‘Chumayela Mahungu Lamanene Hi Rixaladza’ eTindlwini Leti Swi Nga Oloviki ku Nghena Eka Tona

1. Xana ku ‘chumayela mahungu lamanene hi rixaladza’ swi katsa yini?

¹ Hi navela ku ‘chumayela mahungu lamanene hi rixaladza ku fana na Pawulo.’ (Mint. 20:24) Kutani hi endla hinkwaswo leswi hi nga swi kotaka leswaku hi chumayela vanhu va le nsin’wini ya hina mahungu ya Mfumo. Leswi swi katsa ni vanhu lava tshamaka etindlwini leti swi nga oloviki ku nghena eka tona. Minkarhi yin’wana swi nga ha tika ku nghena etindhawini teto. Leswi etindhawini teto ku tshamaka vanhu vo tala, sweswo swi hi nyika nkarhi lowunene wo huwelela mahungu lamanene.

2. Ha yini vutlhari ni vuxiyaxiya swi ri swa nkoka loko hi chumayela etindlwini leti swi nga oloviki ku nghena eka tona?

² Hikwalaho ka ku andza ka vukhamba ni madzolonga, tindhawu to tala leti swi nga oloviki ku nghena eka tona ti tshama ti lotleriwile naswona ti ni varindzi kumbe tikhamera. (2 Tim. 3:1, 2) Valawuri va ndhawu yoleyo va nga ha veka nawu wa leswaku vanhu lava nga tshamiki kwalaho a va pfumeleriwi ku nghena va ri voxe. Mulanguteri wa ndhawu yoleyo kumbe mininjhere wa yona a nga ha hi kombela leswaku hi huma endhawini yoleyo, ngopfu-ngopfu loko un’wana wa vanhu lava tshamaka kwalaho a rila hi hina. Kutani i swa nkoka ku tirhisa vutlhari ni ku va ni vuxiyaxiya.

3. Hi wihi nkarhi lowu nga vaka wunene wo ya chumayela etindlwini leti swi nga oloviki ku nghena eka tona, naswona ha yini?

³ Nkarhi Lowu Hi Faneleke Hi Yi Tirha Ha Wona: Ku fana ni le tinsin’wini tin’wana, i swinene leswaku ku chumayeriwa etindhawini teto loko vanhu va ri kona. Vanhu va nga ha sungula ku hi ehleketelela swo biha loko ho ya chumayela etindlwini teto hi nkarhi lowu ku nga riki na munhu. Vahuweleri vo tala swi va fambele kahle loko va chumayela etindlwini teto nimadyambu, hi Mugqivela ni hi Sonto nindzhenga. Ku chumayela etindhawini teto ni mixo swinene, ngopfu-ngopfu hi mahelo-vhiki, swi nga endla leswaku vanhu lava tshamaka kwalaho va sungula ku yisa swivilelo eka mulawuri wa ndhawu yoleyo.

4, 5. I yini leswi hi nga swi endlaka leswaku hi kota ku nghena etindhawini leti lotleriweke?

⁴ Ku Nghena eTindlwini Teto: Vahuweleri a va fanelanga va vulavurisana ni mulawuri wa ndhawu yoleyo loko va ri endleleni yo ya chumayela endhawini yoleyo. Loko ndhawu ya kona yi ri ni ti-intercom, hi nga ha tirhisa tona leswaku hi kuma munhu loyi a nga ha hi pfumelelaka ku nghena hi vulavula na yena. Leswi tindhawu leti ti nga faniki, eka tin’wana swi nga ha endleka hi kota ni ku chumayela vanhu va tiyindlu letin’wana endzhaku ko vulavula ni munhu loyi a hi pfumeleleke ku nghena. Kasi eka tin’wana ku ta va ku ri vutlhari ku vulavula ni munhu yoloye ntsena kutani hi tlhelela egedeni hi ya tirhisa intercom, loko hi lava ku vulavula ni munhu un’wana. Hi fanele hi hlela kahle loko hi ri karhi hi endla xiboho xa leswaku hi ta vulavula ni vanhu vangani hi ku tirhisa lunghiselelo leri endhawini yoleyo.

⁵ Van’wana va nga ha lava leswaku u va byela hi xikongomelo xa riendzo ra wena eka intercom. Loko swi ri tano, titivise hi ndlela ya xinghana. Loko vito ra n’wini wa yindlu ri tsariwile etlhelo ka intercom n’wi vitane hi rona. Hi ku komisa, n’wi byele leswi u lavaka ku bula na yena ha swona. Vahuweleri van’wana swi va fambele kahle loko va hlaya xingheniso xa vona hi ku kongoma ebukwini leyi nge Ku Hlamulana.

6. I yini leswi hi nga swi endlaka loko hi ya chumayela tindhawini leti nga ni murindzi?

⁶ Loko ndhawu ya kona yi ri ni murindzi loyi a alaka leswaku hi nghena, hi ngo namba hi chumayela yena. Varindzi vo tala va swi tsakela ku hlaya minkandziyiso ya hina. Hi nga ha sungula dyondzo ya Bibele na yena kutani hi yi fambisela kwalaho a tirhelaka kona. Loko murindzi a hi pfumelela ku nghena leswaku hi ya eka munhu wo karhi la kombiseke ku tsakela, swi nga va swinene leswaku hi nga gongondzi etindlwini letin’wana.

