Xana Timbhoni Ta Yehovha Ta Va Tirhisa Vavasati Leswaku Va Dyondzisa?

Ina, Timbhoni ta Yehovha emisaveni hinkwayo ti ni vavasati va timiliyoni lava dyondzisaka. I ntshungu lowukulu wa vachumayeri va mahungu lamanene ya Mfumo wa Xikwembu. Loko Pisalema 68:11 yi profeta hi vachumayeri volavo yi ri: “Yehovha u vula marito lawa; vavasati lava vulaka mahungu lamanene i vuthu lerikulu.”

Hambiswiritano, u nga hlanganisi ku dyondzisa ka vavasati lava nga Timbhoni ta Yehovha ni ku dyondzisa ka vavasati lava nga eka tikereke tin’wana. Ku ni nchumu wun’wana lowu va hambanisaka. Xana va hambane hi tindlela tihi?

Tindhawu leti va dyondzisaka eka tona a ti fani. Vavasati lava nga vafundhisi ngopfu-ngopfu va Vujagana, va tilavela swikhundlha etikerekeni ta vona naswona vanhu lava va va dyondzisaka hi lava nga ekerekeni. Vavasati lava nga Timbhoni ta Yehovha va dyondzisa ehandle ka vandlha, ko tanihi hi le vanhwini lava va hlanganaka na vona entirhweni wa nsimu wa yindlu ni yindlu ni kun’wana.

Ndlela yin’wana leyi vavasati lava nga Timbhoni ta Yehovha va hambanaka ha yona ni lava nga evukhongerini byin’wana i ntirho wa vona evandlheni. Vavasati lava nga vafundhisi etikerekeni ta Vujagana ni le tikerekeni tin’wana va rhangela ni ku letela swirho swa kereke ya vona hi dyondzo ya vukhongeri bya vona. Hambiswiritano, vavasati lava nga Timbhoni ta Yehovha a va dyondzisi evandlheni loko vavanuna lava khuvuriweke va ri kona. I vavanuna lava hlawuriweke tanihi vadyondzisi ntsena lava faneleke va endla tano.—1 Timotiya 3:2; Yakobo 3:1.

Bibele yi vulavula hi vavanuna tanihi vona ntsena lava nyikiweke vutihlamuleri byo rhangela evandlheni. Xiya xikombiso lexi vekiweke hi muapostola Pawulo loko a tsalela mulanguteri-kulobye, ku nga Tito a ku: “Hikwalaho ka leswi, ndzi ku siye eKreta, leswaku u . . . veka vakulukumba emutini wun’wana ni wun’wana.” Pawulo u engetele hi ku vula leswaku wanuna un’wana ni un’wana loyi a hlawuriweke a a fanele a ‘pfumala xihehlo, a va nuna wa nsati un’we.’ (Tito 1:5, 6) Pawulo u nyike Timotiya swiletelo leswi fanaka eka papila rakwe leri vulavulaka hi malunghiselelo ya vandlha a ku: “Loko munhu un’wana ni un’wana a lwela ku fikelela ntirho wa ku va mulanguteri, u navela ntirho lowunene. Hikokwalaho mulanguteri u fanele a pfumala xisandzu, a ri nuna la nga ni nsati un’we, . . . a fanelekela ku dyondzisa.”—1 Timotiya 3:1, 2.

Ha yini vutihlamuleri evandlheni byi nyikiwe vavanuna ntsena? Pawulo u ri: “A ndzi n’wi pfumeleli wansati leswaku a dyondzisa, kumbe ku lawula wanuna, kambe a a miyele. Hikuva ku rhange Adamu a vumbiwa ivi ku landzela Evha.” (1 Timotiya 2:12, 13) Xisweswo, ndlela leyi xi vumbeke swilo ha yona yi kombisa xivangelo lexi endleke leswaku Xikwembu xi nyika vavanuna vutihlamuleri byo dyondzisa ni ku va varhangeri.

Vatirheli va Yehovha va landzela xikombiso xa Murhangeri wa vona Yesu Kreste. Mudyondzisiwa Luka u tsale leswi malunghana ni vutirheli bya Yesu: “A famba hi muti ni muti ni hi ximutana ni ximutana, a chumayela ni ku vula mahungu lamanene ya mfumo wa Xikwembu.” Endzhakunyana, Yesu u rhume valandzeri vakwe ku endla ntirho lowu fanaka: “Va tsemakanya tiko hi ximutana ni ximutana, va vula mahungu lamanene.”—Luka 8:1; 9:2-6.

Namuntlha, vatirheli va Yehovha—vavanuna ni vavasati—va hiseka swinene leswaku va hetisisa leswi Yesu a swi profeteke: “Mahungu lamanene lawa ya mfumo ma ta chumayeriwa emisaveni hinkwayo leyi akiweke leswaku byi va vumbhoni ematikweni hinkwawo; kutani hi kona makumu ma nga ta fika.”—Matewu 24:14.