BOKISI RA SWIVUTISO

◼ Ku laveka vuxiya-xiya byihi loko hi tirha ensin’wini leyi nga ni khombo?

 ¹ Hi ya hi ri karhi hi twa swiviko swa madzolonga, vugevenga ni minkitsinkitsi, ngopfu-ngopfu etindhawini ta le madorobeni. Hambi leswi hi karhatekaka, ha swi tiva leswaku hambi ku ri etindhawini leti nga ni minkitsinkitsi, ku ni vanhu lavo rhula lava nga ta amukela rungula ra Mfumo. Kutani hi nkarhi lowu fanaka, hi fanele hi va ni xivindzi leswaku hi ya emahlweni, hi tiyiseka leswaku Yehovha wa hi khathalela.​—⁠Swiv. 29:⁠25; 1 Tes. 2:⁠2.

 ² Loko hi ya etindhawini leti nga ni khombo, Yehovha u langutela leswaku hi xalamuka ni ku va ni vuxiya-xiya. Xalamuka. “Munhu wa v̌utlhari o v̌ona khombo, kutani a tumbela, kambe v̌ariv̌ali v̌a ya mahlweni v̌a biwa.” (Swiv. 22:⁠3) Vahuweleri lava nga ni ntokoto va xiya nkoka wo tirha kun’we va ri vambirhi kumbe hambi ku ri hi ntlawa wa vahuweleri vo hlayanyana, loko swi fanerile. Hambi swi ri tano, ku languteriwa leswaku ku nghena vahuweleri vambirhi ntsena emutini va vulavula ni n’wini wa muti tanihi leswi ku nga vambirhi ntsena lava nga ta vika nkarhi wa kona. Eklesiasta 4:​9, 12 yi ri: “V̌ambiri v̌a tlula uṅwe . . . Hambi uṅwana a nga ta pfukela l’a nga ŝakwe e matimba, loko v̌a ri v̌ambiri v̌a nga ṅwi hlula.” Hakanyingi swigevenga swi lava la nga yexe ivi swi n’wi hlasela hi ku olova.

 ³ Vana na vuxiya-xiya swinene mayelana ni ku ya etifuleteni leti nga ni tiphasejini leti nga ni munyama ni switepisi leswi nga riki na vanhu. Vana na vuxiya-xiya mayelana ni ku pfumela ku nghena endlwini kumbe efuleteni. U nga phikizani ni lava va tikombaka va chavisa kumbe lava tlhontlhaka. Hatlisela ku titivisa tanihi un’wana wa Timbhoni ta Yehovha. Minkarhi yin’wana vahuweleri van’wana va khoma Bibele kumbe magazini wa Xihondzo xo Rindza kumbe Xalamuka! hi voko, hi xikongomelo xo titivisa.

 ⁴ Xalamukela vanhu lava rhendzelekaka endhawini yoleyo. Tivonele ku nghena eka khexe leyi nga ni vanhu lava va tikombaka leswaku a va tshami emuakweni wolowo. U nga ambali swin’wetsin’wetsi leswo durha. Loko u boheka ku huma ni madyambu, papalata ku famba hi mapatu lama nga ni munyama laha ku nga riki na timovha to tala. Loko u hlaseriwa, u nga lwi loko ku ri leswaku va lava mali kumbe swilo swa wena ntsena; vutomi bya wena byi tlula swilo leswi vonakaka.​—⁠Mar. 8:⁠36.

 ⁵ Vamakwerhu lava rhangelaka va fanele va rindza vahuweleri loko va ri ensin’wini. Hakanyingi i swinene ku endla ntlawa wu tshama wu ri ndhawu yin’we leswaku va tshama va ri kusuhi ni van’wana. Loko dzolonga ra muxaka wihi na wihi ri humelela endhawini yoleyo, ntlawa wu fanele ku suka ensin’wini yoleyo hi ku hatlisa.

 ⁶ Loko hi xalamukile naswona hi ri ni vuxiya-xiya, hi nga swi kota ku fikelela lava nga etindhawini leti nga ni vugevenga lava “rilaka hikwalaho ka manyala hikwawo la’ma endliwaka.”​—⁠Ezek. 9:⁠4.