Matshalatshala Yo Kuma Ku Rhula Ka Mianakanyo

ALBERT a a ri ni vukati lebyi tsakisaka ni vana vambirhi lava hanyeke kahle. Kambe a a titwa a kayivela swin’wana evuton’wini. Nkarhi wun’wana loko a ri karhi a wa a pfuka a ringeta ku kuma ntirho, u nghenele tipolitiki kutani a landzela fambiselo ra vusoxalisi. U tlhele a va xirho lexi gingiritekaka xa vandla ra Vukhomunisi ra le ndhawini ya ka vona.

Kambe swi nga si ya kwihi, Vukhomunisi byi siye Albert a dungeke mianakanyo. U tshike swa tipolitiki a tinyiketela swinene eka ndyangu wakwe. A a lava ku wu vona wu tsakile. Hambiswiritano, Albert a a ha titwa a kayivela swin’wana; a a nga si kuma ku rhula ka ntiyiso ka mianakanyo.

Mhaka leyi a yi khumbi Albert ntsena. Leswaku va kuma xikongomelo lexi twalaka xa vutomi, vanhu va timiliyoni va kambisise tidyondzo, tifilosofi ni vukhongeri hi ku hambana ka byona. Ematikweni ya le Vupela-dyambu, ku xandzukela milawu ya mahanyelo lamanene ni ya ntshamisano swi tswale ntlawa wa mahipi hi va-1960. Ngopfu-ngopfu vantshwa va endle matshalatshala yo kuma ntsako ni xikongomelo xa vutomi hi ku tirhisa swidzidzirisi ni tifilosofi ta vadyondzisi va milawu ni vafundhisi-nkulu va ntlawa lowu. Hambiswiritano, ntlawa wa mahipi wu tsandzekile ku tisa ntsako wa xiviri. Ku ri na sweswo, wu nyanyise nhlayo ya vantshwa lava godzomberiwaka hi swidzidzirisi ni lava tikhomeke ku biha, wu byala moya wa vudlakuta evanhwini.

Hi madzana ya malembe, vo tala va ringete ku kuma ntsako hi rifuwo, vulawuri kumbe dyondzo. Ku hlongorisa swilo swo tano eku heteleleni swi va siya va we mapa. Yesu u te: “Hambiloko munhu a ri ni swo tala, vutomi byakwe a byi humi eka swilo leswi a nga na swona.” (Luka 12:15) Ku ri na sweswo ku hlongorisa rifuwo hakanyingi swi vanga gome. Bibele yi ri: “Lava tiyimiseleke ku fuwa va wela endzingweni ni le ntlhan’wini ni le ku naveleni ko tala ka vuhunguki ni loku vavisaka, loku nghenisaka vanhu endzovisweni ni le ku onhakeni. Hikuva ku rhandza mali i rimitsu ra mixaka hinkwayo ya swilo swo biha, naswona hi ku lwela ku fikelela rirhandzu leri, van’wana va . . . titlhave hinkwako-nkwako hi switlhavi swo tala.”—1 Timotiya 6:9, 10.

Kutani ke, xana munhu a nga ku kuma njhani ku rhula ka mianakanyo a tlhela a va ni xikongomelo evuton’wini? Xana a nga swi kuma hi ku ringetela kunene? A swi tano. Hilaha hi nga ta vona hakona eka xihloko lexi landzelaka, ku rhula ko tano ku nga kumiwa hi ku enerisa xilaveko xa nkoka swinene lexi nga eka vanhu va nyama ntsena.

[Xifaniso lexi nga eka tluka 3]

Xana ku hlongorisa rifuwo, vulawuri kumbe dyondzo swi nga ku pfuna njhani leswaku u kuma ku rhula ka mianakanyo?