Bokisi Ra Swivutiso

◼ Mulanguteri wa ntirho a nga wu langutela njhani ntirho wa malandza ya vutirheli lama tamelaka tindzawulo ta tibuku ni timagazini?

Mpimo wa ku tsakela ka mulanguteri wa ntirho a wu heleli eku endzeleni ka mintlawa ya dyondzo ya buku n’hweti na n’hweti ni ku hlela minhlangano ya nkarhi na nkarhi ya ntirho wa nsimu. Nkulu loyi a hisekaka u tsakela xin’wana ni xin’wana lexi khumbaka nhluvuko wa ntirho wo chumayela ensin’wini leyi averiweke bandlha ra ka vona.

U tiyisekisa leswaku n’hweti na n’hweti ku ni mimphakelo leyi eneleke ya tibuku ni timagazini ta tsima ni leswaku ti le xiyin’weni lexinene. Kutani u langutela vutihlamuleri byo tala bya malandza ya vutirheli lava averiweke ku tamela tindzawulo ta tibuku ni timagazini.

Mulanguteri wa ntirho u nyikela nyingiso wo hlawuleka eka switiviso swa tsima leri taka ra tibuku loko swi humelela eka Vutirheli Bya Hina Bya Mfumo. Yena ni makwerhu la khathalelaka tibuku va tirhisana swin’we ku tiyiseka leswaku nhlayo leyi eneleke ya tibuku yi ta va kona leswaku yi tirhisiwa, kambe va fanele va xiya leswaku a va odi to tala ku tlula mpimo. Loko buku yi ta va yi sungula ku tirhisiwa ensin’wini kumbe loko yi ta dyondziwa ebandlheni ku nga ri khale, tinhla leti ti fanele ti tsundzukiwa loko oda yi endliwa eka Sosayiti. Loko buku ya kona yi tshame yi fambisiwa, xiviko xa bandlha xa ntirho wa nsimu xa tsima leri hundzeke xi ta kombisa loko mphakelo lowu nga kona wu ta ringana. Kavula, ku fanele ku xiyiwa ni swilo swo tanihi nhlayo ya vahuweleri lava nga ta tirha tanihi maphayona ya nkarhinyana eka n’hweti yoleyo kun’we ni ku kula ka nhlayo ya vahuweleri ni maphayona ya nkarhi hinkwawo ku sukela enkarhini lowu hundzeke loko buku ya kona yi fambisiwa. Tibuku ti fanele ti va kona emahlweni ni le ndzhaku ka minhlangano. Mabokisi ya tibuku ma fanele ma vekiwa hi mfanelo endhawini leyi baseke, ni leyi omeke naswona ma pakiwa hi ndlela leyi ma nga ta ka ma nga onhaki.

Mulanguteri wa ntirho nakambe u ta tirhisana ni makwerhu la khathalelaka ndzawulo ya timagazini. Nkarhi na nkarhi, mulanguteri wa ntirho ni makwerhu la tamelaka timagazini va fanele va ringanisa nhlayo ya timagazini leti komberiwaka n’hweti yin’wana ni yin’wana ni nhlayo ya timagazini leti fambisiwaka evutirhelini. Kumbexana swi nga ha lava leswaku vahuweleri van’wana va hunguta oda ya vona ya timagazini loko ti pakelana nkarhi hinkwawo emakaya ya vona. Timagazini a ti fanelanga ti tlangisiwa.

A ri karhi a tsundzuka nsinya lowu wa nawu mulanguteri wa ntirho u fanele a kambela nhlayo ya tibuku ta tsima leti bandlha ri ti odaka eka fomo ya Literature Order (S-AB-14). Kutani u ta yisa fomo eka matsalani wa bandlha, loyi a nga ta kambela fomo hinkwayo hi vukheta, a langutisisa nhlayo ya swilo leswi longoloxiweke swa xitoko lexi lawuriwaka.

Kavula, ku laveka ntirho wo karhi wo tsala-tsala eku khathaleleni ka tindzawulo ta tibuku ni timagazini hi laha ku faneleke. Loko vamakwerhu lava averiweke va ri ni swivutiso mayelana ni matirhiselo ya vona ya fomo ni ku tsala tirhekhodo, matsalani u ta swi tsakela ku va pfuna entirhweni lowu wa vona.