Ku Dyondza Nghwazi Leyi Tshameke Yi Hanya

¹ Hi vhiki ra October 12, hi ta sungula ku dyondza Nghwazi Leyi Tshameke Yi Hanya eka Tidyondzo ta hina ta Buku ta Vandlha. Mawaku ndlela leyi swi nga ta tsakisa ha yona ku kambisisa vutomi ni vutirheli bya Yesu Kreste! Tanihi leswi buku leyi yi tsariweke hi ndlela leyi hambanekenyana ni tibuku tin’wana leti hi ti dyondzeke, swiletelo swi nga ri swingani swi ta hi pfuna.

² Buku leyi a yi na tona tinomboro ta matluka, kutani xiyimiso lexi humesiwaka eka Vutirheli Bya Hina Bya Mfumo xi ta longoloxa tindzima leti nga ta dyondziwa, hakanyingi ku ta va tinharhu kumbe mune, vhiki rin’wana ni rin’wana. Tindzima 35, 111 na 116 ti lehile kutani ti ta avanyisiwa ti va tidyondzo timbirhi ha yin’we-yin’we. Endzhaku ka loko makwerhu la fanelekaka a hlaye ndzima hinkwayo (kumbe xihlokwana hinkwaxo, tanihi le ka tindzima 35, 111 na 116), mufambisi wa dyondzo u ta vutisa swivutiso leswi nga emakun’wini ya ndzima yoleyo, leswi swi fambisanaka ni ndzima kumbe xiyenge lexi hlayiweke. Tinhlamulo a hi nkarhi hinkwawo laha ti landzelelanaka hi ku kongoma eka ndzima yo karhi. Tinhlamulo to koma leti baka nhloko ya mhaka ti fanele ti huma emhakeni leyi dyondziwaka.

³ Endzhaku ka sweswo, loko nkarhi wu pfumela, matsalwa hinkwawo lama kombisiweke emakun’wini ya ndzima ma fanele ma hlayiwa. Matsalwa yo leha lama kombisiweke ma nga ha aviwa hi swiyenge leswitsongo leswaku vahuweleri vo hambana-hambana na vona va kota ku hlaya, kutani tinhlamuselo ti nga ha nyikeriwa eka leswi hlayiweke. Swivutiso swo kongoma leswi swi lunghiseleriweke hi mufambisi swi ta pfuna ku humesa tinhlamulo to tiya leti kombaka ndlela leyi matsalwa lama hlayiweke ma yelanaka ha yona ni leswi swi kandziyisiweke ebukwini. Swivutiso ni tinhlamulo hinkwato swi fanele swi pfuna lava nga kona leswaku va anakanyisisa ha Yesu Kreste, vutomi byakwe ni tidyondzo takwe.

⁴ Buku leyi nge Nghwazi yi hlamusela vutomi bya Yesu hi ku longoloka ka byona. Ku vona swiendlakalo hi mahlo ya miehleketo ni ku vona ndhawu leyi swi humeleleke eka yona hi miehleketo swi nga hi pfuna swinene leswaku hi swi tsundzuka. Hikwalaho, tiyiseka leswaku u katsa ni swifaniso leswo saseka naswona nkarhi na nkarhi u tirhisa mepe lowu nga eku sunguleni ka buku leyi, endzhaku ka masungulo.

⁵ Masungulo ya buku leyi ma ta dyondziwa hi vhiki ro sungula. Endzhaku ko hlaya tindzimana hinkwato ehansi ka xihlokwana, mufambisi u ta vutisa swivutiso leswi faneleke, leswi a nga swi lunghiselela. Dyondzo leyi yo sungula yi ta pfula ndlela ya tidyondzo leti nga ta landzela lembe leri taka. Mpimo wa ku humelela eku hlanganiseni ka mhaka leyi wu ta titshega swinene hi ku lunghiselela ka hinkwavo lava nga kona. Mufambisi ngopfu-ngopfu u fanele a lunghiselela kahle vhiki na vhiki leswaku a pfuna ntlawa wu tolovelana kahle ni nghwazi leyi tlulaka hinkwato, leyi tshameke yi hanya, Hosi ni Muponisi wa hina, Yesu Kreste.