Matimba Ya Rito Ra Xikwembu

¹ Rito ra Xikwembu ri ni matimba. (Hev. 4:12) Namuntlha, vumbhoni bya leswi byi nga voniwa eka timiliyoni ta vanhu lava va nga hundzuriwa va va lavanene, hi mhaka ya ku tirhisa swilo leswi va swi dyondzaka eBibeleni. Leswi a swi ri tano ni le ka lembe xindzana ro sungula loko vadyondzisiwa va Yesu va avelane ni van’wana vutivi bya Rito ra Xikwembu.—Rhom. 12:2.

² Leswaku vanhu va pfuneka etidyondzweni ta Bibele, va fanele va pfumela leswaku Bibele i Rito ra Xikwembu. (1 Tes. 2:13) Hi November hi ta va hi pfuna vanhu leswaku va kota ku dyondza swo tala mayelana ni ntikelo wa Bibele loko hi fambisa buku leyi nge Bibele—I Rito Ra Xikwembu Kumbe I Ra Munhu?

³ Hikwalaho ka yini u nga pfuxeti swiphemu swin’wana leswi tsakisaka swa buku leyi nge Rito Ra Xikwembu? Tluka ra leswi nga endzeni ri ta ku yisa eka tindzima leti hlamuselaka mahlori, ku nga twanani loku ehleketiwaka, ku pfumelalana hi ndlela ya sayense, vuprofeta ni timhaka tin’wana. Ku ni swifaniso ni swikombiso swo tala. Tinhlamuselo leti dyondzisaka ti longoloxiwe endzhaku ka buku. Swiphemu leswi swi ta hi pfuna leswaku hi fambisa buku leyi hi ku hiseka ka xiviri, hi tiyiseka leswaku vanhu va le nsin’wini ya ka hina va fanele va twa mahungu lamanene lawa yi ma tameleke.

⁴ Hi nga yi tirhisisa ku yini buku leyi loko hi kuma n’wini wa muti loyi a swi pfumelaka leswaku Bibele i Rito ra Xikwembu? Hi nga ha hlakulela ku tsakela hi ku kandziyisa ndzima 2, leyi hlamuselaka mhaka ya matimu ya ku lwa ka Bibele leswaku yi va kona, kumbe ndzima 14, leyi khutazaka muhlayi ku amukela mpfuno leswaku a twisisa kahle leswi Bibele yi vulaka swona eka hina namuntlha. Ku hlaya matsalwa lama kombisiweke eka ndzima 14 swi ta khorwisa n’wini wa muti leswaku bulo ra wena ri huma eBibeleni.

⁵ Vo tala va ala ku pfumela leswaku Bibele i rito ra Xikwembu hi mhaka ya ku tikhoma ka Vujagana. Ndzima 3 leyi nge “Munghana Wo Hemba Wa Bibele,” yi nga tirhisiwa hi laha ku humelelaka eka xiyimo lexi.

⁶ Loko hi hlaya eBibeleni, hi nga ha kuma leswaku n’wini wa muti wa ri tsakela rungula kambe Bibele u hava. Loko Xinghezi a xi twisisa hi nga ha kombela ku n’wi tisela kopi ya New World Translation of the Holy Scriptures. Kumbexana u nga ha kuma kopi ya Bibele hi ririmi ra yena eka Sosayiti, tanihi leswi yi xavaka Tibibele hi tindzimi to tala ta ndhawu ya le kusuhi.

⁷ Hi ku tirhisa Bibele, Yehovha u twarise ku tirhisana ka yena ni vanhu, xisweswo u hi tolovete vumunhu bya yena lebyinene. Onge hi nga tirhisa buku leyi nge Rito Ra Xikwembu hi laha ku humelelaka eku pfuneni ka van’wana va dyondza hi Yehovha ni matimba ya Rito rakwe!—2 Kor. 10:4.