Bibele—Xihlovo Xa Nchavelelo Ni Ntshembo eMisaveni Leyi Karhatekeke
1 Misava leyi yi nghenisa vanhu ehansi ka ntshikilelo lowukulu naswona va lava nchavelelo ni ntshembo. Bibele hi yona ntsena xihlovo xa nchavelelo wa xiviri. Yi nyikela ntshembo wa misava leyintshwa yo lulama. (Rhom. 15:4; 2 Pet. 3:13) Buku leyi nge Insight, Vholumo 1 tluka 311, yi ri: “Handle ka Bibele a hi nga ta n’wi tiva Yehovha, a hi nga ta yi tiva mikateko leyi hlamarisaka leyi tisiwaka hi gandzelo ra nkutsulo ra Kreste naswona a hi nga ta swi twisisa swilaveko leswi faneleke ku fikeleriwa leswaku hi ta kuma vutomi lebyi nga heriki ehansi ka Mfumo wa Xikwembu lowo lulama.”
2 Hi November hi ta yisa nyingiso wo hlawuleka eka xiphemu lexi Rito ra Xikwembu, ku nga Bibele, ri xi hetisisaka eku pfuneni ka vanhu leswaku va langutana ni mintshikilelo leyi humaka emisaveni. Hi ta fambisa buku leyi nge Bibele—I Rito Ra Xikwembu Kumbe I Ra Munhu? Xana hi nga vula yini lexi nga ta pfuna vanhu lava voyameleke eka leswinene leswaku va tlangela nkoka wa Bibele?
3 Endzhaku ka ku titivisa, u nga ha vula swin’wana swo fana na leswi:
◼ “A swi kanakanisi leswaku wa pfumela leswaku hi rhendzeriwe hi swiphiqo leswi hi tekelaka ku rhula ka mianakanyo. Hi kwihi laha hi nga kumaka ndzayo leyi tirhaka leyi nga ta hi komba ndlela yo langutana ni swiphiqo leswi? [Yimela nhlamulo.] Ndzi kume Bibele yi chavelela hikuva yi hi dyondzisa ndlela yo kuma ntsako. [Hlaya Luka 11:28.] Xikongomelo xa ntirho wa hina i ku khutaza vanhu leswaku va hlaya Bibele ni ku pfuneka eka swiletelo swa yona. Xipfuneto xo dyondza Bibele, ku nga buku leyi nge Bibele—I Rito Ra Xikwembu Kumbe I Ra Munhu?, xi nga ku pfuna leswaku u endla sweswo. Xiya leswi xi swi vulaka malunghana ni xivangelo xa swiphiqo swo tala swa misava. [Hlaya xivulwa xa vumbirhi xa ndzimana 9 eka tluka 187.] Loko u rhandza ku hlaya buku leyi, ndzi nga tsakela ku ku siyela yona hi munyikelo wa R3,50.”
4 U nga ha hlawula ku tirhisa manghenelo yo olova yo fana ni lawa:
◼ “Hi tsakela ku khutaza vanhu leswaku va va ni xichavo lexikulu hi Rito ra Xikwembu, ku nga Bibele. Ndzi tsakela ku ku nyika kopi ya xiphephana lexi nge, Mhaka Leyi U Nga Tshembaka Bibele Ha Yona. Xi hlamusela leswi nga endlaka leswaku hi languta Bibele leswaku hi kuma ntshembo lowu tiyeke wa misava leyo antswa. [Pfula tluka 6, kutani u hlaya Pisalema 37:29 kun’we ni ndzimana yo hetelela.] Tihlayele xiphephana lexi, kutani nkarhi lowu taka loko ndzi vuya, u ta ndzi byela leswi u swi ehleketaka hi ntshembo lowu Bibele yi wu nyikelaka.”
5 Vahuweleri van’wana va nga ha lava ku tirhisa manghenelo lawa yo kongoma leswaku va ta sungula dyondzo ya Bibele:
◼ “Ndzi endzele ku ta ku fambisela dyondzo ya mahala ya le kaya ya Bibele. Bibele yi huhuteriwe hi Xikwembu, naswona swiletelo swa yona swi nga hi pfuna leswaku hi ololoxa swilo. Hi ku tirhisa xipfuneto lexi xo dyondza Bibele, ku nga buku leyi nge Bibele—I Rito Ra Xikwembu Kumbe I Ra Munhu? ndzi tsakela ku ku kombisa ndlela leyi u nga dyondzaka Bibele ha yona. [Pfula tluka 175, kutani u bula hi tindzimana 1-3 ni n’wini wa muti. Hi ku ya hi ku tsakela loku kombisiweke, languta tsalwa rin’we kumbe mambirhi kutani u bula hi yinhla leyi kombisiweke. Hlamusela ndlela leyi ku languta matsalwa lama kombisiweke swi nga pfunaka n’wini wa muti leswaku a tiva mianakanyo ya Xikwembu etimhakeni leti.] Ndzi ta tsakela ku vuya hi ta ya yisa mhaka leyi emahlweni. U nga titekela buku leyi hi munyikelo wa R3,50 ntsena.”
6 Bibele i xihlovo xa nchavelelo ni ntshembo kun’we ni ntiyiso lowu nga hi yisaka evuton’wini lebyi nga heriki. (Yoh. 17:3, 17) Ku avelana vutivi bya Bibele ni van’wana swi tsakisa Yehovha, “[loyi a] navelaka leswaku vanhu hinkwavo va ponisiwa.”—1 Tim. 2:4.