Ku Twarisa Mahungu Lamanene

Hi Ku Nyikela Vumbhoni eXitarateni

1 Swivuriso 1:20 yi ri: “Vutlhari byi huwelela ehandle, byi tlakusa rito emitsendzeleni.” Marito lawa i ya ntiyiso namuntlha tanihi leswi malandza ya Yehova ma chumayelaka mahungu lamanene ya Mfumo hi ku chivirika hambi kwihi laha va nga kumaka vanhu kona. Tanihi Yesu ni vaprofeta va le mahlweni ka Vukriste, rirhandzu ra hina ra xiviri hi vanhu ri hi susumetela ku twarisa ntiyiso eka un’wana ni un’wana, kun’wana ni kun’wana.—Yer. 11:6; Marka 6:56; Luka 13:22, 26.

2 Hambi leswi kaya ra munhu hi ntolovelo ku nga ndhawu leyi tsakisaka swinene yo vulavula na yena hi ntiyiso, a hi vanhu vo tala lava nga ekaya loko hi endla maendzo ya yindlu na yindlu. Loko vini va miti va ri ekaya, hakanyingi i munhu loyi hi tshameke hi vulavula na yena loyi a pfulaka rivanti, naswona swirho swin’wana swa ndyangu a swi kumiwi. Xisweswo, ku nyikela vumbhoni exitarateni ku fanele ku va ni xiphemu lexi heleleke evutirhelini bya hina. Hi laha phayona rin’wana ri swi kombiseke ha kona, u nga ha kuma leswaku ku veka vumbhoni exitarateni i, “nsimu leyi nyanyulaka, leyi phyuphyisaka ni leyi tsakisaka.”

LANGUTELO LERINENE LERI KUFUMELAKA

3 Ha yini u nga ringeti ku nyikela vumbhoni exitarateni endhawini leyi fanaka nkarhi na nkarhi? Makwerhu un’wana wa xisati loyi a endlaka leswi u vula leswaku u kote ku tolovelana ni vaxavisi vo tala ni vanhu van’wana lava hi ntolovelo va nga exitarateni xa “yena.” Vuxaka lebyinene byi sungurile, naswona byi pfule ndlela ya mabulo yo tala ya Bibele lama vekaka mihandzu. Phayona leri pfunaka leri ri tiphinaka swinene hi ku nyikela vumbhoni exitarateni ri vule leswaku ri ringeta ku tshinelela lava langutaka exitolo hi mafasitere, vanhu lava tshameke emimovheni ya vona, vanhu lava yimeleke mabazi ni lava va aleke eminkarhini leyi hundzeke. Vurhena ni ku avanyisa lokunene swa laveka leswaku hi va ni xivindzi ni ku phikelela, kambe hi nga phikeleli ngopfu.

4 Xilotlelo xa ku nyikela vumbhoni exitarateni hi laha ku humelelaka i ku va ni ku tshinelela loku kufumelaka, ka rirhandzu ni ka ku tiyimisela. N’wayitela. Koka nyingiso wa munhu loko u swi kota, kambe loko u nga swi koti, yana emahlweni u endla ku tshinelela ka xinghana. Xiya swiyimo ivi u swi tirhisa. Makwerhu un’wana wa xisati u vona vavasati lava rhwaleke minkwama ya swakudya ivi a ku, “Ndza swi vona leswaku a mi ri karhi mi xava swakudya. Entiyisweni swa durha masiku lawa. Ku vuriwa yini hi swakudya swin’wana leswi khutazaka swa mianakanyo ni mbilu? Ndzi tsakele xihloko lexi . . . .” Eka un’wana la nga ni vana, u ri, “Ndza swi vona leswaku u na vana vambirhi lava rhandzekaka. Xana a wu swi tiva leswaku Bibele yi ri vana i nkateko lowu humaka eka Xikwembu? Hi laha, ingi ndzi ku komba . . . .” Loko a tshinelela munhu loyi a nga eku ehleketeni swinene, u ri, “Ndza swi vona leswaku u ehleketa hi xo karhi. Misava yi tele hi swiphiqo namuntlha, a swi tano xana? Xana u ehleketa leswaku nkarhi wu ta fika lowu . . . ?”

5 Loko munhu a hundza exitarateni hi ku hatlisa, u nga ha n’wi nyika xiphephana ntsena hi marito lama nge, “Hi lawa mahungu lamanene leswaku u ma hlaya loko u kuma nkarhi.” Loko vanhu va tikomba va nga jahanga, nyikela timagazini. I swinene ku fambisa tibuku eka vanhu loko swi koteka.

6 Vahuweleri vo tala lava eku sunguleni a va chava ku nyikela vumbhoni exitarateni sweswi va ku languta tanihi ndlela ya vona leyi rhandzekaka yo chumayela. Kavula, ku xiya-xiya ku fanele ku kombisiwa loko ku tirhiwa eka tindhawu leti nga ni khombo kumbe hi minkarhi leyi ku nga riki na vuhlayiseki. Hambi ku ri emadorobeni lamantsongo, hi ntolovelo ku na tindhawu leti nga bizi, tindhawu ta ntleketlo wa vanhu kumbe tindhawu to paka ka tona laha vanhu va nga tshineleriwaka ni mahungu lamanene. Tirhisa nkarhi lowu, naswona hi vutlhari rito ra wena a ri twarise mahungu lamanene eswitarateni ni le timbaleni, swi yisa mikateko eka vayingiseri ni ku dzuneka eka Yehova.—Swiv. 1:20.