Pfuna Lava Nga Si Lunghekelaka Ku Dyondza Buku Leyi Nge, Leswi Bibele Yi Swi Dyondzisaka
1. Xana vanhu hinkwavo va ta yi amukela buku leyi nge, Leswi Bibele Yi Swi Dyondzisaka? Hlamusela.
1 Munhu u fanele a dyondza leswi Bibele yi swi dyondzisaka leswaku a ta va mugandzeri wa Yehovha. Kambe vukhongeri bya vanhu van’wana a hi bya Vukreste naswona va teka Bibele yi nga ri Rito ra Xikwembu. Van’wana a va tshembi leswaku Xikwembu xi kona naswona a va yi xiximi Bibele. Hi yihi minkandziyiso leyi nga pfunaka lava nga yi laviki buku leyi nge, Leswi Bibele Yi Swi Dyondzisaka? Swiringanyeto leswi landzelaka swi sekeriwe eka leswi vuriweke hi vahuweleri va le matikweni ya kwalomu ka 20.
2. I yini leswi hi faneleke hi ringeta ku swi kumisisa loko munhu a hi byela leswaku a nga tshembi leswaku Xikwembu xi kona naswona ha yini?
2 Lava Nga Tshembiki Leswaku Xikwembu Xi Kona: Loko munhu a vula leswaku a nga tshembi leswaku Xikwembu xi kona, i swinene ku n’wi vutisa xivangelo lexi endlaka a titwa hi ndlela yoleyo. Xana swi vangiwa hi leswi a pfumelaka eka dyondzo ya ku tihundzukela ka swilo? Xana swi vangiwa hi leswi a vonaka ku pfumaleka ka vululami loku nga kona emisaveni kumbe hikwalaho ka leswi vukhongeri byi nga ni vukanganyisi? Xana u huma etikweni leri vukhongeri byi yirisiweke? Swi nga ha endleka leswaku wa tshembanyana leswaku Xikwembu xi kona kambe a nga ri na xivangelo xo xi tshemba. Vahuweleri vo tala va kuma leswaku ku vutisa va ku, “Xana a wu titwa hi ndlela yoleyo minkarhi hinkwayo?” swi endla leswaku munhu a tiphofula. N’wi yingisele naswona u nga n’wi kavanyeti. Loko hi twisisa xivangelo lexi n’wi endlaka a nga tshembi leswaku Xikwembu xi kona, hi ta tiva ndlela leyi hi nga n’wi hlamulaka ha yona ni nkandziyiso lowu hi faneleke hi n’wi fambisela wona.—Swiv. 18:13.
3. Hi nga swi kombisa njhani leswaku munhu ha n’wi xixima ni vonelo rakwe?
3 Tivonele leswaku u nga n’wi hlamuli hi ndlela leyi a nga ta vona onge u n’wi sindzisa ku cinca vonelo rakwe. Xiringanyeto lexi xi huma erhavini ra le United States: “I swa nkoka swinene ku xixima ntshunxeko lowu un’wana ni un’wana a nga na wona wo tshemba leswi yena a lavaka swona. I swinene ku vutisa swivutiso leswi nga ta endla leswaku vanhu va anakanyisisa ni ku titekela swiboho, ematshan’weni yo va sindzisa ku amukela leswi u va byelaka swona.” Endzhaku ka loko n’wini wa muti a tiphofurile, hakanyingi mulanguteri un’wana wa muganga u hlamula hi ku vutisa xivutiso lexi nge, “Xana u tshame u ehleketa mhaka leyi hi ndlela leyi?”
