Famba Hi Ripfumelo
1 Vanhu va timiliyoni va seketela vutomi bya vona hi rifuwo ra vona, hi vuhunguki va tshemba matimba ya vuxisi bya rifuwo. (Mt. 13:22) Va dyondza dyondzo yo vava swinene loko rifuwo ra vona ri lahleka kumbe ri yiviwa kumbe loko ri tikomba ri nga pfuni nchumu. Hi khutaziwa ku landzela ndlela ya vutlhari, hi tikarhatela rifuwo ra moya. (Mt. 6:19, 20) Leswi swi katsa “ku famba hi ripfumelo.”—2 Kor. 5:7, NW.
2 Rito leri nge “ripfumelo” ri hundzuluxeriwe ri huma eka rito ra Xigriki leri nga ni mongo lowu vulaka ntshembo, ku tshemba ni ku kholwa loku heleleke. Ku famba hi ripfumelo swi vula ku langutana ni swiyimo leswi nonon’hwaka u titshega hi Xikwembu, hi ku tshemba vuswikoti bya xona byo kongomisa minkondzo ya hina ni ku tshemba ku tiyimisela ka xona ko khathalela swilaveko swa hina. Yesu u veke xikombiso lexi hetisekeke; u tshame a langute eka leswi swi nga swa nkoka hakunene. (Hev. 12:2) Hilaha ku fanaka, hi fanele hi hlayisa timbilu ta hina ti langute eka leswi nga voniwiki, swilo swa moya. (2 Kor. 4:18) Minkarhi hinkwayo hi fanele hi xiyisisa vutomi bya hina bya sweswi lebyi tsekatsekaka ivi hi titshega hi Yehovha hilaha ku heleleke.
3 Nakambe hi fanele hi tiyiseka swinene leswaku Yehovha u hi kongomisa hi ku tirhisa nhlengeletano ya yena leyi vonakaka leyi nga ehansi ka nkongomiso wa “nandza la tshembekaka, wo tlhariha.” (Mt. 24:45-47) Hi kombisa ripfumelo ra hina loko hi ‘yingisa lava rhangelaka’ evandlheni. (Hev. 13:17) Ku fambisana ni malunghiselelo ya le tilweni hi ku titsongahata swi kombisa ku tshemba ka hina Yehovha. (1 Pet. 5:6) Hi fanele hi susumeteleka hi mbilu hinkwayo ku seketela ntirho lowu nhlengeletano yi hi nyikeke wona. Leswi swi ta endla leswaku hi tshinelelana swinene ni vamakwerhu exibohweni lexi tiyeke xa rirhandzu ni vun’we.—1 Kor. 1:10.
4 Ndlela Yo Tiyisa Ripfumelo: A hi fanelanga hi pfumelela ripfumelo ra hina ri yima ndhawu yin’we. Hi fanele hi lwa hi matimba swinene leswaku hi ri kurisa. Ku tshama hi ri karhi hi dyondza, hi khongela ni ku va kona eminhlanganweni swi ta hi pfuna leswaku hi tiyisa ripfumelo ra hina leswaku, hi ku pfuniwa hi Yehovha, ri ta kota ku hlula ndzingo wihi na wihi. (Ef. 6:16) Xana u tisimekele ndlela leyinene yo hlaya Bibele siku na siku ni ku lunghiselela minhlangano? Xana wa anakanyisisa hi leswi u swi dyondzaka nkarhi na nkarhi, naswona xana wa n’wi tshinelela Yehovha hi xikhongelo? Xana i ntolovelo wa wena ku hlanganyela eminhlanganweni hinkwayo ni ku hlamula loko nkarhi wu pfumela?—Hev. 10:23-25.
5 Ripfumelo leri tiyeke ri kombisiwa hi mintirho leyinene. (Yak. 2:26) Ndlela yin’wana leyinene ngopfu yo kombisa ripfumelo ra hina i ku byela van’wana hi ntshembo wa hina. Xana u lava minkarhi yo avela van’wana mahungu lamanene? Xana u nga swi kota ku antswisa swiyimo swa wena leswaku u endla leswi engetelekeke evutirhelini? Xana wa swi tirhisa swiringanyeto leswi hi swi kumaka swo antswisa vuswikoti ni ku humelela ka hina evutirhelini bya hina? Xana u tivekela tipakani ta moya ni ku tikarhatela ku ti fikelela?
6 Yesu u tsundzuxe malunghana ni ku karhateka ku tlula mpimo hi timhaka ta vutomi bya siku na siku ni ku pfumelela swilo leswi vonakaka kumbe swilo swa vutianakanyi swi endla langutelo ra hina ra moya ri va munyama. (Lk. 21:34-36) Hi fanele hi xiyisisa mafambelo ya hina hi vukheta leswaku hi papalata ku onhakeriwa hi ripfumelo ra hina. (Ef. 5:15; 1 Tim. 1:19) Hinkwerhu ka hina ha tshemba leswaku eku heteleleni hi ta swi kota ku vula leswaku hi ‘lwile nyimpi leyinene, hi hetile mpfhuka wa hina wa ku tsutsuma, naswona hi hlayisile ripfumelo.’—2 Tim. 4:7.