BOKISI RA SWIVUTISO

◼ I swilo swihi leswi hi faneleke hi ya na swona eminhlanganweni?

Vhiki rin’wana ni rin’wana hi kuma ndzetelo ni xikhutazo lexi pfunaka eminhlanganweni ya vandlha. (Esa. 48:​17; Hev. 10:​24, 25) Hambi swi ri tano, ndlela leyi hi pfunekaka ha yona yi titshege hi leswaku hi ta hi lunghiselele kahle kumbe hi nga lunghiselelanga kahle.

Swi ta va swinene leswaku xirho xin’wana ni xin’wana xa ndyangu xi va ni tibuku ta xona to dyondza ni swilo leswi lavekaka eminhlanganweni. Leswi swi katsa Bibele, buku ya tinsimu, tibuku leti hlayiwaka, buku ya tinotsi ni xitsalo.

Eka Xikolo xa Vutirheli bya le Tilweni, ku laveka Xiyimiso xa Xikolo xa Vutirheli bya le Tilweni ni Buku Yo Letela Ya Xikolo Xa Vutirheli Bya Le Tilweni. Swilo leswi swi hi pfuna ku tsundzuka tinhloko-mhaka ta swichudeni leti nyikeriwaka ni ku landzelela loko mulanguteri wa xikolo a nyikela ndzayo. Hi nga tirhisa ndzayo ni swiringanyeto eka hina vini leswaku hi antswisa tinkulumo ta hina ni marungula ya le ntirhweni wa nsimu. Ku sukela hi January, tinkulumo to tala to laya ti sekeriwe eka buku leyi nge Timbhoni Ta Yehovha I Vahuweleri Va Mfumo Wa Xikwembu. Swi nga ha endleka swi nga olovi leswaku xirho xin’wana ni xin’wana xa ndyangu xi ta ni buku ya xona; kumbexana ku nga tiwa ni buku yin’we leswaku ndyangu wu ta kota ku kambisisa.

Eka Nhlangano wa Ntirho, hi fanele hi va ni Vutirheli Bya Hina Bya Mfumo lebyi tirhisiwaka ni buku leyi nge Reasoning. Tana ni tibuku tihi na tihi leti ku nga ta kombeteriwa eka tona hi nkarhi wa nhlangano, to tanihi tibuku leti nga ta tirhisiwa eka swingheniso swa minkombiso. Vakulu va fanele va va ni kopi ya Ku Hleleriwa Ku Hetisisa Vutirheli Bya Hina.

Vatswari va fanele va lwela leswaku vana va vona va tshamiseka ni ku nyikela nyingiso eminhlanganweni ya vandlha. Ku va nyika tikopi ta vona ta Xihondzo xo Rindza ni tibuku tin’wana, hambi loko va nga si swi kota ku hlaya, swi va khutaza leswaku va va ni ku tsakela. Loko vana va dyondzisiwa ku xixima tibuku ta swa le tilweni ni ku ti tirhisa, va kota ku kurisa mikhuva leyinene ya moya ya vutomi hinkwabyo.

Ntsako ni ku eneriseka loku hi ku kumaka eminhlanganweni ya vandlha swi ya swi kula swinene loko hi ta hi hlome kahle. (2 Tim. 3:​17) Leyi i ndlela yo antswa yo tiyisekisa leswaku hi “ta[la] hi vutivi bya ku rhandza ka [Xikwembu], evutlharini hinkwabyo ni ku twisiseni hinkwako loku nyikiwaka hi Moya.”​—⁠Kol. 1:⁠9.