Ku Hlanganyela Eku Andzeni Ka Mfumo

1 “Vona ku cinca loku hlamarisaka swonghasi!” “Vona ndlela leyi ku hatliseke ha yona!” “Mawaku nkateko wonghasi eka vamakwerhu va le Soviet Union!”

2 Marito lawa ma twiwile eku heleni ka August ni le ku sunguleni ka September loko nongonoko wa mintsombano le Soviet Union wu khomiwile hi laha ku humelelaka ku nga khathariseki ku kavanyetiwa loku a swi ta ha endleka ku va kona. Va hlanganile, lava veke kona eka mintsombano ya nkombo ya le Soviet ximumu lexi a va ri 74 252, naswona 7820 va khuvuriwile. Tlhandlakambirhi, 295 924 lava engetelekeke va hlengeletanile emintsombanweni ya le Yuropa Vuxa.

3 Entiyisweni, tanihi le ka lembe xidzana ro sungula, marito ya muprofeta Esaya ma hetiseka: “Tiko leri nga famba emunyameni ri vona ku vonakala lokukulu. . . . U andzisile tiko, u kurisile ku tsaka ka rona! Ri tsakile emahlweni ka wena kukota lava tshovelaka.” Ina, ku andza ka Mfumo ku ya emahlweni! Yesu Kriste wa fuma! Tanihi leswi vuprofeta byi yaka emahlweni byi ku: “Ku fuma ka yena [i] ku rhula loku nga heriki.”—Esa. 9:2, 3, 7.

4 Ku khathalela ku andza lokukulu le Yuropa Vuxa ku lave ku akiwa loku yaka emahlweni ka tindhawu letikulu to gandlisela, le Jarimani. Vamakwerhu kwalaho va swi tsakela swinene ku seketela ku andza loku, loku seketelaka ku hetiseka ka vuprofeta lebyi vumbaka matimu, bya Yesu, hi ku kongoma: “Evhangeli leyi ya mfumo yi ta twarisiwa emisaveni hinkwayo, leswaku yi va vumbhoni eka vanhu va matiko hinkwawo; kutani hi kona makumu ma nga ta fika.”—Mat. 24:14.

5 Na hina hi vona ku andza lokukulu eka rhavi ra le Afrika Dzonga. Ku nga ri khale, eka nhlangano wa lembe na lembe wa Timbhoni ta Yehova ta le Afrika Dzonga, tinhla to karhi ti boxiwile ta leswaku ha yini ku andza loku ku laveka ni ndlela leyi hi yaka emahlweni ni ku kurisa rhavi ha yona. Hi tsakela ku mi chumbutela tinhla ti nga ri tingani.

6 Vugandlisi Bya Hina: Sweswi hi endla vugandlisi bya timagazini hi tindzimi to hambana-hambana ta 15 laha erhavini ra Afrika Dzonga. Hi ntsengo, hi gandlisa minkandziyiso yo hambana-hambana ya 46 ya timagazini, n’hweti yin’wana ni yin’wana! Tlhandlakambirhi, eka lembe ra ntirho leri hundzeke, hi gandlise tibroxara to hambana-hambana ta 94 hi tindzimi ta 25, ni swibukwana swo hambana-hambana swa 34 hi tindzimi ta 13. Hi swi kotile ku endla tibuku ta 35 hi tindzimi ta 12! Ku gandlisiwa ka tibuku leti ku tameriwa hi fektri ya le Brooklyn.

7 Ku engetela eka leswi nga laha henhla, nakambe hi gandlisa Vutirheli Bya Hina Bya Mfumo hi tindzimi ta kaye n’hweti yin’wana ni yin’wana, kun’we ni mimpfuxeto yo tsala. Ku humesiwa tinkulumo ta mintsombano ya muganga, tinhlengeletano ta xifundza, tinhlengeletano to hlawuleka ta siku rin’we ni tinkulumo ta le rivaleni. Swiphephana swa gandlisiwa hi timiliyoni. Nakambe hi humesa swiphephana, tifomo ni mapapila yo hambana-hambana, leswi Sosayiti yi tsalelanaka ni nsimu ha swona. Kahle-kahle, sweswi hi gandlisa swilo swa kwalomu ka timiliyoni timbirhi eka vugandliselo bya hina erhavini ra Afrika Dzonga n’hweti yin’wana ni yin’wana! Swo tala swa swilo leswi swi fanele swi hundzuluxeriwa swi ya eka tindzimi ta laha, to hambana-hambana. Ndzawulo ya hina yo Hundzuluxela sweswi hi yona leyikulu emisaveni.

