Mintsombano Ya Muganga Leyi Khomiwaka Hi Ximumu eRhaxiya Yi Tisa Mikateko

HI XIMUMU, vanhu vo tala lava rhandzaka ntumbuluko le Rhaxiya, va siya tindlu ta vona leti nga emadorobeni kutani va ya ematiko-xikaya leswaku va ya heta nkarhinyana va tshama ematendeni lama vuriwaka dachas. Eka vona, ku va ku ri nkarhi wa leswaku va wisa mphesamphesa emadorobeni. Eka tinguva ta ximumu leta ha ku hundzaka, Timbhoni ta Yehovha ta le Rhaxiya ti voniwe ti ri hi mintlawa ti longoloka ti ya ematiko-xikaya—kambe hi xikongomelo lexi hambaneke ni xa vanhu lava a va ya ematiko-xikaya.

Hambileswi emadorobeni man’wana ntirho wa Timbhoni ta Yehovha wo chumayela wa ha yirisiweke, ti ya emahlweni ti hlengeletana hi ku ntshunxeka naswona ti tirhisa ntshunxeko lowu vukhongeri hinkwabyo byi nga na wona. Hambiswiritano, minkarhi yin’wana ku va valawuri ni vafundhisi va kereke ya Orthodox ya le Rhaxiya va byeriwe mavunwa hi Timbhoni, swi endle leswaku swi ti tikela ku kuma mpfumelelo wo tirhisa tindhawu letinene leswaku ti khoma mintsombano ya muganga leyi ti vaka na yona lembe ni lembe hi ximumu. Kutani Timbhoni ti hlele ku khoma mintsombano ya tona enhoveni. Ku sukela hi 2007 ku ya eka 2009, mintsombano yoleyo yi khomiwe minkarhi ya kwalomu ka 40 etindhawini ta 25 etikweni hinkwaro ra Rhaxiya.

Mbhoni yin’wana leyi se yi nga ni malembe yo tala yi ri karhi yi ya emintsombanweni ya le Rhaxiya yi te: “Eka malembe lama hundzeke loko hi hirha switediyamu ni miako emadorobeni lamakulu, vanhu va timbilu letinene ni valawuri va ndhawu yoleyo a va tivonela hi ya vona ndlela leyi nhlengeletano ya hina yi nga basa ni ku hleleka ha yona. Swi twisa ku vava leswi vanhu va nga ha ti voniki tinhlengeletano teto to tsakisa leti eka tona ku vaka ni vanhu va mindhavuko, tinxaka ni va vukhongeri byo hambana-hambana.”

Hambileswi hi nkarhi wa tinhlengeletano teto ku tsakisaka swinene, Mbhoni yin’wana yi te: “Swa tsakisa ku vona moya wo tinyiketela ni wo tshembeka lowu Timbhoni ti wu kombisaka ehansi ka swiyimo swo hambana-hambana. Kambe loko valawuri va hi sivela ku khoma mintsombano ya hina, sweswo swi endla leswaku hi karhateka swinene. Nakambe swi endla leswaku hi nga swi koti ku gandzela Xikwembu xa matimba hinkwawo hilaha hi lavaka hakona ni hi ndlela leyi xiximekaka.” Xana Timbhoni ta Yehovha ta le Rhaxiya ti langutane njhani ni xiyimo lexi?

Mintsombano Leyi Khomeriwaka eNhoveni eMatiko-xikaya

Loko vahleri va ntsombano va byeriwa se ku sele nkarhi wutsongo leswaku ndhawu leyi va yi hirheke ka ha ri ni nkarhi a swi nge he koteki leswaku va yi tirhisa, sweswo swi vula leswaku va fanele va kuma ndhawu yin’wana leyi eka yona va nga ta kota ku ringana, vona swin’we ni magidi ya vapfhumba lava nga tata. Hi xikombiso, hi 2008, Timbhoni ta le Cheboksary, le Rhiphabliki ya Chuvash, a ti fanele ti va ni ntsombano wa tona wa muganga endhawini yo wisela eka yona leyi rhendzeriweke hi mirhi ya birch leyi nga etlhelo ka Nambu wa Volga. Ntirho lowu a ti fanele ti wu endla a ku ri tlakula va xurhe. Eka vapfhumba va 1 930 lava a va languteriwile, vo ringana 1 700 a va ta etlela laha ntsombano wu khomeriweke kona. A va ta lava tixawara, tisinki leti nga ni mati yo hisa ni yo titimela, swihambukelo ni gezi. Nakambe hinkwavo a va fanele va nyikiwa swakudya.

