3 Yi Nga Ku Pfuna Leswaku U Kota Ku Langutana Ni Swiyimo Swo Tika

Ku ni swiyimo leswi hi nga ta ka hi nga swi koti ku swi cinca kumbe ku swi balekela. Hi xikombiso, loko u feriwe hi loyi u n’wi rhandzaka kumbe u ri ni vuvabyi lebyi nga tshungulekiki, u nga ha tikuma u nga ri na lexi u nga xi endlaka handle ko lava ndlela yo langutana na swona. Xana Bibele yi nga ku pfuna eka swiyimo swo tano swo tika?

LOKO U RI NI VUVABYI LEBYI NGA TSHUNGULEKIKI

Rose u ri: “Ndzi ni vuvabyi bya xitekela lebyi ndzi karhataka swinene. Rihanyo ra mina ri tsane ngopfu.” Xin’wana lexi a xi n’wi karhata swinene hileswi mikarhi yin’wana, a nga swi koti ku dzikisa mianakanyo yakwe loko a dyondza Bibele ni loko a endla swilo leswi a swi ta tiyisa vuxaka byakwe na Xikwembu. Kambe u pfuniwe swinene hi marito ya Yesu lama kumekaka eka Matewu 19:26 leyi nge: “Eka Xikwembu swilo hinkwaswo swa koteka.” Rose u dyondze leswaku ku hlaya a ku nga ri yona ntsena ndlela yo dyondza. Leswi switlhavi swa yena a swi endla leswaku mikarhi yin’wana a nga swi koti ku hlaya, u sungule ku yingisela Bibele leyi rhekhodiweke ni minkandziyiso leyi seketeriweke eBibeleni.a Rose U ri: “Handle ka sweswo, a ndzi swi tivi leswaku a ndzi ta byi tiyisa njhani vuxaka bya mina na Xikwembu.”

Loko Rose a hetiwa matimba hileswi a nga ha swi koti ku hlaya, u chaveleriwe hi marito lama nga eka 2 Vakorinto 8:12 leyi nge: “Hikuva loko ku lungheka ku ri kona ku sungula, swi amukeleka hi ku hlawuleka hi ku ya hi leswi munhu a nga na swona, ku nga ri hi leswi a nga riki na swona.” Marito wolawo ma tsundzuxe Rose leswaku Xikwembu xa tsaka hi leswi a swi endlaka hikuva u endla leswi nga ematimbeni ya yena.

LOKO U FERIWILE

Delphine loyi a boxiweke eka swihloko leswi hundzeke wa hlamusela: “Endzhaku ko feriwa hi ntombhi ya mina leyi a yi ri na malembe ya 18, ndzi twe ku vava ngopfu lerova a ndzi nga tshembi leswaku ndzi ta swi kota ku ya emahlweni ndzi hanya. Swilo a swi nga ha ta fana.” Hambiswiritano, u kume nchavelelo eka tsalwa ra Pisalema 94:19, laha mupisalema a byeleke Xikwembu a ku: “Loko miehleketo ya mina leyi ndzi karhataka yi tele endzeni ka mina, Nchavelelo wa wena wu sungule ku vukarha moya-xiviri wa mina.” Delphine u ri: “Ndzi khongele eka Yehovha leswaku a ndzi pfuna ndzi kuma leswi ndzi nga swi endlaka leswaku ndzi ta hlakarhela.”

Kutani Delphine u tinyiketele ku endla ntirho wo tirhandzela. Hi ku famba ka nkarhi, u tifanise na khirayoni, u vule leswaku hambi loko yi tshovekile ya ha swi kota ku sasekisa. Hilaha ku fanaka, hambileswi a ha twa ku vava kambe u dyondze leswaku a nga swi kota ku pfuna van’wana. U ri: “Hi ku hatlisa, ndzi xiye leswaku loko ndzi tirhisa misinya ya milawu ya le Bibeleni ku chavelela lava ndzi va dyondzisaka Bibele, yoleyo a ku ri ndlela leyi Yehovha a ndzi chavelelaka ni ku ndzi pfuna leswaku ndzi hlakarhela.” U tsale mavito ya vanhu va le Bibeleni lava tshameke va langutana ni swiyimo swo tika. Loko a hlamusela u ri: “Ndzi kume leswaku hinkwavo ka vona a va titshege hi Xikwembu.” U tlhele a dyondza leswaku “loko munhu a nga yi hlayi Bibele, a nge swi koti ku langutana ni swiphiqo.”

Ku dyondza Bibele swi dyondzise Delphine ku anakanya hi vumundzuku, ematshan’weni ya swilo leswi hundzeke. U chaveleriwa hi ntshembo lowu boxiweke eka Mintirho 24:15 leyi nge: “Ku ta va ni ku pfuxiwa ka lava lulameke ni ka lava nga lulamangiki.” Xana Delphine wa tiyiseka leswaku Yehovha u ta pfuxa n’wana wakwe eku feni? Loko a hlamula u ri: “Ndzi tivona ndzi ri ni n’wana wa mina emisaveni leyintshwa. Ndzi ni ntshembo lowu tiyeke wa leswaku Xikwembu xi ta pfuxa vafi. Ndzi tivona ndzi ri na ntombhi ya mina eparadeyisini naswona ndzi yi rhandza hilaha ndzi yi rhandzeke ha kona loko ya ha ku tswariwa.”

a Rungula ro tano leri rhekhodiweke ra kumeka eka website ya jw.org/ts.

Bibele yi nga ku chavelela ni loko u ri eka swiyimo swo tika

XANA XIKWEMBU XI NGA HI PFUNA NJHANI?

Bibele yi xi hlamula kahle xivutiso xexo. Yi ri: “Yehovha u le kusuhi ni hinkwavo lava n’wi vitanaka, Eka hinkwavo lava n’wi vitanaka hi ntiyiso. U ta enerisa ku navela ka lava va n’wi chavaka, Naswona u ta ku twa ku rila ka vona va kombela ku pfuniwa, u ta va ponisa.” (Pisalema 145:18, 19) Xana a swi khutazi ku tiva sweswo? Xana Xikwembu xi ta swi hlamula njhani swikhongelo swa vanhu lava lavaka nkongomiso wa xona hi mbilu hinkwayo?

HI KU HI NYIKA MATIMBA:

Hakanyingi swiphiqo swi nga hi heta matimba, swi hi endla hi karhateka ni ku tsanisa vuxaka bya hina ni Xikwembu. (Swivuriso 24:10) Kambe “Loyi a karhaleke [Yehovha] u n’wi nyika matimba; kasi loyi a nga riki na wona matimba lamakulu u n’wi engetelela matimba.” (Esaya 40:29) Muapostola Pawulo loyi a tiyiseleke miringo yo tika u te: “Eka swilo hinkwaswo ndzi ni ntamu hikwalaho ka loyi a ndzi nyikaka matimba.” (Vafilipiya 4:13) Pawulo u pfuniwe hi moya wa Xikwembu lowo kwetsima. Na wena u nga kombela Xikwembu leswaku xi ku nyika moya lowo kwetsima.—Luka 11:13.

HI KU HI NYIKA VUTLHARI:

Xana u lava ku pfuniwa ku twisisa ni ku tlhela u hanya hi ndzayo ya Bibele? Mudyondzisiwa Yakobo u tsale a ku: “Loko mani na mani eka n’wina a kayivela vutlhari, a a hambete a kombela eka Xikwembu, hikuva xi nyika hinkwavo hi mbilu yo basa, handle ka ku sandza; kutani u ta nyikiwa byona.” (Yakobo 1:5) Kombisa leswaku u hanya hi ku pfumelelana ni swikhongelo swa wena hi ku hlaya Bibele ni ku hanya hi leswi u swi dyondzaka eka yona. (Yakobo 1:23-25) Loko u endla tano u ta tivonela hi ya wena leswaku i vutlhari ku tirhisa ndzayo ya Bibele.

HI KU HI NYIKA KU RHULA:

Hambiloko u tshikilelekile swinene, Yehovha a nga ku pfuna leswaku u va ni ku rhula. Rito rakwe ri ri: “Mi nga vileli ha nchumu, kambe eka hinkwaswo tivisani Xikwembu swikombelo swa n’wina hi xikhongelo ni xikombelo swin’we ni ku nkhensa swikombelo swa n’wina; kutani ku rhula ka Xikwembu loku tlulaka miehleketo hinkwayo ku ta rindza timbilu ta n’wina ni matimba ya n’wina ya mianakanyo ha Kreste Yesu.” (Vafilipiya 4:6, 7) Hikwalaho, kombela Yehovha a ku nyika ku rhula.

Kambe, u ta endla yini loko swiphiqo swa wena swi nga hatli swi hela? U nga gimeti hi ku vula leswaku Xikwembu xi ku fularherile. Hambiloko swiphiqo swa wena swi nga heli, Xikwembu xi ta ku nyika xivindzi ni matimba leswaku u kota ku tiyisela. (1 Vakorinto 10:13) Bibele yi tlhela yi tshembisa leswaku ku ta fika nkarhi lowu swiphiqo swa hina swi nga ta heriseriwa makumu!