Pfuna Valavi Va Ntiyiso Ku Lavisisa Xikwembu
1 Yesu u vule leswaku, “Evhangeli yi fanele ku rhanga yi twarisiwa ematikweni hinkwawo.” (Mar. 13:10) Leswi a swi vula leswaku vadyondzisiwa va yena a va ta hlangana ni vanhu va tindzimi, mindhavuko ni vukhongeri byo hambana-hambana. Nakambe a swi vula leswaku vadyondzisiwa va yena va manguva lawa, Timbhoni ta Yehovha, va na xiavelo xo dyondzisa tinxaka hinkwato ta vanhu. Tibiliyoni ta vanhu emisaveni, vo huma evukhongeri hinkwabyo, va lava vutivi lebyi ku ngo va Xikwembu ntsena lexi nga va nyikaka byona—vutivi bya xona ni N’wana wa xona, Yesu Kreste.—Swiv. 2:1-6; Yoh. 17:3.
2 Leswi ku nga ku rhandza ka Yehovha Xikwembu leswaku tinxaka toleto hinkwato ta vanhu ti ponisiwa naswona ti kuma vutivi lebyi kongomeke bya ntiyiso, hi na lunghelo ro pfuna vo tala swinene leswaku va va vadzunisi va yena. (1 Tim. 2:3, 4) Hi November, hi ri karhi hi pfuniwa hi buku leyi nge Ku Lavisisa Ka Vanhu Xikwembu na New World Translation, hi ta kota ku pfuna vo tala lava nga eVujaganini kun’we ni lava nga riki Vakreste ni lava nga pfumeriki eka Xikwembu, leswaku va sungula ku gandzela Yehovha “hi moya ni ntiyiso.”—Yoh. 4:23.
3 Ku Lavisisa Ka Vanhu Xikwembu yi hi pfune ku byi twisisa ku antswa vukhongeri byin’wana ni matimu ya byona. I xipfuneto eku chumayeleni hi laha ku humelelaka eka hinkwavo lava hi hlanganaka na vona. Yi hlamula madzana ya swivutiso mayelana ni xisekelo xa leswi vukhongeri lebyikulu bya misava byi swi pfumelaka. Xana i timhaka tihi leti humaka eka xipfuneto lexi xa nkoka leti hi nga ti kandziyisaka leswaku hi khutaza vanhu lava titsongahataka leswaku va dyondza swo tala mayelana ni Xikwembu?
4 Xivutiso xin’wana xa xisekelo lexi hlamuriwaka ebukwini hinkwayo hi lexi nge: Xana munhu u na moya-xiviri lowu ponaka rifu wu ya hanya kun’wana? Hi ndlela yo karhi, kwalomu ka vukhongeri hinkwabyo byi dyondzisa dyondzo yoleyo. Swivutiso swin’wana leswi tlakusiweke ebukwini leyi hi leswi nge: Xana yi kona ndhawu ya tihele laha mimoya-xiviri yi xanisiwaka kona? Xana hi wihi ntshembo wa ntiyiso hi vafi? Xana ku ni Xikwembu xin’we, kumbe ku ni swikwembu swo tala? Hi nga languta swivutiso leswi nga ebukwini eka matluka 17 na 18. Hambi loko u vulavula ni la nge Xikwembu a xi kona kumbe la nge Xikwembu a xi tiviwi, rungula leri nga eka tluka 7, ndzimana 9, ri nga koka nyingiso wa yena kumbe ri endla ni bulo leri humelelaka.
5 Kavula ku fanele ku tirhisiwa vutlhari minkarhi hinkwayo. A hi tsakeli ku pfuxa njhekanjhekisano kambe hi lava ku anakanyisisa ni vanhu. Hi na xivangelo xin’wana ni xin’wana xo hisekela ku fambisa buku leyi. Loko hi tolovelane ni leswi nga endzeni ka yona, hi nga kuma minkarhi yo pfuxa ku tsakela eka vanhu lava titsongahaka va vukhongeri hinkwabyo. Onge hi nga hisekela ntirho lowu. Vanhu hinkwavo va fanele ku lavisisa Xikwembu ni ku lava tintswalo ta xona sweswi. Swiendlakalo swa laha misaveni swi komba leswaku Armagedoni yi le ku teni hi xihatla. I nkarhi wa ku hisekela ntirho.
6 Onge hi nga phikelela ku kuma lava lavaka ntiyiso ni ku tiyisa vuxaka bya vona ni Xikwembu xa ntiyiso. Xi nga kumeka!