8 Eka lembe ra ntirho leri hundzeke hi kume muchini lowuntshwa wo tsema matlhelo manharhu wa Wohlenberg lowu humaka erhavini ra le Jarimani. Wona wu hlanganisiwe ni muchini lowu nghenisaka timagazini hi woxe naswona swi endle leswaku hi kota ku khatlutela timagazini to tala. Ku simekiwa ka muchini wa hina lowuntshwa wo gandlisa wa Hantscho sweswi ku le kusuhi ni ku hela. Loko muchini lowu wu ta va se wu tirha, wu ta engetela mpimo wa hina wo humesa timagazini kumbe tibroxara ku suka eka 18 000 ku ya ka 56 000 hi awara loko hi tirhisa michini ya hina yo gandlisa ha yimbirhi!

9 Wun’wana wa mintirho leyikulu leyi hi langutaneke na yona sweswi i ku hundzuluxela Bibele. Hi kume mpfumelelo eka Komiti yo Tsala ya Huvo leyi Fumaka leswaku hi hundzuluxela Bibele hi tindzimi ta tsevu: Xibunu, Xipedi, Xisuthu, Xitswana, Xixhosa ni Xizulu. Sweswi hi ya emahlweni swinene hi tindzimi tinharhu, ku nga Xibunu, Xisuthu ni Xizulu. Vahundzuluxeri lava engetelekeke va laveka eka tindzimi letin’wana. Mintirho yo Hundzuluxela le Brooklyn yi hi nyike Fambiselo ro Hundzuluxela Bibele ra khomphyuta. Xikongomelo xa fambiselo leri i ku humesa vuhundzuluxeri lebyi kongomeke, lebyi fambisanaka, lebyi hlamuseriweke kahle ni lebyi olovaka ku byi hlaya ni ku byi twisisa.

10 Xiphemu xin’wana xa ntirho wa hina lexi engetelekeke swinene xi katsa swilo leswi rhumeriwaka eka marhavi man’wana. Hi avhareji, sweswi hi rhumela tithani ta 250 ta swilo, hi tilori ta mune ti ri na tithani ta 25 yin’we, n’hweti yin’wana ni yin’wana, eka marhavi man’wana. Timagazini, tibuku, mimphakelo ya swo aka ni swilo swin’wana swo tala swa rhumeriwa nkarhi na nkarhi erhavini ra le Zimbabwe ni ra le Zambia. Ku fikela sweswi, hi rhumele tithani ta kwalomu ka dzana ta xilamulela-mhangu kun’we ni tibuku ni timagazini ku ya eAngola. Nakambe hi swi kotile ku nyikela mpfuno le Zaire, Moçambique ni matiko man’wana ya le dzongeni wa Afrika. I lunghelo eka hina ku khathalela swilaveko swa vamakwerhu va hina va xinuna ni va xisati ematikweni man’wana hi ndlela leyi.

11 Ku Vuriwa Yini Hi Ntirho Wa Hina Wo Aka Rhavi?: Handle ko kanakana vo tala va n’wina va twile hi ta ku hlwela ka ntirho wa hina wo aka rhavi. Endzhaku ka loko tipulani ta hina to tala ti hetiwile, Hofisi yo Aka ya le Brooklyn yi bohe leswaku swi nga antswa leswaku hina hi landzelela tindlela ta sweswinyana to aka mayelana ni ndlela ya tilt-up. Va hlamusele leswaku hambi loko swi ta hi hlwerisa eku sunguleni, hi ta pfuneka endzhaku ka nkarhi. Leswi a swi nge hi endli hi va ni muako lowu antswaka ntsena kambe nkarhi wo aka na wona wu ta hatlisa kutani ku engetela ka nkarhi lowu taka ku nga akiwa hi xihatla lexikulu. Hikwalaho, hi boheke ku tlhela hi sungula ku tsala tipulani ta hina.

12 Hambi swi ri tano, hi tsakela ku vika leswaku sweswi hi lunghekile hi tipulani, naswona ku akiwa ka muako wo tshama wa makamara ya 30 ku nga ha sungula. Entiyisweni, ana se hi hetile makhumbi yo tala lama akiweke etlhelo, leswi swi ta hatlisisa muako. Hi nga swi kota ku heta ntirho hinkwawo hi kwalomu ka tin’hweti ta nkombo kumbe nhungu.

13 Sweswi, hi endle xiphemu lexikulu xa ntirho lowun’wana. Hi akile pato ro leha etlhelweni ka muako wa hina, hi endle ntirho lowukulu swinene mayelana ni ku yimisa muchini wo gandlisa lowuntshwa wa Hantscho, naswona hi hete mintirho yin’wana yo tala ya ku aka eBethele. Nakambe, nhluvuko lowunene wa endliwa malunghana ni ku tsarisa kaya ra hina tanihi muti lowu nge hansi ka hina. Loko leswi swi ta va swi pfumeriwile, hi ta swi kota ku endla ntirho wun’wana wo aka lowu lavekaka. Hi fanele hi engetela kamara ra hina ro dyela; hi fanele hi engetela vugandliselo bya hina; hi fanele hi nghenisa xithezi xin’we eka muako wa hina wa hofisi; naswona hi ta lava ku engetelanyana xiphemu xa muako wa hina wo tshama eka wona.

