Pgn

Tanihi Ndyangu

1 Ndyangu lowu tinyiketeleke lowu katsekaka swinene entirhweni lowo hlawuleka—tatana, manana ni vana va tirhela Xikwembu hi mbilu hinkwayo—wu dzunisa vito lerikulu ra Yehova. Ha tsaka leswi mindyangu yo tala yo tano yi kumekaka emabandlheni ya vanhu va Yehova emisaveni hinkwayo.

2 Kavula, tatana u na vutihlamuleri byo sungula byo khathalela swilaveko swa moya swa ndyangu wa yena. (1 Vakor. 11:3) Hi ntirhisano wa nsati ni vana va yena, ndyangu wa yena wu nga nyika nhlohlotelo lowo tiya eka van’wana. (Mat. 5:16) Hi swihi swivandla swin’wana leswi ntirhisano lowu wu nga kombisiwaka eka swona?

VATSWARI VA RHANGELA

3 Hi minkarhi yo tala, tatana a nga ha va nkulu kumbe nandza wa vutirheli. Leswi swi vula leswaku ku tlhandlekela eku khathaleleni ka ndyangu wa yena, wun’wana wa nkarhi ni nyingiso wa yena swi fanele ku nyikiwa timhaka ta bandlha. Vutihlamuleri bya tatana i ku vona leswaku nkarhi lowu nga kona wa hleriwa leswaku ndyangu wa yena wu nga honisiwi. Leswi a swi nge olovi hi minkarhi hinkwayo hikwalaho ka swilaveko leswi endliwaka eka nkarhi wa yena lowu hikiweke. Kambe hikwalaho ka leswi ndyangu wa yena wu nga vutihlamuleri bya yena lebyikulu, u fanele nkarhi na nkarhi a lunghiselela wun’wana wa nkarhi wa yena lowu nga ni ntikelo leswaku a va ni ndyangu wa yena eku dyondzeni, entirhweni wa nsimu, eminhlanganweni ni le ku tihungaseni loku faneleke. Swiyimo ni vutihlamuleri byin’wana swi nga ha hundzula xiyimiso xa tatana nkarhi na nkarhi, kambe swi vuyerisa swonghasi loko a nga heta nkarhi n’hweti na n’hweti entirhweni wa nsimu ni swirho swa ndyangu!

4 Ntirhisano lowu humaka eka nsati i wa ntikelo. A nga tatisa nuna wa yena hi ndlela ya nkoka swinene hi ku pfuneta ku letela vana evutirhelini. Ku chivirika ni ku tinyiketela ka yena loku nga xikombiso ku ta endla swo tala ku kucetela vana leswaku va kula va ri karhi va tlangela vutirheli.—2 Tim. 3:14, 15.

5 Ku na swikombiso swo tala leswinene swa swiyimo leswi mutswari un’we a rhwaleke ndzhwalo wa moya wa vutihlamuleri naswona a letela vana evutirhelini hi ndlela leyi humelelaka. Hikwalaho ka xikombiso lexinene xa manana kumbe tata wa vona, vantshwa vo tala va teke xiyimo lexi tiyeke xa ntiyiso, hambi ku ri ku teka vutirheli bya nkarhi hinkwawo.

VUTIHLAMULERI BYA VANA

6 Ku vuriwa yini hi vutihlamuleri bya vana? Hambi ku ri N’wana loyi a hetisekeke wa Xikwembu, Yesu, loko a ha ri n’wana lontsongo a a titsongahatela vukongomisi ni vuleteri bya vatswari va yena. (Luka 2:51) Hikwalaho, loko tatana na manana va lunghiselela leswaku ndyangu wu heta nkarhi wu ri swin’we evutirhelini, i ndzhwalo wa vana ku kombisa ku chava ka vona Xikwembu hi ku tirhisana ni vatswari va vona.—Vaef. 6:1-3.

7 Ku tirhisa vugandzeri swin’we tanihi ndyangu—ku dyondza, ku hlanganyela evutirhelini bya nsimu ni ku va kona eminhlanganweni—swi tiyisa swiboho swa rirhandzu ni vun’we endyangwini. Vatswari ni vana va ni vutihlamuleri emhakeni leyi.