4. Hi nga ma pfuna njhani Mabudha?
4 Mabudha yo tala a ma tivi nchumu hi Xikwembu. Loko vahuweleri van’wana va le Britain va chumayela vanhu vo tano, va tirhisa broxara leyi nge, Lasting Peace and Happiness—How to Find Them. Endzhaku ka loko va vule xingheniso, va hlaya xiyenge lexi nge, Is There Really a Most High Creator? (Xana U Kona Hakunene Muvumbi La Tlakukeke?) kutani endzhaku va bula na vona hi xiyenge lexi nge, A Guidebook for the Blessing of All Mankind (Buku Leyi Kongomisaka Vanhu Hinkwavo Leswaku Va Kuma Mikateko.) Endzhaku va nga ha va nyika buku leyi nge, Leswi Bibele Yi Swi Dyondzisaka ivi va byela n’wini wa muti va ku, “Hambiloko u nga tshembi leswaku Xikwembu xi kona, kambe ku dyondza Bibele swa pfuna hikuva yi ni nkongomiso lowu nga ku pfunaka.” Phayona ra le United States leri tirhaka ensin’wini ya Machayina ri te: “Vo tala ensin’wini ya hina va rhandza ku hlaya. Hakanyingi va hlaya nkandziyiso hinkwawo hi nga si tlhelela eka vona. Kambe va nga ha va va nga swi twisisi leswaku va fanele va dyondzeriwa Bibele. Hikwalaho eka riendzo ra mina ro sungula ndzi va fambisela broxara leyi nge, Mahungu Lamanene hikuva yi susumetela vanhu ku burisana na hina.” Mulanguteri wa xifundzha loyi a tirhaka exifundzheni lexi ku tirhisiwaka Xichayina le United States u vula leswaku swa koteka ku fambisa buku leyi nge, Leswi Bibele Yi Swi Dyondzisaka eka riendzo ro sungula. Kambe, swi nga ha antswa loko mi sungula hi ku dyondza ndzima 2, leyi vulavulaka hi Bibele, ematshan’weni yo sungula eka ndzima 1, leyi vulavulaka hi Xikwembu.
5. Ha yini ku lehisa mbilu swi ri swa nkoka?
5 Swi teka nkarhi leswaku munhu a pfumela leswaku Xikwembu xi kona, kutani i swa nkoka ku lehisa mbilu. Swi nga ha endleka loko mi hlangana ro sungula mi nga pfumelelani leswaku ku ni Muvumbi. Kambe swi nga ha endleka hi ku famba ka nkarhi a sungula ku pfumela leswaku kumbexana ku ni Muvumbi, kumbe a nga ha vula leswaku wa swi twisisa leswaku ha yini van’wana va pfumela leswaku ku ni Muvumbi.
6. I yini lexi nga endlaka leswaku van’wana va nga yi tsakeli Bibele?
6 Lava Nga Yi Tsakeliki Bibele: Hakanyingi, munhu loyi a vulaka leswaku Xikwembu xi nga ha va xi ri kona a nga va a nga ri na mhaka ni leswi Bibele yi swi dyondzisaka hileswi a nga tshembiki leswaku i Rito ra Xikwembu. Kumbexana a nga ha va a tshama etikweni leri vukhongeri bya kona byi nga riki bya Vukreste naswona a teka Bibele yi ri ya Vujagana. Kumbe a nga ha va a tshama etikweni leri ku vuriwaka leswaku i ra Vukreste kambe leri vanhu va kona va nga riki na mhaka ni vukhongeri naswona a nga ha ehleketa leswaku Bibele a yi nge n’wi pfuni hi nchumu. Hi nga va pfuna njhani vanhu vo tano leswaku va tsakela Bibele kutani va hetelela va pfumele ku dyondzeriwa buku leyi nge, Leswi Bibele Yi Swi Dyondzisaka?
7. Hi yihi ndlela leyinene leyi hakanyingi yi nga tirhisiwaka ku endla leswaku vanhu va tsakela Bibele?
7 Vamakwerhu va le rhavini ra le Greece va tsale va ku: “Ndlela leyinene yo pfuna vanhu lava nga yi tsakeliki Bibele i ku va hlayela yona hi ku kongoma u va kombisa leswi yi swi tameleke. Vahuweleri vo tala va swi xiyile leswaku rungula leri nga eBibeleni ri ni matimba yo cinca leswi munhu a swi ehleketaka ku tlula leswi vona va nga n’wi byelaka swona. (Hev. 4:12) Vanhu vo tala va sungule ku kambisisa Bibele hi leswi va voneke vito ra Xikwembu eka yona.” Vamakwerhu va le rhavini ra le Indiya va tsale va ku: “Mahindu yo tala ma tsakisiwa hi ku tiva ntiyiso malunghana ni leswi endlekaka eka lava hanyaka ni lava feke, ma tlhela ma tsakisiwa hi xitshembiso xa le Bibeleni xa leswaku ku ta va ni misava leyi nga riki ni xihlawuhlawu.” Ku burisana ni vanhu hi swiphiqo leswi va khumbaka hi ku kongoma hakanyingi swi nyika vahuweleri nkarhi wo va komba leswaku Bibele yi vula leswaku Mfumo wa Xikwembu wu ta swi herisa njhani swiphiqo sweswo.
