Matsalwa Hinkwawo Ma Pfuna Ku Dyondzisa
1 Mavonelo mayelana ni nkoka wa Bibele ma tele naswona ma hambana-hambanile. Hambi swi ri tano, ha khorwiseka leswaku eka yona ku ni tinhlamulo ta swiphiqo swa munhu leswi pfilunganyaka hambi ku ri nkongomiso lowo tshembeka endleleni ya hina ya vutomi. (Swiv. 3:5, 6) Ndzayo ya yona ya vutlhari a yi ringanisiwi na nchumu. Milawu ya ku tikhoma leyi yi yi yimelaka i yikulu swinene. Rungula ra yona ri na matimba, “ri kota ku hlaya mianakanyo ni makungu ya mbilu.” (Hev. 4:12) Xana hi nga va pfuna njhani van’wana leswaku va vona xilaveko xo hlaya buku leyi ni ku yi kambisisa kahle? U nga ha tsakela ku ringeta swiringanyeto swin’wana leswi landzelaka loko u fambisa Ku Lavisisa Ka Vanhu Xikwembu na New World Translation hi November.
2 Leswi vunyingi bya vanhu lava hi hlanganaka na vona va nga ha vaka va ri va vukhongeri naswona va nga tsakeli ku cinca vukhongeri bya vona, kumbexana xingheniso lexi xi ta koka nyingiso wa vona:
◼ “Loko hi vulavula ni vaakelani va hina, hi kuma leswaku vanhu vo tala va enerisekile hi vukhongeri bya vona naswona a va tsakeli ku byi cinca. Kambe loko vanhu va tinyika nkarhi wo kambisisa vupfumeri bya van’wana, u anakanya leswaku leswi a swi nga ta va endla va byi twisisa ku antswa naswona swi hunguta rivengo emisaveni? [Yimela n’wini wa muti a hlamula.] Xiya leswi Bibele yi swi vulaka mayelana ni lava va rhandzaka Xikwembu ni ndlela leyi va faneleke ku titwa ha yona hi van’wana.” Endzhaku ko hlaya Mintirho 17:26, 27, yisa nyingiso eka tindzimana 15 na 16 eka tluka 10 ra buku leyi nge Ku Lavisisa Ka Vanhu Xikwembu. Fambisa buku hi munyikelo wa R5,30.
3 Hi lexi xiringanyeto xin’wana lexi u nga ha xi tirhisaka:
◼ “Nkarhi na nkarhi loko hi hlaya phepha-hungu kumbe hi yingisela mahungu hi twa hi ta swiphiqo swin’wana leswi vangelaka gome leswi hi endlaka hi vilela. [Boxa xiendlakalo xin’wana lexi khomisaka gome lexi xa ha ku vikiwaka emahungwini.] Xana hi nga swi languta njhani swiphiqo swo fana ni lexi? [Yimela nhlamulo.] Hi 1983 khale ka muungameri wa United States [Ronald Reagan] u vule leswaku Bibele yi na rungula lerikulu swinene ku tlula hinkwawo lama tshameke ya tsariwa ni leswaku ‘endzeni ka matluka ya yona ku ni tinhlamulo hinkwato ta swiphiqo hinkwaswo leswi munhu a nga na swona.’ Leswi a swi vuleke swi hi tsundzuxa hi leswi Bibele yi swi vuleke hi yoxe. [Hlaya 2 Timotiya 3:16, 17.] I nge ndzi ku komba mhaka leyi hi nga tshembelaka eBibeleni ha yona.” Boxa tinhla tin’wana leti nga exiphephanini lexi nge Mhaka Leyi U Nga Tshembaka Bibele Ha Yona. “Leswaku hi va pfuna ku tshemba Bibele hi siyela vaakelani va hina New World Translation ni buku-mpfuno yo dyondza Bibele leyi nge Ku Lavisisa Ka Vanhu Xikwembu. Ndzi ta tsakela ku vuya ndzi ta ku komba ndlela leyi ha yona u nga kumaka swo tala hi ku dyondza ka wena Bibele.” Fambisa tibuku timbirhi hi R19,30.
4 Loko ku tele vanhu lava nga riki va vukhongeri ensin’wini ya n’wina, u nga ha ringeta xingheniso lexi:
◼ “Vanhu vo tala endhawini leyi va languta tibuku tin’wana leto kwetsima tanihi leti ti tikanetaka naswona ti ri ntsheketo. Va vone swilo swo tala swo biha swi endliwa hi vito ra vukhongeri leswi endlaka leswaku va nga yi tshembi Bibele. Entiyisweni, vanhu vo tala swinene va tivutisa loko Bibele yi ri Rito ra Xikwembu kumbe ri ri ra munhu. Xana u swi vonisa ku yini?” Yimela nhlamulo. Loko u vone n’wangulo wa n’wini wa muti, pfula buku leyi nge Ku Lavisisa Ka Vanhu Xikwembu laha ku vulavuriwaka hi mhaka leyi kumbe langutelo leri n’wini wa muti a nga na rona, ivi u bula hi yinhla yin’we kumbe timbirhi. Hi xikombiso, u nga ha kuma nkarhi wo tirhisa bokisi leri nga eka matluka 340 na 341.
5 Muleteri wa hina Lonkulu u endle leswaku vutivi bya ku rhandza ka yena byi fikeleriwa hi ku olova hi hinkwavo lava lavaka ku byi dyondza. Ku pfuna van’wana leswaku va tlangela nkoka wa Bibele i xin’wana xa swilo leswinene ngopfu lexi hi nga xi endlaka leswaku hi va pfuna; yi nga ponisa vutomi bya vona.—Swiv. 1:32, 33.