Swin’wana Leswi Vhumbhiweke Swi Endlekile Kambe Swo Tala A Swi Endlekanga

Xana u nga swi tsakela ku tiva vumundzuku bya wena? Lexi i xivutiso lexi vanhu vo tala va tsakelaka ku tiva nhlamulo ya xona. Ku ni vo tala lava vhumbhaka hi swiendlakalo swa nkarhi lowu taka kambe ku va ni vuyelo byo hambana-hambana. Xiya leswi landzelaka:

• VAN’WASAYENSE va tirhisa switirhisiwa swa xiyimo xa le henhla ni mali yo tala leswaku va kota ku vhumbha swilo swo hambana-hambana, swo tanihi ndlela leyi nthyakiso wu nga ta khumba misava ha yona ni loko ku ta va ni mpfula.

• VAKAMBISISI LAVA NGA NI VUTSHILA va vhumbha hi ku cinca loku nga ta va kona eka timhaka ta mabindzu ni ta tipolitiki. Warren Buffett ku nga un’wana wa swigili emisaveni, ku vuriwa leswaku u ni vuswikoti byo vhumbha eka swa mabindzu. Mukambisisi un’wana loyi a vuriwaka Nate Silver, u hlayele tinhlayo hi ndlela yakwe leswaku a kota ku vhumbha hi vumundzuku bya swa tipolitiki ta le United States ni lava a va ta kuma masagwadi eka tifilimi ta le Hollywood.

• RUNGULA RA KHALE ri tekiwa tanihi vuprofeta. Vanhu van’wana namuntlha va teka ku hetiseka ka rungula leri tsariweke hi Michel de Notredame (Nostradamus) hi va-1500. Khalendara ya Mayan leyi heleke hi December 21, 2012, van’wana va vule leswaku i xikombiso xa swiendlakalo swo chavisa swa nkarhi lowu taka.

• VAFUNDHISI minkarhi yin’wana va vhumbha swiendlakalo swa misava swo chavisa leswaku va lemukisa vanhu ni leswaku va ta ti kumela valandzeri. Muprofeta Harold Camping swin’we ni valandzeri vakwe lava profeteke hi ku hela ka misava, va tivise leswaku misava yi ta herisiwa hi 2011. Lexi hlamarisaka hileswaku misava ya ha ri kona ninamuntlha.

• VAKAMBISISI VA MIEHLEKETO va vula leswaku va ni vuswikoti byo vhumbha hi vumundzuku. Edgar Cayce na Jeane Dixon va pakanisile loko va vhumbhe hi swin’wana swa swiendlakalo swa kwalomu ka va-1900. Kambe hinkwavo va vhumbhe swilo swo tala leswi nga endlekangiki. Hi xikombiso, Dixon u vhumbhe hi Nyimpi Ya Vunharhu Ya Misava hi 1958 naswona Cayce u vhumbhe leswaku New York yi ta mbombomela elwandle hi va-1970.

Xana yi kona ndlela leyi u nga yi tshembaka yo kota ku vona vumundzuku? Xivutiso lexi i xa nkoka swinene. Loko a wo kota ku vona swiendlakalo leswi swa ha taka ka ha ri mahlweni, vutomi bya wena a byi nge vi ha yona ndlela leyi byi nga ha yona sweswi.