8. Hi nga ku yini eka vanhu lava nga yi tsakeliki Bibele hikwalaho ka leswi endliwaka hi Vujagana?
8 Loko munhu a nga yi tsakeli Bibele hikwalaho ka leswi endliwaka hi Vujagana, n’wi byele leswaku Vujagana a byi landzeli leswi nga eBibeleni naswona byi soholote leswi yi swi dyondzisaka. Vamakwerhu va le rhavini ra le Indiya va tsale va ku: “Minkarhi yin’wana hi fanele hi byela vanhu leswaku Bibele a hi ya tikereke.” Va vule leswaku hakanyingi Mahindu ma tsakisiwa hi xiyenge 4 xa broxara leyi nge, Xana Xikongomelo Xa Vutomi I Yini? U Nga Xi Kumisa Ku Yini?, lexi hlamuselaka ndlela leyi tikereke ti ringeteke ha yona ku thyakisa ni ku onha Rito ra Xikwembu. Phayona ra le Brazil ri byela vanhu ri ku: “Xana a wu swi tsakeli ku twa leswi Bibele yi swi vulaka? Vanhu vo tala va swi endla sweswo hi vukheta, handle ko boheka ku va xirho xa kereke yo karhi. Swi nga ha ku hlamarisa leswi u nga ta swi dyondza.”
9. Ha yini hi nga fanelanga hi hela matimba loko munhu a nga lavi ku twa nchumu hi Bibele eka riendzo ro sungula?
9 Yehovha u kambela mbilu ya munhu un’wana ni un’wana. (1 Sam. 16:7; Swiv. 21:2) U kokela vanhu va timbilu letinene evugandzerini bya ntiyiso. (Yoh. 6:44) Vo tala va vona a va si tshama va twa hi Xikwembu kumbe a va yi tolovelanga ngopfu Bibele. Vutirheli bya hina byi va nyika nkarhi wa leswaku va “ponisiwa naswona va fikelela vutivi lebyi kongomeke bya ntiyiso.” (1 Tim. 2:4) Hikwalaho, loko vanhu van’wana va nga lavi ku twa nchumu hi Bibele eka riendzo ro sungula, u nga heli matimba! Tirhisa yin’wana ya minkandziyiso leyi nga kona leswaku u va pfuna. Hi ku famba ka nkarhi, u nga ha swi kota ku tirhisa buku leyi hi dyondzaka Bibele ni vanhu ha yona leyi nge, I Yini Leswi Bibele Yi Swi Dyondzisaka Hakunene?
[Bokisi leri nga eka tluka 4]
Loko n’wini wa muti a vula leswaku a nga tshembi leswaku Xikwembu xi kona, ringeta ku vula leswi:
• Leswaku a tiphofula, n’wi vutise u ku, “Xana a wu titwa hi ndlela yoleyo minkarhi hinkwayo?”
• Loko a ri Mubudha, tirhisa broxara leyi nge, Lasting Peace and Happiness—How to Find Them, matluka 9-12.
• Loko a pfumela eka dyondzo ya ku tihundzukela ka swilo, leswi landzelaka swi nga pfuna:
Swihloko leswi tlhandlamanaka leswi nga eka Xalamuka! leswi nge, “Xana Swi Lo Endliwa?”
Vhidiyo leyi nge, The Wonders of Creation Reveal God’s Glory
Broxara leyi nge, A Satisfying Life—How to Attain It, xiyenge 4; Xana Swilo Leswi Hanyaka Swi Lo Tumbuluxiwa?; ni leyi nge, The Origin of Life—Five Questions Worth Asking
• Loko munhu a nga ha ri na ripfumelo eka Xikwembu hikwalaho ka vuhomboloki ni ku xaniseka, minkandziyiso leyi landzelaka yi nga pfuna:
Buku leyi nge, Is There a Creator Who Cares About You?, ndzima 10
Broxara leyi nge, Xana Xikwembu Xa Hi Khathalela Hakunene?, xiyenge 6 ni leyi nge, Xana Xikongomelo Xa Vutomi I Yini?, xiyenge 6
• Loko se n’wini wa muti a tshemba leswaku Xikwembu xi nga ha va xi ri kona tirhisa buku leyi nge, Leswi Bibele Yi Swi Dyondzisaka. Swi nga ha va swinene loko mo sungula hi ndzima 2 kumbe ndzima yin’wana leyi n’wi fanelaka.
[Bokisi leri nga eka tluka 5]
Loko n’wini wa muti a nga yi tsakeli Bibele, ringeta leswi:
• Bulani hi ndzima 17 na 18 eka buku leyi nge, Life—How Did It Get Here? By Evolution or by Creation?
• Eka Mahindu, tirhisa broxara leyi nge, Why Should We Worship God in Love and Truth?
• Eka Vayuda, tirhisa broxara leyi nge, Will There Ever Be a World Without War?, matluka 3-11.
