Valanguteri Lava Rhangelaka—Mulanguteri Wa Ntirho

¹ Mulanguteri wa ntirho u khumbeka ngopfu hi swilo hinkwaswo leswi fambisanaka ni nhluvuko wa ntirho wa ku vula evhangeli ensin’wini leyi averiweke vandlha. Xisweswo u endla ntirho wa nkoka wa ku hi pfuna hi hetisisa vutihlamuleri bya hina bya ku twarisa mahungu lamanene. Tanihi muevhangeli la hisekaka, u rhangela eku hleleni ka swilo hinkwaswo leswi fambisanaka ni ntirho wa nsimu. Tanihi mudyondzisi la nga ni vuswikoti, u pfuna vahuweleri ha un’we-un’we leswaku va antswisa ku humelela ka vona evutirhelini.—Efe. 4:11, 12.

² Nkulu loyi u langutela ntirho wa malandza ya vutirheli lama averiweke ku langutela tibuku, timagazini ni nsimu. U ni vutihlamuleri bya ku vona leswaku ku ni mphakelo lowu ringaneke wa tibuku, timagazini ni tifomo leti hi ti tirhisaka n’hweti yin’wana ni yin’wana. Kan’we hi lembe, u kambisisa fayili ya tiadirese ta makaya hinkwawo lawa hi byeriweke leswaku hi nga ngheni eka wona, naswona u avela vamakwerhu lava fanelekaka leswaku va endzela makaya lawa.

³ Mulanguteri wa ntirho u ni vutihlamuleri bya ku langutela swiyenge swo hambana-hambana swa ku chumayela, ku katsa ni ku nyikela vumbhoni etindhawini ta mabindzu, exitarateni ni hi riqingho. U xalamukela ku endla malunghiselelo ya ku endla ntirho wa nsimu vhiki hinkwaro, ku katsa ni hi tiholideyi. U khathalela ngopfu ntirho wa ku fambisa tidyondzo ta Bibele. U lava tindlela ta ku nyikela mpfuno wa moya eka lava nga vikiki nkarhi na nkarhi ni lava nga hola evutirhelini. U khathalela ngopfu ntirho wa maphayona, naswona u langutela nongonoko wa Maphayona Ma Pfuna Van’wana.

⁴ Tanihi xirho xa Komiti ya Ntirho ya Vandlha, mulanguteri wa ntirho u ringanyeta mindzulamiso yihi na yihi leyi faneleke eka mintlawa ya Dyondzo ya Buku ya Vandlha. Loko a endzela ntlawa wa n’wina, tiyiseka leswaku u va kona ni ku hlanganyela na yena entirhweni wa nsimu.

⁵ Hinkwerhu evandlheni hi fanele hi tirhisana hi ku swi rhandza ni nkongomiso lowu humaka eka mulanguteri wa ntirho. Leswi swi ta hi pfuna leswaku hi antswisa ku humelela ka hina entirhweni wa ku endla vadyondzisiwa ni ku kuma ntsako lowukulu evutirhelini bya hina.