Ku Chumayela Hi Ntlawa Swa Tsakisa

¹ Loko a rhuma vadyondzisiwa va 70 leswaku va ya chumayela, Yesu u va dyondzise leswi va faneleke ku swi vula, a va fambisa hi vambirhi-mbirhi, kutani a va nyika nsimu leyi va faneleke va yi tirha. Leswi swi endle leswaku va kuma ntsako. (Luka 10:1-17) Hilaha ku fanaka ni namuntlha, ku chumayela hi ntlawa swi hlomisa vanhu va Xikwembu, swi va endla va hleleka ni ku va khutaza entirhweni wo chumayela.

² Vakulu Va Rhangela: Vakulu hi vona va pfunaka hinkwerhu leswaku hi hlanganyela nkarhi na nkarhi entirhweni wo chumayela. Mulanguteri wa ntirho hi yena la rhangelaka eku endleni ka malunghiselelo ya ntirho wa le xikarhi ka vhiki. Mulanguteri un’wana ni un’wana wa dyondzo ya buku u ni vutihlamuleri byo hlela ntirho lowu endliwaka hi ntlawa wa yena, ngopfu-ngopfu hi mahelo-vhiki. Nkarhi wun’wana loko vandlha hinkwaro ri hlangana leswaku ri lunghiselela ku ya ensin’wini, tanihi le ndzhaku ka Dyondzo ya Xihondzo xo Rindza, mulanguteri un’wana ni un’wana wa dyondzo ya buku u fanele a khathalela swilaveko swa ntlawa wa yena.

³ “Hi Ku Tenga Ni Hi Ku Hleleka”: Loyi a hlawuriweke leswaku a fambisa nhlangano wa ntirho wa nsimu u fanele a sungula hi nkarhi naswona u fanele a endla leswaku nhlangano wu nga hundzi timinete ta 10 kumbe ta 15. U fanele a ava vahuweleri a tlhela a va nyika nsimu (handle ka loko leswi swi ta endliwa hi valanguteri va dyondzo ya buku, hilaha swi kombisiweke ha kona eku sunguleni) a nga si pfala hi xikhongelo. Leswi swi ta pfuna leswaku vahuweleri va nga hlengeletani endhawini yin’we laha nsimu yi nga ta tirhiwa kona, hikuva leswi swi nga endla ntirho wa hina wu languteriwa ehansi. Nakambe leswi swi pfumelelana ni ndzayo ya Pawulo leyi nge: “Swilo hinkwaswo a swi endliwe hi ku tenga ni hi ku hleleka.” (1 Kor. 14:40) Hinkwavo lava yaka enhlanganweni wa ntirho wa nsimu va fanele va endla leswaku lunghiselelo leri ri humelela hi ku fika hi nkarhi, va tirhisana ni loyi a rhangelaka va tlhela va hatla va famba loko nhlangano lowu wu hela.

⁴ Ku Tolovelana: Malunghiselelo ya ku chumayela hi ntlawa ma endla leswaku hi va ni nkarhi lowunene ngopfu wo tolovelana ni van’wana evandlheni. Hambiloko swi nga bihanga ku endla malunghiselelo yo tirha ni un’wana ka ha ri emahlweni, swi nga hi vuyerisa minkarhi yin’wana ku ya enhlanganweni wa ntirho wa nsimu hi nga hlelanga leswaku hi ta tirha na mani. Hi nga ha aviwa ku ya tirha ni munhu loyi hi nga n’wi tolovelangiki ngopfu, leswi swi ta endla leswaku hi kota ku ‘ndlandlamuxa’ rirhandzu ra hina.—2 Kor. 6:11-13.

⁵ Ku chumayela hi ntlawa swa hi khutaza naswona swi endla leswaku hi tolovelana tanihi “vatirhi-kulobye entiyisweni.” (3 Yoh. 8) Onge hi nga hlanganyela hi xitalo eku chumayeleni hi ntlawa!