• Hlamusela nkoka wa ku hanya hi milawu ya Bibele. Minkandziyiso leyi u nga yi tirhisaka ku pfuna munhu leswaku a vona leswaku Bibele i ya nkoka hi leyi:
Swihloko leswi tlhandlamanaka leswi nga eka Xalamuka! leswi nge, “Leswi Nga Pfunaka Ndyangu”
Vhidiyo leyi nge, The Bible—Its Power in Your Life
Broxara leyi nge, Mahungu Lamanene Lama Humaka Eka Xikwembu!, dyondzo 9 na 11; Buku Ya Vanhu Hinkwavo, matluka 22-26; ni leyi nge, A Satisfying Life—How to Attain It, xiyenge 2
Eka Mabudha, tirhisa broxara leyi nge, The Pathway to Peace and Happiness, matluka 3-7.
Eka Mamoslem, tirhisa broxara leyi nge, Ripfumelo Ra Xiviri—Ri Endla U Va Ni Vutomi Byo Tsakisa, xiyenge 3.
Loko u chumayela endhawini leyi vanhu va kona va nga laviki ku twa nchumu hi Bibele, swi nga va swinene loko u nga vuli leswaku marito ya vutlhari lawa u va byelaka wona ma huma kwihi ku fikela loko u va endzele ko hlayanyana.
• Hlamusela leswaku vuprofeta bya le Bibeleni byi hetiseke njhani. Minkandziyiso leyi u nga yi tirhisaka hi leyi landzelaka:
Vhidiyo leyi nge, The Bible—Accurate History, Reliable Prophecy
Broxara leyi nge, Buku Ya Vanhu Hinkwavo, matluka 27-29
• Loko munhu a lava ku tiva leswi Bibele yi swi dyondzisaka eka tinhloko-mhaka to hambana-hambana, sungula ku tirhisa buku leyi nge, Leswi Bibele Yi Swi Dyondzisaka.
[Bokisi leri nga eka tluka 6]
Loko n’wini wa muti a ku: “A ndzi tshembi leswaku Xikwembu xi kona,” u nga ha ku:
• “Xana ndzi nga ku hlamuselanyana leswi ndzi endleke ndzi tshemba leswaku Muvumbi u kona?” Kutani bula na yena hi tinhla leti nga eka buku leyi nge, Ku Hlamulana, matluka 212-213, kumbe u hlela ku n’wi yisela nkandziyiso lowu nga ku pfuna.
• “Kambe loko Xikwembu a xi ri kona, xana a wu ta lava leswaku xi va njhani?” Vini vo tala va miti va vula leswaku a va ta lava ku gandzela Xikwembu lexi nga ni rirhandzu, vululami ni tintswalo, lexi nga riki na xihlawuhlawu. N’wi kombe eBibeleni leswaku Xikwembu xi na tona timfanelo teto. (Swi nga ha koteka ku bula na yena hi ndzima 1 eka buku leyi nge, Leswi Bibele Yi Swi Dyondzisaka, u sungula eka ndzimana 6.)
Loko n’wini wa muti a ku: “A ndzi pfumeli eBibeleni,” u nga ha ku:
• “Vanhu vo tala va titwa hi ndlela yoleyo. Van’wana va vula leswaku Bibele a yi fambisani ni sayense kumbe va vula leswaku milawu ya le Bibeleni a yi pfuni nchumu. Ndzi byele, xana u tshama u yi hlaya Bibele? [Yimela nhlamulo. Kutani n’wi kombe xingheniso lexi nga eka tluka 3 eka broxara leyi nge, Buku Ya Vanhu Hinkwavo, ivi u n’wi fambisela yona loko yi ri kona evandlheni ra ka n’wina kumbe u yi printa eka Watchtower Library.] Vanhu vo tala va teka Bibele yi nga ri ya nkoka hileswi vukhongeri byi soholoteke tidyondzo ta yona. Nkarhi lowu taka ndzi ta bula na wena hi xikombiso lexi nga eka tluka 4 na 5.”
• “Vanhu vo tala va vula sweswo. Xana ndzi nga ku komba swin’wana leswi ndzi tsakisaka hi Bibele? [Hlaya Yobo 26:7 kumbe Esaya 40:22, leti kombisaka leswaku Bibele ya pakanisa hi tlhelo ra sayense.] Nakambe Bibele yi ni rungula leri nga pfunaka mindyangu. Enkarhini lowu taka ndzi ta bula na wena hi xikombiso xa kona.”
• “Ndza nkhensa ku twa sweswo. Loko Xikwembu xi tsalele vanhu buku, u ehleketa leswaku yi fanele yi vulavula hi yini?” Kutani n’wi kombe leswi Bibele yi swi vulaka leswi pfumelelanaka ni leswi a swi vuleke.