7. I yini leswi hi faneleke hi swi tsundzuka malunghana ni tibege ta hina?

⁷ Ku Languteka Ni Ku Tikhoma Ka Hina: Ku khoma tibege letikulu ngopfu swi nga endla leswaku vanhu va nga hi tshembi. Kutani swi nga va swinene leswaku hi khoma tibege letitsongo kumbe hi nga ti khomi. Vahuweleri van’wana va hoxa tibuku ta vona efayilini leyitsongo, kutani va khoma Bibele ya vona hi voko kumbe va yi hoxa exikhwameni.

8. Wu fanele wu hleriwa njhani ntlawa lowu nga ta tirha nsimu ya le tindhawini leti swi nga oloviki ku nghena eka tona?

⁸ A hi swinene leswaku hi hlengeletana hi ri mintlawa ngopfu-ngopfu loko hi ri etindhawini leti va pakaka timovha eka tona tanihi leswi sweswo swi nga hi kokelaka mahlo. Hi fanele hi va ni vuxiyaxiya loko hi chumayela etindhawini leti nga duma hi vugevenga. (Swiv. 22:3) Hi xikombiso, vahuweleri va mune kumbe va tsevu va nga ha tirha swin’we exithezini xin’we va ri ekusuhi na kusuhi, kumbexana loko lavan’wana va nghena endlwini, lavan’wana va va yimela ehandle.

9. Hi nga xi kombisa njhani xichavo naswona ha yini sweswo swi ri swa nkoka?

⁹ Loko mi nghena etindhawini teto, phumunhani tintangu ta n’wina naswona loko mi pfala minyangwa mi nga yi bi hi matimba. Loko hi kombisa xichavo hi ndlela leyi, hi ta endla leswaku vanhu lava tshamaka kwalaho va nga vi na xivangelo xo vilela hi hina. Loko mi nghenile, kongomani laha mi faneleke mi ya tirha kona ematshan’weni yo yima-yima lomu ku ngheniwaka kona. Sweswo swi ta endla leswaku lava va hi vonaka va nga kali va hi ehleketelela swo biha.

10. Hi nga swi papalata njhani ku endla huwa?

¹⁰ Emiakweni yo tala, huwa yi twala ngopfu. Kutani u nga vulavuleli henhla lerova u twiwa ni hi muakelani. Loko u ri karhi u vulavula ni vahuweleri van’wana, mi nga vulavuleli ehenhla leswaku vanhu va nga mi ehleketeleli swo biha. Leswaku vini va ndhawu va nga kavanyetiwi, vahuweleri van’wana va tirhe nsimu yoleyo hi ku nghena eka yindlu leyi kutani va tlulela eka yin’wana va kala va yi heta, ematshan’weni ya leswaku va tirha tindlu hi ku landzelelana ka tona. Ku tlula kwalaho, ku gongondza onge wo lwa swi nga ha chavisa lava nga hala ndzeni.

11. Hi swihi swiringanyeto leswi nga hi pfunaka loko hi gongondza enyangweni lowu munhu a kotaka ku ku vona a ri hala ndzeni?

¹¹ Loko minyangwa yi ri ni xifasiterana lexi munhu a kotaka ku ku vona a ri hala ndzeni, wena swin’we ni loyi u fambaka na yena yimani mi langutana na xona leswaku a kota ku mi vona. Loko u vona leswaku ku ni munhu, n’wi xewete hi ndlela ya xinghana ivi u sungula bulo. Loko munhu yoloye a ku vutisa a ku, ‘Hi wena mani?’ vula vito ra wena ni ra loyi u fambaka na yena. Leswi swi nga ha endla leswaku n’wini wa yindlu a ntshunxeka kutani a pfula nyangwa. Hambiloko a nga ku pfuleli, u nga ha n’wi chumayela u ri enyangweni.

12. Hi nga swi papalata njhani swiphiqo loko hi siya tibuku etindlwini leti ku nga riki na munhu eka tona?

¹² Laha Ku Nga Riki Na Munhu: Nchumu lowu vanhu lava va khathalelaka tindlu leti swi nga oloviki ku nghena eka tona va nga wu rhandziki i ku famba va rhwalela tibuku leti weke etiphasejini kumbe hala handle. Tibuku leti hi ti siyaka eminyangweni, swa olova leswaku tiwa kutani ti vonaka ti thyakisa ndhawu. Kutani i swinene leswaku tibuku leti hi ti siyaka etindlwini leti hi nga kumangiki munhu eka tona hi ti veka endhawini leyi swi nga taka swi nga olovi leswaku munhu la hundzaka a ti vona.

