ra yena. (1 Yohane 4:14; Mintirho 3:6; 19:5) Hikwalaho, The Interpreter’s Bible yi vula leswaku xivulwa lexi nge “ku vitana eka vito ra Hosi ya hina . . . xi vula ku pfumela eka vuhosi bya yena ematshan’wini ya ku n’wi khongela.”

Ku amukela Kreste ni ku kombisa ripfumelo engatini ya yena leyi halatiweke, leyi endlaka swi koteka ku rivaleriwa swidyoho, naswona swi vula ‘ku vitana eka vito ra Hosi ya hina, Yesu Kreste.’ (Ringanisa Mintirho 10:43 swin’we na 22:16.) Kutani hi ku kongoma hi vula vito ra Yesu nkarhi wihi na wihi loko hi khongela eka Xikwembu hi vito ra yena. Kutani, hambi leswi yi kombisaka leswaku hi nga vitana eka vito ra Yesu, Bibele a yi kombisi leswaku hi fanele hi khongela yena.—Vaefesa 5:20; Vakolosa 3:17.

Leswi Yesu A Nga Hi Endlelaka Swona

Handle ko kanakana Yesu u tshembise vadyondzisiwa va yena: “Xin’wana ni xin’wana lexi mi xi kombelaka hi vito ra mina, ndzi ta xi endla.” Xana leswi swi lava leswaku hi n’wi khongela? Doo. Xikhongelo xi fanele xi kongomisiwa eka Yehovha Xikwembu—kambe hi vito ra Yesu. (Yohane 14:13, 14; 15:16) Hi kombela Xikwembu leswaku N’wana wa xona, Yesu, a kombisa matimba ya yena lamakulu ni vulawuri hikwalaho ka hina.

Xana Yesu u vulavurisana njhani ni valandzeri vakwe va ntiyiso namuntlha? Nhlamuselo ya Pawulo ya vandlha ra Vakreste lava totiweke yi nga tirha tanihi xikombiso. U ri fanise na miri kasi Yesu Kreste u n’wi fanise na nhloko. “Nhloko” yi phamela swirho swa miri wa moya, swilaveko swa wona hi ku tirhisa “misiha ni tinyama ta wona,” kumbe hi tindlela ni malunghiselelo yo phamela vandlha ra yena hi swakudya swa moya ni nkongomiso wa moya. (Vakolosa 2:19) Hi ndlela leyi fanaka, Yesu namuntlha u tirhisa ‘tinyiko leti nga vanhu,’ kumbe vavanuna lava fanelekaka hi tlhelo ra swa moya, ku rhangela vandlha, hambi ku ri ku nyikela nkongomiso loko swi fanerile. Eka swirho swa vandlha a ku na lunghiselelo ro vulavula hi ku kongoma na Yesu kumbe ku n’wi khongela, kambe va fanerile hakunene—ina, va fanele—ku khongela eka Tata wa Yesu, Yehovha Xikwembu.—Vaefesa 4:8-12.

Xana U N’wi Xixima Hi Ndlela Yihi Yesu?

Mayelana ni ku ponisiwa ka vanhu, i xiphemu xihi lexikulu lexi Yesu a xi endlaka! Muapostola Petro u te: “Ku ponisiwa a ku kumeki eka munhu un’wana, hikuva vanhu a va nyikiwanga vito rin’wana laha misaveni, ehandle ka vito ra Yesu, leri hi faneleke ku ponisiwa ha rona.” (Mintirho 4:12) Xana wa wu xiya nkoka wa vito ra Yesu?

Leswi hi nga yisiki swikhongelo swa hina eka Yesu hi ku kongoma, a hi xi tekeli ehansi xiyimo xa yena. Ematshan’wini ya sweswo, Yesu wa xiximiwa loko hi khongela hi vito ra yena. Naswona tanihi leswi vana va xiximaka vatswari va vona hi ku yingisa, hi xixima Yesu Kreste hi ku yingisa milawu ya yena, ngopfu-ngopfu nawu lowuntshwa wa ku rhandzana.—Yohane 5:23; 13:34.

Swikhongelo Leswi Amukelekaka

Xana u navela ku nyikela swikhongelo leswi amukelekaka? Kutani swi kongomise eka Yehovha Xikwembu, naswona endla tano hi vito ra N’wana wa yena, Yesu. Tiva ku rhandza ka Xikwembu, naswona endla leswaku xikhongelo xa wena xi kombisa ku twisisa koloko. (1 Yohane 3:21, 22; 5:14) Kuma matimba emaritweni ya Pisalema 66:20: “A ku v̌ongiwe Šikwembu le’ši nga tšukumetangiki šikhongelo ša mina, le’ši nga nḍi tekelangiki tintŝalo ta šona.”

Hi laha hi voneke ha kona, swikhongelo i ndlela ya vugandzeri lebyi kongomisiwaka eka Xikwembu xa Matimba Hinkwawo ntsena. Hi ku kongomisa swikhongelo swa hina hinkwaswo eka Yehovha Xikwembu, hi kombisa leswaku hi wu amukele hi mbilu hinkwayo nkongomiso wa Yesu wa ku khongela: “Tata wa hina la nge matilweni.”—Matewu 6:9.

[Nhlamuselo ya le hansi]