Pfunani Vana Va Tirhela Yehovha Hi Mbilu Ya Vona

¹ Solomoni u vule leswaku “v̌ana v̌a v̌anuna, i nḍaka ya Yehova!” (Ps. 127:3-5) Hakunene i ndzhaka ya ntikelo lowu nga pimekiki. Vatswari va ni vutihlamuleri lebyi humaka eka Xikwembu bya ku dyondzisa, ku letela ni ku laya vana va vona. Leswi swi katsa ku va letela evutirhelini, va khutaza vana leswaku va vulavula leswi humaka etimbilwini ta vona hi Yehovha ni Mfumo.—Ef. 6:4.

² Vatswari va fanele va sungula rini ku va letela? Nhlamulo ya Bibele yi le rivaleni: Va fanele va sungula evuhlangini. (2 Tim. 3:14, 15) Loko vuleteri byi hatla byi sungula, hakanyingi vana va va ni masungulo lama tiyeke entiyisweni va tlhela va endla vutirheli byi va ntirho wa vona. Ku va letela va ha ri vatsongo ku tlhela ku va sirhelela eka mianakanyo ni malangutelo ya misava.

³ Vana vo tala lava nga siki nghenaka xikolo va vonaka va ri ni vuswikoti byo tiva swilo leswi rharhangeneke. Vuswikoti lebyi bya vona byo dyondza va ha ri vatsongo byi fanele byi tirhiseriwa ku va dyondzisa mintirho leyi amukelekaka eka Yehovha. (wTS88 8/1 tl. 15; wTS89 12/1 tl. 31) Vana vo tala va endle ni nhluvuko wa ku va vahuweleri lava nga khuvuriwangiki. Vana van’wana va tinyiketela naswona va khuvuriwa va nga si kula ngopfu. Leswi swi endle leswaku va kota ku va maphayona ya nkarhinyana hambi ku va maphayona ya nkarhi hinkwawo va nga si heta xikolo. Leswaku va fikelela tipakani leti va fanele va dyondzisiwa ku vulavurisana ni vanhu hi tinhloko-mhaka to hambana ta Bibele.

⁴ Vanhu van’wana lavakulu lava va rhandzaka ku languta vantshwa va namuntlha hinkwavo tanihi lava biheke, lava nga riki na xichavo, va nga ha ka va nga swi tsakeli ngopfu ku vulavurisana ni muntshwa loko a va endzerile. Muhuweleri lontshwa a nga vula yini leswaku a hlula mhaka yoleyo naswona a koka nyingiso wa n’wini wa muti la kuleke? Muhuweleri un’wana lontshwa u tirhise swo fana ni leswi: “Avuxeni, vito ra mina ndzi ________. Ndzi endzela vaakelani va mina namuntlha hikuva vanhu vo tala va khumbeka hi vumundzuku. Tanihi munhu lonkulu, hakunene u ti tiva ku antswa timhaka ta vutomi ku tlula mina. Hambi swi ri tano, hi leri tsalwa leri ri hi chavelelaka hinkwerhu.” Endzhaku ko hlaya Nhlavutelo 21:3, 4, bulo ri nga ha ya eka xiphephana lexi nge Vutomi eMisaveni Leyintshwa Ya Ku Rhula.

⁵ Xiringanyeto xin’wana hi lexi: “Mi njhani, vito ra mina ndzi ________. Ndzi endzela vaakelani hi nkarhi wo koma hikuva ndza swi tiva leswaku vanhu lavakulu va karhateka hi ndlela leyi yi tekiwaka hi vantshwa namuntlha. Nkarhi wun’wana vantshwa va kombisa moya wa ku delela ni wa ku xandzuka. Kambe ndzi ku khomele tsalwa leri ri kombisaka leswaku siku rin’wana hi nga hanya njhani hinkwerhu hi ku rhula.” Kutani hlaya Pisalema 37:11 ivi u ri hlamusela hi laha ku faneleke. Loko vini va miti lava kuleke va twa marito yo tano ya vahuweleri lavantshwa, hakunene vo tala va vona va ta tsaka.

⁶ Magidi ya vahuweleri lavantshwa ma ya emahlweni ma hoxa xandla entirhweni wa ku chumayela hi Mfumo ni ku endla vadyondzisiwa. Va fanele va bumabumeriwa swinene. Vantshwa lava leteriweke va ha ri vatsongo hi vatswari va vona va hatla va amukela xikhutazo lexinene xa leswaku va tirhela ku hlanganyela hi xitalo eswiphen’wini hinkwaswo swa vutirheli. Lava va nga exikolweni va ni nkarhi lowunene wa ku vula vumbhoni eka swichudeni-kulobye swin’we ni vadyondzisi. Vo tala va tikhorisile hi mintokoto leyi tsakisaka eka nsimu leyi yo hlawuleka.

⁷ Kutani ke pfunani vahuweleri lavantshwa va le vandlheni ra n’wina leswaku va tirhisa nkarhi wa ku tirhela Yehovha hi matimba ya vuntshwa, va n’wi dzunisa hi timbilu ta vona.—Ekl. 12:1.