Tindlela To Antswisa Ku Chumayela Ka Hina Hi Mfumo
1 Ntirho wa hina wo chumayela sweswi i wa xihatla swinene ku tlula rini na rini. Leswaku vanhu va fa kumbe va hanya swi ta ya hi n’wangulo wa vona eka mahungu lamanene. (1 Pet. 4:5, 6, 17; Nhlav. 14:6, 7) Hikwalaho ka xivangelo lexi nkarhi na nkarhi hi fanele ku lava tindlela to antswisa ku chumayela ka hina hi Mfumo. Hi tihi tindlela tin’wana to antswisa?
2 Lunghiselela Kahle: Hi ku tirhisa nkandziyiso wa sweswinyana wa Vutirheli Bya Hina Bya Mfumo, hlawula rungula leri u vonaka leswaku ri ta tsakisa vanhu vo tala ensin’wini ya ka n’wina. I swa nkoka ku endla mhaka ya wena yi fambelana ni swiyimo swa ndhawu ya ka n’wina. Kumbexana u nga ha tsakela ku lunghiselela rungula ra wena n’wini, u tirhisa miehleketo ni Matsalwa lawa u kumeke ma tirha. U ta fanela ku va ni xingheniso lexi pfuxaka ku tsakela. (Vona buku leyi nge Reasoning matluka 9-15.) Kumbexana u hlela ku vutisa xivutiso lexi tlhontlhaka mianakanyo kumbe u kombela nhlamuselo ya n’wini wa muti malunghana ni mahungu ya ndhawu yoleyo. Loko rungula ra wena u ri na rona emianakanyweni, titolovete rona ni xirho xa ndyangu kumbe muhuweleri un’wana la nga ta nyikela swiringanyeto leswaku u ta antswisa.
3 Burisana Ni Vanhu: Xikongomelo xa hina i ku yisa rungula ra nkoka. Leswi swi nga ha endliwa hi ku nghenisa muyingiseri wa hina ebulweni leri nga ni xikongomelo. Loko n’wini wa muti a tlakusa xivutiso kumbe a humesa vonelo ro karhi, yingisela leswi a lavaka ku swi vula hi vukheta. Marito ya yena ma ta ku pfuna leswaku u n’wi nyika nhlamulo ya Matsalwa ya ntshembo lowu u nga na wona. (1 Pet. 3:15) Loko langutelo rakwe ri nga pfumelelani ni Bibele, u nga ha vula leswi hi vutlharhi: “Vanhu vo tala va titwa hi ndlela leyi u titwaka ha yona. Kambe, hi leyi ndlela yin’wana ya ku langutana ni mhaka leyi.” Kutani hlaya tsalwa leri faneleke, kutani u yingisela leswi a swi vulaka.
4 Vana Ni Xiyimiso Lexi Cinca-cincaka: Ku va u lunghiselele kahle a swi nge ku pfuni nchumu loko u nga swi koti ku vulavula ni vanhu. Namuntlha swi tolovelekile ku kuma vanhu va nga ri vangani ntsena ekaya loko hi endza. Loko nsimu ya n’wina yi ri hi ndlela yoleyo, ringeta ku lulamisa xiyimiso xa wena leswaku u ta tirha hi yindlu ni yindlu loko vanhu vo tala va ri ekaya. U nga ha kuma leswaku nkarhi lowunene lowu u nga endzaka ha wona i mahelo-vhiki; van’wana va nga ha kumeka exikarhi ka vhiki kambe hi tiawara ta ni madyambu. Etindhawini tin’wana vahuweleri va kuma swi ri swinene ku veka vumbhoni hi tiholideyi ta misava hikuva va kuma vanhu vo tala ekaya. Hi ntolovelo vanhu va va va wise kahle naswona va nga ha swi tsakela ku vulavula eminkarhini yo tano. Swi nga va kahle ku endla xingheniso xa wena xi pfumelelana ni xiyimo kutani u yelanisa mhaka ya wena ni nhloko-mhaka ya Matsalwa.
5 Kambisisa Ndlela Leyi Rungula Ra Wena Ri Humelelaka Ha Yona: Endzhaku ka ku suka emutini wun’wana ni wun’wana, tivutise: ‘Xana ndzi yi fikelerile mbilu ya n’wini wa muti? Xana ndzi n’wi khutaze ku tiphofula ivi ndzi rhiya ndleve eka leswi a swi vulaka? Xana ndzi hlamule hi vuxiyaxiya? Hikwalaho ka swiyimo, xana ndzi tirhise manghenelo lamanene?’ Swi nga ha pfuna ku hamba u tirha ni muhuweleri la nga ni ntokoto kumbe phayona naswona u yingisela marungula ya yena hi vukheta hi xikongomelo xo antswisa ku humelela ka wena evutirhelini.
6 Loko u ri ni vutshila entirhweni wa wena, u ta kota ku avelana mintiyiso ya Mfumo leyi nga ta ‘ponisa wena ni lava ku yingisaka.’—1 Tim. 4:16; Swiv. 22:29.