Va Pfune Leswaku Va Yingisa Ni Le ‘Nkarhini Wun’wana’
1 “Ha ha ta ku twa nakambe emhakeni leyi.” (Mint. 17:32) Leyi a ku ri nhlamulo ya van’wana lava a va yingisele nkulumo leyi dumeke ya Pawulo eXitsungeni xa Mars. Hi ku fanana namuntlha, van’wana va tiyimisele ku twa swo tala malunghana ni rungula ra Mfumo leri hi va aveleke rona eriendzweni ra hina ro sungula.
2 Ntirho wa hina wo tala wo dyondzisa hi wu endla loko hi tlhelela ku ya hlakulela ku tsakela. Ku lunghiselela kahle swi ta hi pfuna leswaku hi kuma vuyelo lebyinene. Tluka 51 ra buku leyi nge Buku Yo Letela ri bumabumela leswi: “Sungula hi ku kuma tinhlamuselo leti twisisekaka leti seketelaka rungula rero. Ringeta ku kuma leswaku ha yini nchumu wu ri tano. Vona loko u ta swi kota ku veka mhaka hi marito ya wena n’wini. Rhanga u twisisa vumbhoni bya Matsalwa. Lunghekela ku tirhisa matsalwa hi laha ku humelelaka.”
3 Loko u fambise buku leyi nge “Bibele—I Rito Ra Xikwembu Kumbe I Ra Munhu?,” u nga ha vula swin’wana swo fana na leswi:
◼ “Loko hi vulavula enkarhini lowu hundzeke, hi bule hi swivangelo leswi nga endlaka leswaku hi tshemba Bibele. Buku leyi ndzi ku siyeleke yona yi tlakusa xivutiso lexi nge, ‘Ha Yini U Hlaya Bibele?’ [Hlaya xingheniso lexi nga eka tluka 5, kutani u yimela nhlamulo ya xivutiso xo hetelela.] Bibele yi hi byela leswaku ku nga ri khale Xikwembu hi xoxe xi ta herisa swiphiqo hinkwaswo leswi karhataka vanhu, naswona yi hi komba ndlela leyi hi faneleke ku famba ha yona loko hi lava ku tsakela mikateko ya nkarhi wolowo lowu tsakisaka. [Hlaya Pisalema 119:105.] Buku leyi yi endleriwe ku va mpfuno wa dyondzo ya Bibele ya munhu hi xiyexe ni ya ndyangu. Ndzi tsakela ku ku komba ndlela yo yi tirhisa.”
4 Eka maendzo lawa u siyeke xiphephana lexi nge “Mhaka Leyi U Nga Tshembaka Bibele Ha Yona,” u nga ha vula leswi:
◼ “Hinkwerhu ka hina hi tsakela ku tiva leswaku vumundzuku byi hi khomele yini. Loko u languta swiyimo swa misava namuntlha, xana u ehleketa leswaku ku ta humelela yini? [Yimela nhlamulo.] Loko vanhu va mbambela kunene leswi nga ta humelela, Xikwembu xi swi tiva kahle leswi nga ta endleka. [Hlaya Esaya 46:10.] Swi nga ha ku hlamarisa ku tiva leswaku Bibele yi vhumbha leswaku ku nga ri khale hi ta tiphina hi mikateko ya misava leyintshwa ya paradeyisi. [Hlaya ndzimana ya vunharhu eka tluka 4.] U nge ndzi ku byela swo tala malunghana ni xitshembiso lexi xo saseka.”
5 Loko u endzela laha u sunguleke dyondzo ya Bibele, kumbexana u nga ringeta manghenelo lawa:
◼ “Masiku ma nga ri mangani lama hundzeke ndzi kombise ndlela leyi hi dyondzaka Bibele ha yona hi ku tirhisa buku leyi nge Bibele—I Rito Ra Xikwembu Kumbe I Ra Munhu? Hi bule hi tindzimana ti nga ri tingani eka ndzima 13, leyi kombisaka ndlela leyi Bibele yi nga hundzulaka vutomi bya munhu ha yona. Hi laha ndzi tshembiseke ha kona, a hi yise bulo ra hina emahlweni. Xana u nga swi tsakela ku teka kopi ya wena ya buku kun’we ni Bibele ya wena?” Sungulani bulo ra n’wina laha mi yimeke kona, mi bula hi tindzimana 4-6 ta ndzima 13. Endla malunghiselelo yo tlhela u vuya leswaku mi ta yisa bulo emahlweni.
6 Ku hava rifuwo lerikulu leri hi nga ri nyikaka van’wana ku tlula vutivi lebyi kongomeke bya Rito ra Xikwembu. Vutivi byo tano byi nga dyondzisa ku chava Yehovha ni ku khutaza vanhu leswaku va famba etindleleni ta yena, leti tisaka mikateko leyi nga heriki.—Swiv. 2:20, 21.