Vamakwerhu va tirhe hi matimba leswaku va kuma leswi a swi laveka. Ku kumiwe vavatli, vativi va gezi ni tiplambara. Timbhoni ta 350 ti pfunete hi ku tirhandzela, laha ta 14 ti tshameke endhawini yoleyo ku ringana masiku ya khume. Ti tsemelele mapulanga, ti susa leswi nga lavekiki, ti dzima matende, tindhawu to hlambela eka tona ni swihambukelo. Ntlawa wun’wana wa vamakwerhu wu ye edorobeni ko hlayanyana leswaku wu ya xava swilo leswi a swi laveka. Leswi a ku nga ri na xigwitsirisi, vamakwerhu va endle xiboho xo sweka kanharhu hi siku. Valawuri va ndhawu leyi ntsombano a wu khomeriwe eka yona va thole vatirhi van’wana leswaku va pfuneta ku swekela vapfhumba. Vapfhumba va 500 va te ni matende ya vona, va 150 va hirhe byetlelo endhawini leyi ntsombano wu khomeriweke eka yona, va 15 va tsakele ku etlela ebyanyini naswona lavan’wana va etlele ematendeni lama dzimiweke hi vamakwerhu.

Loko vapfhumba va fika, va vone switulu swa tipulasitiki swa muhlovo-hlovo leswi pakiweke kahle hi tilayeni. A ku ri ni switeji swimbirhi leswi khavisiweke hi swiluva, xin’wana a xi ri xa nongonoko wa Xirhaxiya kasi lexin’wana a xi ri xa nongonoko wa Xichuvash. Un’wana ni un’wana u tiphine hi nongonoko wa swa moya a tlhela a tlangela ku tikarhata loku endliweke hi vatirhi va ku tirhandzela. Un’wana wa lava a va lunghiselela swakudya u te: “Loko a ndzi nga tivonelanga hi ya mina, a ndzi nga ta tshemba leswaku ku ni nhlengeletano leyi nga hleleka ku fana ni ya n’wina!” Van’wana va fanise ntsombano wolowo ni Nkhuvo wa Mitsonga lowu a wu tlangeriwa hi tiko ra Israyele eminkarhini ya Bibele.

Emadorobeni man’wana, Timbhoni a ti byeriwa ku sale siku rin’we leswaku ndhawu leyi ti yi hirheke leswaku ti khomela ntsombano wa muganga eka yona a swi nge he koteki leswaku ti yi tirhisa, kutani a ti fanele ti lava yin’wana. Leswi swi ve tano eNizhniy Novgorod, laha vatirhi va ku tirhandzela va nga tirha vusiku ni nhlikanhi leswaku va lunghiselela ndhawu. A va fanele va tsema mirhi ni ku basisa khwati, va tsema byanyi va tlhela va haxa murhi wo dlaya swigalana ni vusokoti. Loko vapfhumba va fika hi Ravuntlhanu nimixo, vatirhi va ku tirhandzela se a va pake switulu swa tipulasitiki swo ringana 2 000 ni swihambukelo swa khume leswi rhwalekaka, va endla tisinki, va aka xiteji, va lumeka janareta va tlhela va lunghisa fambiselo ra mpfumawulo. Makwerhu un’wana u te: “Lexi hlamariseke hileswaku vamakwerhu lava nga tirha vusiku ni nhlikanhi a va nga lavi ku tlhomiwa tinsiva. Hi ku titsongahata, va hambete va tirhela van’wana hi nkarhi wa ntsombano. Va endle hinkwaswo leswi nga ematimbeni ya vona leswaku vamakwerhu va tiphina hi swakudya swa moya.”

