Fambisa Timagazini Letinene Ku Tlula Hinkwato eMisaveni
1 Xikongomelo lexi tsariweke xa Xihondzo xo Rindza i ku “tlakusa Yehovha Xikwembu tanihi Hosi Leyikulu ya vuako hinkwabyo.” Xikongomelo xa Xalamuka! i ku “voningela ndyangu hinkwawo. . . . Magazini lowu wu aka ku tiyiseka hi xitshembiso xa Muvumbi xa misava leyintshwa leyi nga ni ku rhula ni leyi sirhelelekeke.” Leswi swi tshahiwe eka timagazini leti hi toxe. Ku hetisisa tipakani leti swi endle leswaku ti va xihlovo xa nchavelelo eka timiliyoni ta vahlayi.
2 Hi ta va hi fambisa timagazini leti evutirhelini bya hina hi April na May. Leswaku hi humelela, hi fanele hi swi tiva kahle leswi nga endzeni ka tona. Hlaya nkandziyiso wun’wana ni wun’wana, u xiya tinhla leti u nga ha ti tirhisaka loko u ti fambisa. Ehleketa hi leswi swi karhataka vanhu. Xana hi tihi timhaka ta ntshamisano, ta mindyangu kumbe ta mintlhaveko leti vanhu-kuloni va ehleketaka ha tona? Ringeta ku ehleketa hi leswi u nga swi vulaka, leswi nga khumbaka timbilu ta vona naswona swi pfuxa ku navela ku tiva swo tala.
3 Ku Vulavulela Xihondzo xo Rindza Xa April 1: Vanhu vo tala va navela misava leyi antswaka, leyi nga hava swiphiqo swo tala leswi hakanyingi swi va tekelaka ntsako wa vona sweswi.
Endzhaku ko titivisa, u nga ha ku:
◼ “Ndzi lava ku ku kombisa nhlamuselo leyi tsakisaka leyi humaka exihlokweni lexi nge ‘Misava Yo Antswa—Xana Ko Va Norho Ke?’ Yi ri: ‘Misava leyi ya hina, a swi kanakanisi leswaku a hi ndhawu yo tsakisa. . . . Makhombo lama nga kona sweswi, ku hlaya wona i ku xurha.’ Xiyimo lexi xi endla swi tika ku tshembela eka vumundzuku, xana a swi tano ke? Hambi swi ri tano, i nge ndzi ku komba leswi Pisalema 37:11 yi swi vulaka hi vumundzuku.” Endzhaku ko hlaya ndzimana, vutisa n’wini wa muti leswaku u titwisa ku yini hi xitshembiso lexi. Loko a angula kahle, pfula xihloko lexi nge “Misava Yo Antswa—Yi Tshinele!,” tluka 4, ivi u ku: “Ku kombisiwe timhaka to tala ta Matsalwa, ku katsa ni leyi ha ha ku hlayaka ha yona eka Pisalema 37:11. Ndza tshemba leswaku u ta tsakela ku hlaya swihloko leswi ni ku langutisa tinhlamuselo eBibeleni ya wena. Ndzi ta hlela leswaku u ti kuma hi poso tanihi xikhokhelo xa lembe hi R19,00.” Laha nyiko ya xikhokhelo yi nga amukeriwiki kona, fambisa timagazini timbirhi hi munyikelo wa R1,60.
4 Ku Vulavulela Xihondzo xo Rindza Xa April 15: Xihloko lexi nga eka tluka 4 xa vutisa: “Xana U Nga Wu Kuma Kwihi Nkongomiso Wo Tshembeka?”
Endzhaku ko titivisa, u nga ha ku:
◼ “Ku ni swiphiqo swo tala ngopfu emisaveni namuntlha, swo fana ni [boxa xilo lexi karhataka vanhu va kwalaho kumbe nhloko-mhaka yo karhi ya mahungu]. Swi hi endla hi tivutisa loko ku ri ni munhu loyi a nga kumaka ntlhantlho wa swiphiqo leswi swo tala. Leswi tsakisaka, 2 Timotiya 3:16, 17 ya hi tiyisekisa leswaku Bibele i nkongomiso wa vutomi lebyi tsakisaka ni lebyi sirhelelekeke.” Endzhaku ko hlaya tindzimana leti, kombisa ndlela leyi Xihondzo xo Rindza xi hi pfunaka ha yona ku twisisa leswaku ha yini Bibele yi ri nkongomiso lowu tshembekaka. Fambisa xikhokhelo hi laha swi ringanyetiweke ha kona eka ndzimana 3.
5 Loko u tsakela ku fambisa Xalamuka!, u nga ha tirhisa nkandziyiso wa May 8 ni xihloko lexi nge “Ntshembo Wa Xiviri Hi Vana.” Hakanyingi u ta kuma leswaku vatswari va karhateka hi swilaveko swa vana va vona naswona va lava ku tiva leswaku ku nga endliwa yini ku va pfuna. Titwe u ntshunxekile ku fambisa swikhokhelo swimbirhi hi munyikelo wa R28,50.
6 Loko hi hisekela timagazini ta hina letinene ku tlula hinkwato emisaveni, hi ta tikarhatela ku ti fambisela van’wana leswaku na vona va ta va ni ntshembo wa Mfumo kutani va hlanganyela eku tlakuseni ka Yehovha tanihi Hosi Leyikulu emisaveni.—Ps. 83:18.