Bokisi Ra Swivutiso

● Ha yini ku bumabumeriwa leswaku vahuweleri va tirha ni bandlha leri khomeke nsimu leyi va tshamaka eka yona?

Bokisi Ra Swivutiso eka Vutirheli Bya Hina Bya Mfumo bya November 1990 ri hlamusele xivutiso lexi hi vutalo. Hi lava ku phofula ku tlangela hi ku angula lokunene loku vamakwerhu va ku kombiseke eka xihloko lexi. Swiviko leswi humaka eka valanguteri vo tala va swifundza swi komba leswaku vakulu ni malandza yo tala ya vutirheli va rhangela eku hlanganyeleni ni bandlha leri nga ensin’wini leyi va tshamaka eka yona. Vahuweleri vo tala va landzele xikombiso xa vona lexinene. Hikwalaho xikongomelo xa xihloko lexi i ku tsundzuxa vamakwerhu hinkwavo hi nkongomiso lowu Sosayiti yi wu nyikeleke emhakeni leyi.

I swa nkoka ku endla swilo hi ndlela leyi hlelekeke ni ya le tilweni. Muapostola Pawulo u tsarile: “Hikuva Xikwembu a hi Xikwembu xa mpfilumpfilu, kambe i xa ku rhula. . . . Ntsena hinkwaswo a swi endliwe hi mukhuva lowo saseka, hi nawu wa kona.”—1 Vakor. 14:33, 40.

Loko ku ri ni ku tsandzeka ko karhi hikwalaho ka ku nonon’hwa ka swo famba, swiyimiso swa ntirho wo tihanyisa kumbe xilaveko xo pfuna ku langutela, hakanyingi swa antswa ku va kona ebandlheni ra nsimu leyi hi tshamaka eka yona. Leswi swi endla leswaku ntirho wa nsimu wu tsakisa naswona hi nga boheki ku teka riendzo ro leha leswaku hi ya tirha ni ntlawa lowu nga ekule. Swi hi veka eka xiyimo lexi antswaka xo tirha ni van’wana ebandlheni ra hina ni ku kongomisa lavantshwa lava ha ku tsakelaka emihlangan’weni leyi nga ekusuhi na vona. Naswona swi hi hlayisa hi ri ekusuhi ni vamakwerhu va hina va xinuna ni va xisati eka ndhawu ya hina, lava nga ta hi pfuna loko hi lava mpfuno.

Hi ku tirha hi ku titsongahata eka malunghiselelo lama endliweke, hi kombisa leswaku hi rhangisa swilaveko swa Mfumo. (Luka 16:10) Loko bandlha lerintshwa ri vumbiwa kumbe Tidyondzo Ta Buku Ya Bandlha ti hleriwa hi ndlela yin’wana, hi nga ha tsakela ku sala ni vanghana vo karhi. Kambe hi ku amukela lunghiselelo lerintshwa, hi nga ha endla vanghana lavantshwa kutani hi kurisa xinghana xa hina xa swa le tilweni. Nakambe, swa olova eka vakulu ku risa ntlhambi ni ku antswisa xiyimo xa moya xa bandlha loko vahuweleri va tshama ensin’wini ya bandlha leri va hlanganyelaka na rona.