“Xana Yehovha U Kombela Leswaku U N’wi Tlherisela Yini?”

I YINI leswi Yehovha a swi languteleke eka vanhu lava lavaka ku n’wi gandzela hilaha ku amukelekaka? Xana u lava hi endla swilo hi ku hetiseka, ku nga leswi endlaka hina vanhu lava nga hetisekangiki hi nga swi koti ku n’wi tsakisa? Kumbexana u langutele ntsena swilo leswi hi nga ta ka hi nga swi koti ku swi endla? Tinhlamulo ta swivutiso sweswo i ta nkoka leswaku hi tirhela Xikwembu hi tsakile. A hi kambisiseni ndlela leyi muprofeta Mikiya a swi katsakanyeke ha yona leswi Xikwembu xi swi languteleke.—Hlaya Mikiya 6:8.

“U ku byerile leswi swi nga swinene.” A swi kali swi lava hi mbambela leswi Xikwembu xi swi languteleke eka hina. Xi swi xaxamete kahle eBibeleni. Leswi Xikwembu xi hi kombelaka swona i “swinene.” “Xikwembu i rirhandzu” kutani xi hi navelela leswinene. (1 Yohane 4:8; 5:3) Loko hi endla leswi xi swi languteleke a swi tsakisi xona ntsena kambe na hina swa hi vuyerisa.—Deteronoma 10:12, 13.

“Xana Yehovha u kombela leswaku u n’wi tlherisela yini?” Xana Xikwembu xi ni mfanelo yo kombela leswaku hi xi tlherisela swin’wana? Ina, xi na yona! Hi fanele hi xi yingisa tanihi Xihlovo ni Muhlayisi wa vutomi. (Pisalema 36:9) Kutani i yini leswi xi kombelaka leswaku hi xi tlherisela swona? Mikiya u katsakanye leswi Xikwembu xi swi languteleke hi swivulwa swinharhu. Timfanelo timbirhi to sungula ti katsa ndlela leyi hi tirhisanaka ha yona ni vanhu-kulorhi kasi ya vunharhu yi katsa vuxaka bya hina na Xikwembu.

“Ku kombisa vululami.” Rito ra Xiheveru leri nge “vululami,” hi ku ya hi buku ya tinhlamuselo ta Bibele “ri katsa ku va vaaki va va ni vuxaka lebyinene.” Xikwembu xi hi kombela leswaku hi khoma van’wana hi ku ya hi milawu ya xona. Hi kombisa vululami hi ku va hi nga vi ni xihlawuhlawu, hi va lava lulameke ni lava tshembekaka loko hi tirhisana ni van’wana. (Levhitika 19:15; Esaya 1:17; Vaheveru 13:18) Loko hi kombisa van’wana vululami, na vona va nga ha susumeteleka ku hi kombisa vululami.—Matewu 7:12.

“Ku rhandza musa.” Xikwembu a xi hi kombeli ku kombisa musa ntsena kambe ni leswaku hi wu rhandza. Rito ra Xiheveru leri hundzuluxeriweke ri va “musa” (cheʹsedh) ri nga ha tlhela ri hundzuluxeriwa ri va “tintswalo ta rirhandzu” kumbe “rirhandzu ro tshembeka.” Xidyondzi xin’wana xa Bibele xi ri: “Rirhandzu, tintswalo ni musa swa tirhisana hinkwaswo ka swona ku hava lexi tlulaka xin’wana.” Loko hi rhandza musa, hi wu kombisa hi ku swi rhandza; naswona hi kuma ntsako loko hi pfuna lava pfumalaka. Hikwalaho ka sweswo, hi va ni ntsako lowu tisiwaka hi ku nyika.—Mintirho 20:35.

“Ku titsongahata loko u famba ni Xikwembu xa wena.” EBibeleni, xiga lexi nge “ku famba” xi vula “ku landzela mukhuva wo karhi.” Hi famba ni Xikwembu loko hi landzela ndlela leyi xi yi xaxameteke eBibeleni. Hi fanele hi “titsongahata” leswaku hi landzela ndlela yo tano. Njhani? Loko hi titsongahata emahlweni ka Xikwembu, entiyisweni hi ringanisa xiyimo xa hina ni xa xona kutani hi xiya ku tsana ka hina. Hikokwalaho, “ku famba hi ku titsongahata” swi vula ku va ni langutelo lerinene hi leswi xi swi languteleke eka hina ni leswi hi nga swi endlaka.

Lexi tsakisaka, Yehovha a nge pfuki a lave swo tala ku tlula leswi hi nga swi endlaka. U tsakisiwa hi matshalatshala ya hina lamakulu ya leswaku hi n’wi tirhela. (Vakolosa 3:23) U twisisa ku tsana ka hina. (Pisalema 103:14) Loko hi xichavo na hina hi dyondza ku ku amukela, hi nga kuma ntsako hi ku famba na yena. Ha yini u nga dyondzi ndlela leyi u nga sungulaka ku famba ni Xikwembu ha yona? Loko hi endla tano hi ta kuma mikateko yo tala leyi humaka eka xona.—Swivuriso 10:22.