Tirhisa Timagazini Hi Ndlela Leyinene

¹ Loko u endzela ndhawu leyi ku xavisiwaka maphepha-hungu, u vona timagazini to tala swinene leti hlamuselaka xin’wana ni xin’wana xa swilo leswi hlekisaka ni swa vutivi bya sayense. A wu nge ti hlayi hinkwato. Hambi leswi timagazini tin’wana ti nga ni rungula leri pfunaka, to tala ta tona a ti enerisi. To tala ti thyakile naswona ti fanele ku papalatiwa.

² Vona ku hambana loku nga kona loko ti ringanisiwa ni Xihondzo xo Rindza ni Awake! Timagazini leti ti lavisisa ni ku twarisa ntiyiso lowu wu nga tirhiseriwaka ku ponisa hinkwavo lava amukelaka rirhandzu ra Xikwembu.

³ Awake! yi nga pfuna vanhu va tinxaka hinkwato hikwalaho ka swihloko swa yona swo tala ni leswo hambana-hambana. Hi laha swi hlamuseriwaka ha kona eka tluka 4 ra nkandziyiso wun’wana ni wun’wana, “i ya ku voningela ndyangu hinkwawo.” Yi ni swihloko swa tinhloko-mhaka to tala, leswi katsaka vukhongeri ni sayense. Yi hlamusela hi vuenti yi tlhela yi kombisa nhlamuselo ya xiviri ya swiendlakalo swa sweswinyana. Ehenhla ka hinkwaswo, “yi aka ntshembo eka xitshembiso xa Muvumbi xa misava leyintshwa ya ku rhula ni nsirhelelo.”

⁴ Nkandziyiso wa October 8 wa Awake! wu ni nhloko-mhaka leyi nge “You Can Overcome Negative Emotions.” Vanhu va ntsandza-vahlayi va karhatiwa hi mintlhaveko yo tano. Ku fambisa magazini lowu hi ku vulavula hi xitsundzuxo xa wona xa Bibele swi nga ha endla munhu a yingisela. Enkandziyisweni wa October 22, hi fanele hi swi kota ku kuma vanhu lava yingisaka hi ku yisa nyingiso eka tinhla leti chavelelaka ta nxaxamelo lowu nge “A New World That Satisfies All.”

⁵ Xihondzo xo Rindza xi tikombe xi ri museketeri lonkulu wa la misaveni wa mahungu lamanene ya Mfumo wa Xikwembu ni mikateko ya Paradeyisi leyi wu nga ta yi tisa. Nkandziyiso wa October 1 wu ta hlamula xivutiso lexi tlhontlhaka lexi nge “Xana Misava Ya N’wi Lava Mesiya?” Leswi swi ta hi nyika nkarhi lowunene wa ku vulavula hi ntshembo wa hina wa Mfumo. Rungula leri nge “Vutomi Bya Ndyangu Namuntlha—Ku Hlangavetana Ni Mphikamakaneta Ya Byona,” leri nga eka nkandziyiso wa October 15, ri ta hi pfuna ku sungula mabulo ni swirho swa ndyangu leswi lavaka ku tshunxeka eka mintshikilelo yo tala ya misava.

⁶ Hi lava leswaku lava nga ni ku tsakela ka ntiyiso va amukela timagazini leti nkarhi na nkarhi. Loko u bula hi mimpfuno yo tala ya timagazini leti, lwela ku endla leswaku n’wini wa muti a tsakela timagazini. Tiya nhlana loko u fambisa xikhokhelo eka un’wana ni un’wana. Loko xikhokhelo xi nga tekiwi, fambisa timagazini timbirhi, u vula leswaku u ta vuya endzhaku ka mavhiki mambirhi u ri ni minkandziyiso leyintshwa. Hi ndlela leyi u nga sungula ntila wa timagazini wa nkarhi na nkarhi. Loko vanhu va nga xi koti xikhokhelo xa lembe, ha yini u nga fambisi xikhokhelo xa tsevu wa tin’hweti?

⁷ Hi nga bumabumela timagazini ta hina eka vanhu hinkwavo, tanihi leswi hi swi vonaka leswaku ti ni ntikelo. Hi ni swilo leswinene, naswona hi ta va hi kotisa Kreste loko hi swi avela van’wana.—Swiv. 3:27; Hev. 13:16.