13. I yini leswi hi faneleke hi swi endla loko hi hlangana ni n’wini wa muti la hlundzukeke?

¹³ Vini Va Miti Lava Hlundzukeke: Loko hi hlangana ni vini va miti lava hlundzukeke naswona va lavaka ni ku vitana valawuri va ndhawu yoleyo, swi ta va swinene ku suka endhawini yoleyo kutani hi tlhela hi vuya hi nkarhi wun’wana. Eka swiyimo swin’wana ku nga ha va vutlhari ku namba hi huma emuakweni wolowo leswaku hi nga tikumi se hi holoveriwa hi mulanguteri wa ndhawu yoleyo. Hambiloko n’wini wa muti wo karhi a nga hi kombelanga hi ku kongoma leswaku hi nga ha ti endlwini yakwe, swi ta va swi ri swinene leswaku hi tsala nomboro ya yindlu yoleyo emepeni wa nsimu ya hina leswaku a hi fanelanga hi nghena eka yona. Ku fanele ku endzeriwa tindlu to tano endzhaku ka nkarhi, ku vona loko n’wini wa muti a nga si cinca langutelo rakwe.

14, 15. I yini leswi hi faneleke hi swi endla loko vanhu lava langutelaka tindlu leti swi nga oloviki ku nghena eka tona va hi byela leswaku hi suka?

¹⁴ Loko U Byeriwa Leswaku U Suka: Loko mininjhere, murindzi, munhu la khathalelaka ndhawu yoleyo kumbe munhu un’wana la tshamaka kwalaho a ku byela leswaku u suka loko u ri eku chumayeleni endhawini yoleyo, swi ta va swinene leswaku u nga ha dyi nkarhi. Hi lava ku papalata ku lwisana ni vanhu kumbe ku endla swilo leswi lwisanaka ni nawu lerova hi vitaneriwa ni maphorisa. Vanhu lava langutelaka tindlu leti swi nga oloviki ku nghena eka tona a va tivengi Timbhoni ta Yehovha, kambe va va va ri eku endleni ka ntirho wa vona.

¹⁵ Minkarhi yin’wana loko munhu loyi a langutelaka tindlu leti a ku byela leswaku u suka, u nga ha n’wi hlamusela xivangelo xa ku ta ka wena hi ndlela ya musa ni hi vutlhari. (1 Pet. 3:15) Ha swi tiva leswaku ntirho wa yena i ku endla leswaku vanhu lava tshamaka kwalaho va tshama va tsakile ni ku sirhelela ndhawu yoleyo. Swi nga ha endleka leswaku endzhaku ko twa xivangelo xa wena, a ku pfumelela u nghena. Kambe loko a ku byela leswaku u famba, u nga kali u ringeta ku phikizana na yena, endla hilaha a ku lerisaka ha kona. Loko swiyimo swi pfumela u nga ha kombela ku siya tibuku laha vanhu lava tshamaka kwalaho va tekaka kona poso kumbe etindhawini leti va hlantswelaka eka tona. (Kol. 4:6) Mulanguteri wa ntirho u fanele a byeriwa hi swiyimo swo tano.

16. I yini leswi hi faneleke hi swi endla loko swiphiqo swi ya emahlweni loko hi ringeta ku chumayela etindlwini leti swi nga oloviki ku nghena eka tona?

¹⁶ Kumbexana endzhaku ka nkarhinyana, vahuweleri va nga ha tlhela va ringeta ku ya chumayela endhawini yoleyo hi vutlhari. Kambe loko swiyimo swi nga si cinca, vakulu va fanele va tivisa rhavi leswaku ri va pfuna ematshan’weni ya leswaku vahuweleri va titlhantlhela xiphiqo lexi hi voxe. Loko swi nga koteki ku chumayela vanhu lava tshamaka etindhawini teto, ku nga ha tirhisiwa tindlela tin’wana to vulavula na vona, to tanihi ku chumayela hi riqingho kumbe hi mapapila. Vahuweleri van’wana va chumayela exitarateni lexi nga ekusuhi swinene ni tindlu toleto nimixo hi nkarhi lowu vanhu vo tala va yaka emintirhweni ni nimadyambu hi nkarhi lowu va vuyaka ha wona.

17. Ha yini swi ri swa nkoka ku chumayela etindlwini leti swi nga oloviki ku nghena eka tona?

¹⁷ Makumu ya mafambiselo lawa yo homboloka ya swilo ma kwala nyongeni. Ku ta pona vanhu lava vitanaka vito ra Yehovha ntsena. “Hambiswiritano, va ta n’wi vitanisa ku yini loyi va nga pfumelangiki eka yena? Hilaha ku fanaka, va ta pfumerisa ku yini eka loyi va nga twangiki nchumu hi ta yena?” (Rhom. 10:13, 14) Vanhu vo tala lava nga ni “mboyamelo lowunene eka vutomi lebyi nga heriki” va tshama etindlwini leti swi nga oloviki ku nghena eka tona. (Mint. 13:48) Hi ku va ni vuxiyaxiya ni ku pfumelelana ni swiyimo, hi nga swi kota ku va byela mahungu lamanene.