14 Huvo leyi Fumaka yi hakelela mimpfuno ni switirho hinkwaswo leswi hi swi nyikaka marhavi laman’wana. Kambe, hina hi fanele hi khathalela ntirho wa hina vini wo aka, hi laha hi nga kotaka ha kona. Emhakeni leyi hi tsakela ku nkhensa vamakwerhu eAfrika Dzonga hinkwaro, hi minyikelo ya vona leyinene, ni switshembiso swa vona swo tala swa nseketelo wa timali. Hinkwenu vamakwerhu va xinuna ni va xisati mi tate swilipi leswitsongo swo kombisa leswi mi nga ta swi nyikela n’hweti yin’wana ni yin’wana. Nhlamulo a yi tsakisa swinene. Mabandlha lawa enkarhini lowu hundzeke a ma nyikela R50 hi n’hweti ma tshembise ku nyikela ku sukela eka 600 ku ya eka ku tlula 1000 hi n’hweti loko swi koteka. Mabandlha lamatsongo lawa a a ma nga nyikeli ma tshembise ku rhumela minyikelo leyi vonakaka. Hakunene hi yi tlangela ngopfu minyikelo ya n’wina yo pfuna hi timali. Ha swi xiya leswaku eminkarhini leyi leyi nga tshembekiki, swiyimo leswi nga languteriwangiki swi nga ha endla leswaku swi nonon’hwa ku hlayisa switshembiso leswi. Hambi swi ri tano, hi khutaza un’wana ni un’wana ku tsundzuka marito ya Eklesiasta 5:4, 5 loko u anakanya hi switshembiso leswi u swi endleke.

15 Hambi loko u swi kota kumbe u nga swi koti ku tinyiketela ku tirha endhawini yo aka kumbe ku nyikela hi mali, hinkwerhu ka hina hi nga khongelela ku humelela ka mintirho leyi yo aka, hi xikongomelo xa leswaku swilaveko swa Mfumo wa Xikwembu swi kurisiwa emisaveni hinkwayo. Onge Tata wa hina wa le tilweni a nga hi pfuna hinkwerhu leswi hi ringetaka ku heta ntirho wakwe.

Hi lava vamakwerhu hi xihatla leswaku va pfuna hi ku aka hi laha swi hlamuseriweke ha kona eka papila ra hina ra October 15, 1991, “Eka Mabandlha Hinkwawo.”

Ku na mintlawa yimbirhi ya vamakwerhu lava lavekaka:

(1) Vamakwerhu lava nga tekangiki kumbe mimpatswa leyi tekaneke leyi nga riki na vana, lava nga tiendlaka va kumeka hi nkarhi wa ntirho lowu wo aka wa sweswinyana kumbe ku tlula kwalaho.

(2) Vatshila, tanihi vameselani, vapulasteri, ni vanghenisi va tiphayiphi, vativi va gezi, lava hiselelaka, lava va nga pfunaka ku ringana vhiki ku ya eka n’hweti kumbe ku ya eka tin’hweti tinharhu, hi nkarhi lowu vuswikoti bya vona byi nga ta laveka ha wona.

Loko u ri makwerhu la tinyiketeleke la nge xiyin’weni lexinene ni nhlengeletano ya Yehova, naswona u ta swi kota ku heta vhiki rin’we u hi pfuna hi ku aka, hi kombela u tata xiyenge lexi nge hansi ka xiengetelo lexi ivi u xi rhumela eka hina. Kutani hi ta ku rhumela fomo ya xikombelo leswaku u yi tata.

KU AKIWA KA RHAVI RA AFRIKA DZONGA

Vamakwerhu, lava nga ni malembe ya 19 ku ya ehenhla, va rhambiwa leswaku va tirhisa vuswikoti bya vona eka swiphemu swo hambana-hambana swo aka hi ku kombela fomo ya vatirhi vo tirhandzela, ivi va yi tata ni ku yi rhumela. Loko u ri na vuswikoti byo karhi kumbe ntokoto wo aka kumbe u tsakela ku seketela ntirho wo tirhandzela, hi kombela u tata xiphephana lexi ivi u xi rhumela eka CONSTRUCTION DESK, Watch Tower Society, Private Bag 2067, Krugersdorp, 1740. Kutani hi ta ku rhumela fomo leyi nga ni vuxokoxoko lebyi engetelekeke leswaku u yi tata.

VITO LERI HELELEKE: BANDLHA:

ADIRESE: TEL. No.:

KHODI YA POSO: