Mikateko Leyi Tisiwaka Hi Ku Tirha Ni Van’wana
1 Xana u vona ku ri ni mikateko leyi nga vaka kona hi ku tirha ni van’wana evutirhelini? Yesu u swi vone swi ri tano. Hambi leswi ntshovelo a wu ri wukulu naswona vatirhi va nga talanga, u rhume vadyondzisiwa va 70 ensin’wini hi “vambirhi-mbirhi.” Mawaku nkarhi lowu vuyerisaka lowu hinkwavo va veke na wona eku chumayeleni “emitini hinkwayo ni hinkwako lomu [a] anakanyaka ku hundza hi kona”!—Lk. 10:1, 17; Mt. 9:37.
2 Swa nyanyula ku tirha ni van’wana. Van’wana va hina hi ni tingana naswona hi kuma swi nonon’hwa ku tshinelela vanhu lava hi nga va tiviki. Loko hi ri ni un’wana etlhelo ka hina swi nga hi nyika xivindzi xo vulavula hi Rito ra Xikwembu. Loko hi ri ni un’wana, swi nga hi olovela ku endla ntirho hi ndlela leyi hi leteriweke ha yona. (Swiv. 27:17) Wanuna wo tlhariha u te: “V̌ambiri v̌a tlula uṅwe.”—Ekl. 4:9.
3 I swinene ku tirha ni vahuweleri ni maphayona yo hambana-hambana. Vanghana va muapostola Pawulo entirhweni a va katsa Barnaba, Silasi, Timotiya na Yohane Marka, naswona va tiphine hi mikateko yo tala loko va ri karhi va chumayela swin’we. Leswi swi nga va tano ni namuntlha. Xana u tshame u tirha ni un’wana loyi ku nga khale a ri entiyisweni? Endzhaku ka ku xiya vutshila byakwe eku nyikeleni ka vumbhoni, i ntiyiso leswaku u kume tindlela letinene leti ku pfuneke ku antswisa. Xana u tshama u famba ni vahuweleri lava ha riki vantshwa? Kutani u nga ha va u kote ku avelana na vona swin’wana leswi u swi dyondzeke xisweswo u nga ha va u va pfune leswaku va humelela ni ku kuma ntsako lowukulu evutirhelini bya vona.
4 Xana ku ni dyondzo ya Bibele leyi u yi fambisaka sweswi? Loko swi ri tano, ha yini u nga rhambi un’wana wa vakulu kumbe mulanguteri wa xifundzha leswaku a famba na wena? Swichudeni swa hina swa Bibele loko swi tolovelana ni valanguteri swa pfuneka. Loko u chava ku fambisa dyondzo ya Bibele ku ri ni nkulu, kumbexana a nga ha swi tsakela ku yi fambisa kutani wena u xiyisisa. Endzhaku ka swona, titwe u ntshunxekile ku n’wi vutisa swiringanyeto malunghana ni ndlela leyi u nga pfunaka xichudeni ha yona leswaku xi kula hi ku hatlisa.
5 Vana munghana la khutazaka loko u tirha ni van’wana. Vula marito lama akaka malunghana ni nsimu. U nga tshuki u hleva van’wana kumbe ku vilela hi malunghiselelo ya vandlha. Endla leswaku mianakanyo ya wena yi tshama yi ri evutirhelini ni le ka mikateko ya Yehovha. Loko u endla tano, wena ni vanghana va wena mi ta tlhelela ekaya mi phyuphyile emoyeni.
6 Swiyimo swa wena swi nga ha endla leswaku swi ku nonon’hwela ku tirha ni vamakwenu van’wana va xinuna ni va xisati nkarhi na nkarhi. Hambi swi ri tano, loko swi koteka, ha yini u nga hleli leswaku nkarhi wun’wana u tirha ni muhuweleri un’wana? Hi vumbirhi bya n’wina mi ta katekisiwa!—Rhom. 1:11, 12.