Makwerhu un’wana u tsale a ku: “A hi tirhisana. Hambileswi a ku ri ro sungula vamakwerhu va va ni ntsombano enhoveni naswona va wu lunghiseleleke se ku sale nkarhi wutsongo, va tikarhatile leswaku va nga kavanyeteki ngopfu hi nkarhi wa xiyimiso. Endzhaku ko endla malunghiselelo wolawo hinkwawo, a hi nga karhalanga. A hi twa onge Yehovha u hi nyike timpapa!”

Ku Pfuniwa Hi Moya Wa Xikwembu

Swiphiqo leswi Timbhoni a ti fanele ti langutana na swona loko ti fanele ti khoma mintsombano swi endle leswaku ti va ni vun’we naswona swi kombise leswaku ti pfuniwa hi moya wa Xikwembu. Le Smolensk, vamakwerhu va byeriwe ku sale siku rin’we leswaku tindhawu to etlela eka tona leti a va ti hirhile a swi nge he koteki leswaku va ti tirhisa. Nkulu un’wana u te: “Loko tibazi ta vapfhumba ti fika hi awara ya n’we nimixo, a hi nga swi tivi leswaku va ta etlela kwihi. Ndzi sungule ku rila hikuva a ku ri hava lexi a ndzi ta va pfuna ha xona. Ndzi khongele Yehovha ndzi kombela leswaku a lulamisa xiphiqo lexi. A ndzi nga tikoti hi ku tsaka loko endzhakunyana ka awara hi va hi kumele un’wana ni un’wana byetlelo! Leswi swi swi veke erivaleni leswaku Yehovha a nge va tshiki vanhu vakwe vo lulama.” Eka ntsombano wun’wana lowu khomeriweke enhoveni, vamakwerhu va ye eximutanini xa kwalaho va ya kombela byetlelo naswona hikwalaho ka ndhuma leyinene leyi Timbhoni a ti ri na yona endhawini yoleyo, vaaki va amukele vapfhumba vo ringana 2 000 emakaya ya vona hi nkarhi wa ntsombano.

Mbhoni yin’wana yi te: “Ku va hi kote ku khoma ntsombano swi kombise leswaku i swa nkoka ku tshembela eka Yehovha eka swiyimo hinkwaswo.” Leswi swi ve tano loko vanhu lava a va te hi xikongomelo xo kavanyeta ntsombano va fika swi nga languteriwanga. Le Novoshakhtinsk, mufundhisi wa kereke ya Orthodox ya le Rhaxiya ni valandzeri vakwe va fike va yimbelela tinsimu ta kereke ni ku vulavulela ekusuhi ni xikurisa-marito leswaku xivulavuri xi nga twali kahle. Hambiswiritano, maphorisa ma va siverile leswaku va nga kavanyeti nongonoko. Loko wansati un’wana loyi a a famba ni ntlawa wolowo a titivarile hikwalaho ko twa ku hisa, vamakwerhu va n’wi yise eka Ndzawulo ya Xilamulela-mhangu leswaku a ya kuma mpfuno. Leswi swi n’wi hlamarisile.

Leswi Va Swi Voneke Swi Va Hlamarisile

Leswi eRhaxiya ku nga tala vutherorisi, loko vanhu va hlengeletana va ri ntlawa, sweswo swi koka nyingiso wa maphorisa ni vaaka-tiko van’wana lava tivutisaka leswaku ku nga va ku endleka yini. Hi xikombiso, entsombanweni lowu khomeriweke enhoveni le Volzhskiy a ku ri ni maphorisa. Rin’wana ra wona ri lahlekeriwe hi selfoni hi nkarhi wa nongonoko, hiloko vamakwerhu va ri pfuna leswaku ri yi kuma eka Ndzawulo ya leswi Lahlekeke no Kumeka. Endzhaku ka sweswo, ri hlamule riqingho leri humaka eka mulanguteri wa rona, loyi a a lava ku tiva loko ku ri ni madzolonga entsombanweni wolowo. Phorisa rero ri hlamule ri ku: “Swilo hinkwaswo swi famba kahle; ku ni vanhu va 5 000 kambe a ku na madzolonga. Ndlela leyi va nga hleleka ha yona ya hlamarisa! A ndzi lahlekeriwe hi selfoni hiloko va yi kuma kutani va ndzi vuyisela yona!”

