Mfungho Lowu Tisaka Ku Pona
1 Emahlweni ka ku va a tisa ku avanyisa ka yena loko lulama, Yehovha minkarhi hinkwayo u nyikela xitsundzuxo a tlhela a nyika lava titsongahataka ndlela yo pona. Esikwini ra Ezekiyele, a ku ri ni lava a va hlunamile va tlhela va rila hikwalaho ka manyala hinkwawo lawa a ma endliwa. Yehovha u endle leswaku lava fanelekaka va fungheriwa ku pona. (Ezek. 9:4-6) Ntirho wa hina wo chumayela namuntlha wu hetisisa xikongomelo lexi fanaka. Hi nga endla xiphemu xa nkoka swinene.
2 Ku lava vanhu va timbilu letinene ko va goza ro sungula. Hi hlela riendzo ro vuyela. Malunghiselelo ya riendzo ro vuyela ma endliwa eka riendzo ro sungula hi ku tsala leswi fambisiweke ni mhaka leyi a ku buriwa ha yona. Ku humelela ka hina loko hi tlhelela ku ta titshega hi leswi hi lunghekeleke ku swi vula ni ku swi endla loko hi tlhelela.
3 Loko u tlhelela laha u fambiseke kona “Xihondzo xo Rindza,” u nga ha yisa nyingiso eka xihloko-nkulu xa xona:
◼ “Xiya leswaku eka xifunengeto xa le handle xa Xihondzo xo Rindza ku ni marito lama nge ‘Xi Huwelela Mfumo Wa Yehovha.’ Lexi endlaka magazini lowu wu hlawuleka hi leswaku wu seketela Mfumo wa Xikwembu tanihi ntlhantlho wa ntiyiso wa swiphiqo swa misava. Wu hlamusela leswi Mfumo wa Xikwembu wu nga ta swi hetisisa loko ku rhandza ka Xikwembu ku endliwa emisaveni. Lawa i mahungu lamanene lawa Yesu a vuleke leswaku ma ta twarisiwa emisaveni hinkwayo.” Hlaya Matewu 24:14, ivi u hlamusela ndlela leyi Xihondzo xo Rindza xi nga kumiwaka ha yona nkarhi na nkarhi xi tlhela xi tirhiseriwa dyondzo ya Bibele ya munhu hi yexe.
4 U nga ha tsakela ku vulavula hi Bibele hi yoxe u tlhela u kandziyisa xilaveko xo yi hlaya nkarhi na nkarhi. U nga ha ku:
◼ “Swi tikomba onge un’wana ni un’wana loyi hi n’wi tivaka a nga tlangela ku kuma ndzayo leyi tirhaka malunghana ni ndlela yo langutana ni swiphiqo swa vutomi bya siku na siku. Xana u ehleketa leswaku hi kwihi laha hi nga kumaka ndzayo leyi hi nga yi tshembaka? [Yimela nhlamulo.] Vo tala lava vekeke ntshembo wa vona eka ndzayo ya vanghana kumbe lava titshegeke hi ndzayo ya vanhu lava tlakukeke va khomisiwe tingana swinene. Hi hala tlhelo, timiliyoni ta vanhu ti kume leswaku Bibele hi xona ntsena xihlovo xa xitsundzuxo lexi va nga xi tshembaka hakunene. Bibele yi kombisa ndlela yo hlula xiphiqo xihi na xihi lexi hi nga ha langutanaka na xona. [Hlaya 2 Timotiya 3:16, 17.] Hambi loko u swi kume swi tika ku twisisa Bibele, inge ndzi ku komba ndlela leyi u nga yi tirhisaka ha yona ku kuma ndzayo ya vutlharhi.” Yana mahlweni hi ku pfula eka “Love” eka Index endzhaku ka buku ya Reasoning kutani u kombisa swiringanyeto swo karhi.
5 Hi xikongomelo xo sungula dyondzo ya Bibele, u nga ha hlawula ku tirhisa buku leyi nge “U Nga Hanya Hi Masiku aParadeyisini eMisaveni,” tirhisa xingheniso lexi:
◼ “Hi rhandza mindyangu ya hina naswona hi lava leswaku yi humelela. Xana ndyangu wa wena wu nga pfuneka njhani hi ku hanya emisaveni yo fana ni leyi?” N’wi kombe swifaniso leswi nga eka matluka 156-7. Hlaya tsalwa rin’we kumbe mambirhi ya lawa ma tshahiweke eka matluka lawa, ivi u hlamusela leswaku leswi i switshembiso leswi endliweke hi Yehovha Xikwembu, loyi a nga hembiki. Vulavula hi nxaxamelo wa tindzima lowu nga eka matluka 5-6, ivi u vutisa n’wini wa muti leswaku i mhaka yihi leyi n’wi tsakisaka ngopfu; pfula eka ndzima leyi a yi hlawulaka, kutani mi bula hi ndzimana yin’we kumbe timbirhi.
6 Xana u nga tsakela ku pfuna munhu un’wana leswaku a fungheriwa ku pona? Ku humelela ku titshege hi ku ‘hetisisa vutirheli bya wena hi xitalo’ hi ku lunghiselela kahle ni hi ku landzelela ku tsakela hinkwako hi ku hatlisa.—2 Tim. 4:5.