Murindzi un’wana u hlamarisiwe hi ndlela leyi rivala a ri base ha yona hikuva hambileswi a ku ri ni vana vo tala, a nga ri vonanga hambi ku ri phepha ra xiwitsi. N’wini wa ndhawu yin’wana leyi ntsombano a wu khomeriwe eka yona u hlangane ni maphorisa lama byeriweke leswaku ku ni vanhu vo tala va vukhongeri lava hlengeletaneke. U teke ndhuna ya maphorisa kutani a famba na yona erikupakupeni ra xithezi xa vunharhu leswaku ri vona leswi endlekaka laha ntsombano wu khomeriweke kona, kutani a ku: “Ndza tshemba wa yi vona na wena ndlela leyi ti hlelekeke ha yona!” N’wini wa ndhawu yoleyo swi n’wi hlamarisile ku xiya leswaku Timbhoni a ti nwi kumbe ku dzaha naswona loko ti famba a swi nga ti kombi nileswaku a ku ri ni vanhu kwalaho hikuva ti rhwalele thyaka hinkwaro. Ndhuna yoleyo yi vulavule hi rito leri tlakukeke yi ku: “Onge a to va eparadeyisini!”

Vun’we Lebyi Vanhu Va Xikwembu Va Nga Na Byona

Endzhaku ka ntsombano wun’wana lowu khomeriweke enhoveni, hosi ya le ximutanini xin’wana xa le kusuhi yi te: “Ndza swi xiya leswaku mi vanhu vo titsongahata, naswona leswi mi swi endlaka swa hlamarisa. Loko hina hi sivela vanhu leswaku va nga tihlanganisi ni vanhu van’wana, n’wina mi hlanganisa vanhu!” Vaaki vo tala va le Kaliningrad ku ya eKamchatka a va tshiki ku vulavula hi vun’we lebyi kombisiwaka hi vanhu va Xikwembu loko va hlengeletanile leswaku va dyondza Bibele. Hambileswi minkarhi yin’wana va byeriwaka leswaku tindhawu leti va ti hirheke a swi nge he koteki leswaku va ti tirhisa, sweswo a swi yi cinci ndlela leyi va byi langutaka ha yona vulawuri ni ndlela leyi va va langutaka ha yona vanhu-kulobye.

Ku nga khathariseki xiyimo lexi Timbhoni ta Yehovha ta le Rhaxiya ti langutanaka na xona, ti hambeta ti khoma mintsombano ya tona hi ntsako. Ti khongelela leswaku ‘tihosi ni hinkwavo lava nga eswiyin’weni leswi tlakukeke; va ya emahlweni va hanya vutomi byo rhula ni byo hola hi ku tinyiketela loku heleleke loku nga ni vukwembu ni ku tiyimisela.’—1 Timotiya 2:2.

[Marito lama tshahiweke exihlokweni lama nga eka tluka 27]

Un’wana wa Timbhoni leti pfuneteke hi ku tirhandzela entsombanweni lowu khomeriweke enhoveni

[Marito lama tshahiweke exihlokweni lama nga eka tluka 29]

Timbhoni ta Yehovha ta le Rhaxiya ti ya emahlweni ti kombisa moya wo “rhula ni [wo] hola hi ku tinyiketela loku heleleke loku nga ni vukwembu”

[Swifaniso leswi nga eka tluka 28]

Vatirhi va ku tirhandzela lava tirhaka hi vun’we leswaku va basisa ndhawu leyi ntsombano wu nga ta khomeriwa eka yona ni lava swekelaka magidi ya vapfhumba lava teke entsombanweni

[Swifaniso leswi nga eka tluka 29]

Un’wana ni un’wana u tiphine hi nongonoko wa swa moya a tlhela a tlangela ku tikarhata loku endliweke hi vatirhi va ku tirhandzela